ཐེ་ས་ལོ་ནི་ཀ་དང་པ་ལེའུ་ 2 - རྫོང་ཁ་

པའུལ་ཁོ་རང་གིས་འབད་མི་ལཱ་ལུ་སེམས་ཁར་དྲན་པའི་སྐོར།

¹ དབའེ་སྤུན་ཆ་ཚུ་ ང་བཅས་ཁྱེད་འཕྱད་པར་འོང་མི་འདི་ ཁུངས་མེདཔ་མེན་པར་ ལེགས་ཤོམ་སོང་ཡི་ཟེར་ཁྱེད་ཀྱིས་ཤེས།

² ཧེ་མ་ཁྲོམ་ ཕི་ལི་པི་ལུ་ང་བཅས་སྡུག་བསྔལ་མྱོང་སྟེ་ རོགས་ཀྱིས་ངོ་ཚ་སི་སི་བཟོ་ཡི་ཟེར་ཁྱེད་ཀྱིས་ཤེས་ ཨིན་རུང་ ཁྱེད་སྡོད་སར་འོངམ་ད་ རོགས་ཀྱིས་ང་བཅས་ལུ་བཀག་ཐབས་འབད་རུང་ དཀོན་མཆོག་ནང་སྤོབས་པ་ཆེ་ཏོག་ཏོ་སྦེ་ ཁྱེད་ལུ་དཀོན་མཆོག་གི་གཏམ་བཟང་འདི་ གནམ་མེད་ས་མེད་རྩ་འགེངས་ཏེ་བཤད་ཅི་།

³ ང་བཅས་ཀྱིས་གཏམ་བཟང་དེ་ ཨུ་ཚུགས་རྐྱབ་སྟེ་བཤདཔ་ད་ འཛོལ་བ་དང་སེམས་མ་གཙངམ་གི་ཐོག་ལས་མེནམ་མ་ཚད་ མི་ལུ་མགུ་བསྐོར་ནི་དང་ཀྲེམ་རྐྱབ་ནི་ཡང་མེན།

⁴ ག་ཅི་སྨོ་ཟེར་བ་ཅིན་ དཀོན་མཆོག་གིས་ ཁོ་གི་གཏམ་བཟང་བཤད་པའི་འོས་འབབ་ ང་བཅས་ལུ་གནང་ཡི་ གཏམ་བཟང་བཤདཔ་ད་ མིའི་སེམས་ལྷུ་ནིའི་དོན་ལུ་མེན་པར་ དཀོན་མཆོག་གི་ཐུགས་དགྱེས་པའི་དོན་ལུ་ཨིན་ དཀོན་མཆོག་གིས་རྐྱངམ་གཅིག་ མིའི་སེམས་བརྟག་དཔྱད་གནངམ་ཨིན།

⁵ ཁྱེད་ཀྱིས་ཐད་རི་བ་རི་ཤེས་ ང་བཅས་ཁྱེད་ལུ་ངོ་དྲིན་བཀལ་ནིའི་དོན་ལུ་འོངམ་མེན་ ང་བཅས་རྒྱུ་ནོར་ཐོབ་པའི་རེ་བ་ལུ་ཡང་འོངམ་མེན་ དཀོན་མཆོག་གིས་ང་བཅས་ཀྱི་བློའི་འདོད་པ་མཁྱེན།

^6-7 ང་བཅས་ཁིརཱིས་ཀྱི་སྐུ་ཚབ་གཅིག་ཨིནམ་ལས་ ཁྱེད་ལས་ཞེ་ས་ཐོབ་དགོཔ་ཅིག་ཨིན་རུང་ མི་ཚུ་དང་ཁྱེད་ལས་ང་བཅས་ཀྱིས་ཞེ་ས་མ་འཚོལ་ དེ་འབདཝ་ད་ ང་བཅས་ཁྱེད་དང་མཉམ་གཅིག་སྡོད་པའི་བསྒང་ ཨའི་གིས་རང་གི་ཨ་ལོ་ཚུ་ལུ་ འཇམ་ཏོག་ཏོ་འབད་དོཝ་བཟུམ་སྦེ་ ང་བཅས་ཀྱིས་ཁྱེད་ལུ་ཡང་དེ་སྦེ་འབད་ཡི།

