པེ་ཏྲོ་དང་པ་ལེའུ་ 5 - རྫོང་ཁ་

འགོ་འདྲེན་པ་དང་གཞོནམ་ཚུ་ལུ་བསླབ་བྱ་བྱིན་མིའི་སྐོར།

¹ ང་གིས་ཁྱེད་དདཔ་ཅན་ནང་གི་འགོ་འདྲེན་འཐབ་མི་ཚུ་ལུ་ གཅིག་སླབ་ནི་ཨིན་ ང་རང་ཡང་ཁྱེད་བཟུམ་སྦེ་ འགོ་འདྲེན་འཐབ་མི་གཅིག་ཨིནམ་མ་ཚད་ ཁིརཱིས་སྡུག་བསྔལ་བཞེས་པའི་སྐབས་ ང་ཡང་དེ་གི་འཛོམ་དཔང་སྦེ་ཡོདཔ་ཨིན་ དེ་ལས་ཁོ་ལོག་བྱོན་ཏེ་ ཁོ་གི་གཟི་བརྗིད་འདི་ཕྱི་ཁར་ཐོནམ་ད་ ང་ཡང་དེ་ལས་བགོ་བཤའ་ཐོབ་མི་གཅིག་ཨིན་ ད་ཁྱེད་ལུ་དྲན་བསྐུལ་གཅིག་སླབ་ནི་ཨིན།

² ཁྱེད་ཀྱི་སྦུག་ལུ་ཡོད་མི་ཚུ་ དཀོན་མཆོག་གི་ལུག་ཁྱུ་ཨིན་མནོ་སྟེ་ ཁྱེད་ཀྱིས་འདི་ཚུ་ལུ་ ལུག་རྫིཔ་བཟུམ་སྦེ་ལེགས་ཤོམ་སྦེ་བདག་འཛིན་འཐབ་དགོ་ དེ་སྦེ་འབདཝ་ད་ བྱ་ཐབས་མེད་པར་འབད་དགོཔ་བཟུམ་སྦེ་མེན་པར་ སེམས་ཀྱི་གཏིང་ལས་རང་ འདོད་པ་བསྐྱེད་དེ་འབད་དགོ་ ད་རུང་ ཏི་རུ་ལུ་དགོ་འདོད་བསྐྱེད་དེ་མེན་པར་ ཞབས་ཏོག་ཞུ་དགོ་ཟེར་མནོ་སྟེ་འབད་བྱིན།

³ མི་ཚུ་ལུ་འགོ་འདྲེན་འཐབ་ད་ དབང་བཙོང་སྟེ་མ་འབད་བར་ ཉམ་ཆུང་གི་ཐོག་ལས་ ལུག་ཁྱུ་ལུ་དཔེ་བཟང་པོ་སྟོན་བྱིན།

⁴ དེ་ལས་ལུག་རྫིཔ་གི་འགོ་དཔོན་སྦོམ་ཤོས་འདི་འབྱོནམ་ད་ ཁྱེད་ཀྱི་གསོལ་རས་འདི་ ནམ་ཡང་ཡལ་འགྱོ་ནི་མེད་པའི་ གཟི་བརྗིད་ཀྱི་གཙུག་རྒྱན་འདི་ཐོབ་འོང་།

⁵ དེ་བཟུམ་སྦེ་ ཁྱེད་གཞོནམ་དེ་ཚུ་ཡང་ འགོ་འདྲེན་པ་ཚུ་གི་དབང་ཚད་ལུ་ཆ་བཞག་སྟེ་ཉན་དགོ་ དེ་ལས་ཁྱེད་ག་ར་ ཉམ་ཆུང་གི་ཐོག་ལས་ གཅིག་གིས་གཅིག་ལུ་ཆ་རོགས་འབད་ ག་ཅི་སྨོ་ཟེར་བ་ཅིན། མི་ཁམས་ཅན་ཚུ་ལུ་ དཀོན་མཆོག་གིས་བཀག་ཆ་མཛདཔ་ཨིན་ དེ་འབདཝ་ད་ མི་མཉམ་ཆུང་དེ་ཚུ་ལུ་ ཁོ་གིས་ཐུགས་རྗེ་གཟིགསཔ་ཨིན།

⁶ དེ་འབདཝ་ལས་ ཁྱེད་ཆ་ཁྱབ་ དབང་ཤུགས་ཡོད་མིའི་ དཀོན་མཆོག་གི་ཕྱག་འོག་ལུ་ཉམ་ཆུང་སྦེ་སྡོད་དགོ་ དེ་ལས་དུས་ཚོད་ཀྲིག་ཀྲི་ལུ་ ཁོ་གིས་ཁྱེད་ལུ་མཐོ་ས་བཀལ་གནང་འོང་།

⁷ ཁྱེད་རང་གི་ཚ་གྱང་དང་སྡུག་བསྔལ་ག་ར་ཁོ་ལུ་ཕུལ་ ག་ཅི་སྨོ་ཟེར་བ་ཅིན་ ཁོ་གིས་ཁྱེད་ལུ་ ག་ཅི་རང་བྱུང་རུང་ བདག་འཛིན་འཐབ་གནངམ་ཨིན།