⁸ ཁྱེད་ལུ་དཀོན་མཆོག་གི་གཏམ་བཟང་བཤད་ནི་ རྐྱངམ་གཅིག་མེན་པར་ ང་བཅས་ཀྱི་ཚེ་སྲོག་ཡང་ དགའ་སྤྲོ་གི་ཐོག་ལས་ བྱིན་ནིའི་དོན་ལུ་གྲ་སྒྲིག་སྦེ་སྡོད་ཅི་ ག་ཅི་སྨོ་ཟེར་བ་ཅིན་ ང་བཅས་ཀྱི་དོན་ལུ་ཁྱེད་ གཅེས་པའི་སྤུན་སྦེ་བྱུང་ཡི།

⁹ དབའེ་སྤུན་ཆ་ཚུ་ ཁྱེད་ཀྱིས་དོན་ལས་རང་དྲན་འོང་ དཀོན་མཆོག་གི་གཏམ་བཟང་ ཁྱེད་ལུ་བཤད་དེ་སྡོད་པའི་བསྒང་ལུ་ ང་བཅས་ཀྱིས་ཁྱེད་ལུ་ལཱ་ཁག་བྱུང་མ་བཅུག་ནི་སྦེ་ ང་བཅས་ཀྱིས་ཉིན་ནུབ་མེད་པར་ ལཱ་འབད་དཀའཝ་སྤྱད་དེ་ ང་བཅས་རང་གི་ཟད་འགྲོ་དེ་སྦེ་གཏང་ཡི།

¹⁰ ང་བཅས་ཀྱིས་ཁྱེད་དད་པ་བསྐྱེད་མི་ཚུ་དང་མཉམ་ དམ་པ་དང་ ཆོས་སེམས་ཅན་དང་ སྐྱོན་ག་ནི་ཡང་མེདཔ་སྦེ་ སྤྱོད་ལམ་ལེགས་ཤོམ་འབད་དེ་ སྡོད་པའི་འཛོམ་དཔང་དེ་ ཁྱེད་ཀྱིས་འབདཝ་མ་ཚད་ ག་ར་དཀོན་མཆོག་གིས་མཁྱེན།

¹¹ ད་རུང་ཁྱེད་ཀྱིས་ཤེས་ ཨ་པ་གིས་རང་གི་ཨ་ལོ་ལུ་ག་དེ་སྦེ་འབདཝ་ཨིན་ན་ འདི་བཟུམ་སྦེ་ང་བཅས་ཀྱིས་ཡང་ཁྱེད་ལུ་འབད་ཡི།

¹² ང་བཅས་ཀྱིས་ཁྱེད་ལུ་ཡར་བསྟོད་རྐྱབ་ སེམས་གསོ་འབད་དེ་ ཁྱེད་ཀྱི་ཉིནམ་རེ་རེ་གི་སྤྱོད་ལམ་འདི་ དཀོན་མཆོག་གི་ཐུགས་དགོངས་དང་འཁྲིལ་ཏེ་སྡོད་ཟེར་ ཨུ་ཚུགས་རྐྱབ་སླབ་ཅི་ ག་ཅི་སྨོ་ཟེར་བ་ཅིན་ དཀོན་མཆོག་གིས་ ཁོ་རང་གི་རྒྱལ་སྲིད་དང་གཟི་བརྗིད་ནང་ ཁྱེད་ལུ་འབོ་དོ།

¹³ ང་བཅས་ཀྱིས་ཁྱེད་ལུ་ དཀོན་མཆོག་གི་གཏམ་བཟང་བཤདཔ་ད་ ཁྱེད་ཀྱིས་འདི་ལུ་ མི་གིས་སླབ་པའི་གཏམ་བཟུམ་ཅིག་སྦེ་མེན་པར་ དཀོན་མཆོག་ཁོ་རང་གི་གསུང་ལུ་ཉན་དོཝ་བཟུམ་སྦེ་ བདེན་འཛིན་རེ་ཡི་ དེའི་དོན་ལུ་ང་བཅས་ཨ་རྟག་རང་ དཀོན་མཆོག་ལུ་བཀའ་དྲིན་ཆེ་ཟེར་ཞུཝ་ཨིན་ ང་བཅས་ཀྱིས་སླབ་མི་འདི་ དོན་ལས་རང་དཀོན་མཆོག་ལུ་དད་པ་བསྐྱེད་མི་ཚུ་གི་སྦུག་ལུ་ དཀོན་མཆོག་གིས་ཕྱག་ལཱ་མཛད་དེ་ཡོད།

¹⁴ དབའེ་སྤུན་ཆ་ཚུ་ ཡུ་དེ་ཡ་ལུང་ཕྱོགས་ནང་དཀོན་མཆོག་གི་ཆོས་ཚོགས་ཚུ་ལུ་ ཡ་ཧུ་ད་པ་ཚུ་གིས་ གཙོ་བོ་ཁིརཱིས་ཡེ་ཤུ་ལུ་དད་པ་བསྐྱེད་མི་ཚུ་ལུ་ གནོད་འཚེ་བཀལཝ་བཟུམ་སྦེ་ ཁྱེད་རང་གི་གཡུས་ཁར་གྱི་མི་ཚུ་གིས་ ཁྱེད་ལུ་ཡང་གནོད་འཚེ་བཀལ་ཡི།

^15-16 ཁོང་ ཡ་ཧུ་ད་པ་ཚུ་གིས་ ལུང་སྟོན་པ་ཚུ་ལུ་བསད་ནུག་ གཙོ་བོ་ཡེ་ཤུ་ལུ་ཡང་བཀྲོངས་ནུག་ ད་ ད་རེས་སྐབས་ ཡ་ཧུ་ད་པ་ཚུ་གིས་ ང་བཅས་ལུ་ཡང་གནོད་འཚེ་བཀལ་ཡི་ ཕྱིའི་མི་རིགས་ཚུ་ལུ་ སྐྱབས་མཛད་པའི་བློ་སླབ་ནི་དེ་ལུ་ ཁོང་གིས་བཀག་རྐྱབ་ཨིནམ་མ་ཚད་ དཀོན་མཆོག་གི་ཐུགས་མ་དགྱེས་མི་ལཱ་འབད་དེ་ མི་ག་ར་གི་ངོ་རྒོལ་འབདཝ་མས་ དེ་སྦེ་འབད་ནི་འདི་གིས་ ཁོང་རྟག་བུ་རང་སྡིག་པ་བསག་ནི་མང་སྟེ་ མཐའན་མཇུག་ལུ་དཀོན་མཆོག་གི་ཆདཔ་ ཁོང་གི་གུ་ཕོག་ཆེ་ཡི།།

ཐེ་ས་ལོ་ནི་ཀ་ལུ་འགྱོ་ནི་གི་རེ་བ་ཡོད་པའི་སྐོར།

¹⁷ དེ་འབདཝ་ད་སྤུན་ཆ་ཚུ་ ང་བཅས་དུས་ཡུན་དུམ་གྲ་ཅིག་གི་དོན་ལུ་ ཁྱེད་དང་མཉམ་གཅིག་ ལུས་འདི་ཁ་འཕྱལ་སོང་རུང་ ང་བཅས་རང་གི་སེམས་ཁར་ལས་ ཁ་མ་འཕྱལ་བར་ ང་བཅས་ཁྱེད་དང་མཉམ་གཅིག་ གནམ་མེད་ས་མེད་འཕྱད་དགོ་མནོ་སྟེ་ ཁྱེད་སྡོད་སར་ལོག་འོང་ནི་གི་ཐབས་ཤེས་འགྱིར་ཏེ་སྡོད་ཅི།

¹⁸ ང་ པའུལ་གྱིས་འཕྲལ་འཕྲལ་ ཁྱེད་སྡོད་སར་འོང་ནི་འབད་རུང་ བདུད་ སེ་ཏཱན་གྱིས་ང་བཅས་ལུ་བཀག་བརྐྱབས་ཅི།

¹⁹ ད་ང་བཅས་ཀྱིས་ག་ཅི་ལུ་བལྟ་སྟེ་ རེ་བ་དང་དགའ་ཚོར་བསྐྱེད་ནི་སྨོ་ ཤུལ་མ་གཙོ་བོ་ཡེ་ཤུ་ལོག་འབྱོན་པའི་སྐབས་ལུ་ ག་ཅི་གི་གསོལ་རས་ཐོབ་ནི་སྨོ་ ང་བཅས་ཀྱི་རེ་བ་དང་ དགའ་ཚོར་ དེ་ལས་གསོལ་རས་དེ་ ཁྱེད་ཨིན་མེན་ན།

²⁰ དོན་ལས་རང་ཁྱེད་ལུ་བལྟ་སྟེ་ ངལ་རངས་དགའ་ཚོར་ཡང་ཐོབ་ཅི།