⁸ དུས་ཚོད་ནམ་རང་འབད་རུང་ ཁྱེད་རང་ སེམས་གསལ་ཏོག་ཏོ་སྦེ་བལྟ་ནི་དང་ དྲན་པ་བཏོན་ཏེ་སྡོད་ ཁྱེད་ཀྱི་དགྲ་བྱང་ཕྱད་བདུད་འདི་ ངར་སྐད་རྐྱབ་མིའི་སེམས་ཅན་སེངྒེ་བཟུམ་སྦེ་ ག་ཟཝ་དྲག་ག་ཟེར་བལྟ་སྟེ་འཚོལ་སྡོདཔ་ཨིན།

⁹ དེ་འབདཝ་ལས་ ཁྱེད་ཆ་ཁྱབ་དད་པ་ནང་སྒྲིང་སྒྲིང་སྦེ་སྡོད་དེ་ བདུད་དེ་གིས་ག་སླབ་མི་དེ་ལུ་ཉན་ཁུག་མ་བཏབ་ དེ་ལས་འཛམ་གླིང་ག་ར་ནང་གི་སྤུན་ཆ་ཚུ་ལུ་ ཨ་ནི་བཟུམ་གྱི་སྡུག་བསྔལ་བྱུང་སྟེ་ཡོད་ཟེར་ཧ་གོ་དགོ།

¹⁰ ཨིན་རུང་ ཁྱེད་ཡུདཔ་ཐེངས་ཅིག་སྡུག་བསྔལ་མྱོང་པའི་ཤུལ་ལས་ དཀོན་མཆོག་གིས་ཁྱེད་ལུ་ངལ་འཚོ་གནང་སྟེ་ ཁྱེད་མི་སྒྲིང་སྒྲིང་དང་ སྟོབས་ཤུགས་ཅན་ དེ་ལས་འགྱུར་བ་མེད་པའི་གཞི་འགྱམ་སྦེ་མཛད་གནང་འོང་ ཡེ་ཤུ་ཁིརཱིས་ཀྱི་ཐོག་ལས་ བཀའ་དྲིན་དང་ལྡན་པའི་དཀོན་མཆོག་གིས་ ཁོ་རང་གི་མཐའ་མེད་པའི་གཟི་བརྗིད་ནང་ ཁྱེད་ལུ་འབོ་གནང་སྟེ་ཡོད།

¹¹ དེ་ལས་དབང་ཤུགས་ག་ར་ དུས་རྟག་བུ་རང་ཁོ་གི་ཨིན་ནོ་ ཨ་མཱེན།།

མཐའན་མཇུག་གི་བཀྲིས་ལེགས་སྨོན་ཞུ་བའི་སྐོར།

¹² དེ་ལས་ ང་གིས་དམ་ཚིག་ཅན་སྦེ་བརྩིས་མི་ སྤུན་ཆ་ སཱིལ་ཝ་ནཱུས་ཀྱིས་ ང་ལུ་ཆ་རོགས་འབད་དེ་ ང་གིས་ཨ་ནི་ཡི་གུ་མདོར་བསྡུས་ཏེ་ ཁྱེད་ལུ་བྲིསཝ་ཨིན་ ང་གིས་དྲན་བསྐུལ་ཞུ་སྟེ་ བྲིས་མི་དོན་དག་དེ་ཨ་ནི་ཨིན་ ཁྱེད་ཀྱིས་ད་ལྟོ་སྡུག་བསྔལ་མྱོང་དགོ་སྟེ་འབད་རུང་ དོན་ལས་རང་ ཁྱེད་དཀོན་མཆོག་གི་ཐུགས་རྗེ་ནང་ལུ་བཅའ་མར་གཏོགས་མི་ཚུ་ཨིན་ དེ་ནང་ཁྱེད་བརྟན་ཏོག་ཏོ་སྦེ་གནས་དགོ།

¹³ ཁྱེད་དང་གཅིག་ཁར་ བཙག་འཐུ་མཛད་གནང་མིའི་དདཔ་ཅན་ ནཱ་ བ་བི་ལཱོན་ནང་ཡོད་མི་ཆོས་ཚོགས་དང་ ངེ་གི་བུ་བཟུམ་སྦེ་ཨིན་མི་ མཱར་ཀུ་གིས་ ཁྱེད་ལུ་བཀྲིས་ལེགས་སྨོན་ཞུ་དེས།

¹⁴ ཁྱེད་རང་གཅིག་གིས་གཅིག་ལུ་ ཡེ་ཤུ་པའི་བྱམས་པ་གི་ཐོག་ལས་ སྐུ་གཟུགས་བཟང་པོ་ཟེར་ཞུ་ ཁིརཱིས་ནང་ཡོད་མི་ག་ར་ལུ་ཞི་བདེ་གནང་བར་ཤོག། །།