པེ་ཏྲོ་དང་པ་ལེའུ་ 4 - རྫོང་ཁ་

དཀོན་མཆོག་གི་དོན་ལུ་སྡོད་པའི་སྐོར།

¹ ད་ཁིརཱིས་ཀྱིས་ ཁོ་རའི་སྐུ་གཟུགས་ནང་ སྡུག་བསྔལ་མྱོངམ་ལས་བརྟེན་ཏེ་ འདི་སེམས་ཁར་དྲན་ཏེ་ཁྱེད་ཀྱིས་ཡང་ དེ་བཟུམ་གྱི་མནོ་བསམ་གཏང་དགོ་ ག་ཅི་སྨོ་ཟེར་བ་ཅིན་ རང་གི་གཟུགས་ནང་ ཁིརཱིས་ཀྱི་དོན་ལུ་ སྡུག་བསྔལ་མྱོང་སྟེ་ཡོད་མི་ ག་གིས་རང་འབད་རུང་ མི་དེ་གིས་ སྡིག་པ་འབད་ནི་སྤངམ་ཨིན།

² མི་དེ་གིས་ འཛམ་གླིང་ནང་ སྡོད་པའི་རིང་ལུ་ ཁོ་རའི་མི་ཚེ་འདི་ མིའི་འདོད་པ་བཞིན་དུ་སྡོད་ནི་གི་ལཱ་མི་འབད་ དེ་འབདཝ་ད་ ཁོ་གིས་ དཀོན་མཆོག་གི་ཐུགས་དགོངས་བཞིན་དུ་འབད་ནི་ལུ་ རྩ་འགེངས་ཏེ་སྡོད་འོང་།

³ ག་ཅི་སྨོ་ཟེར་བ་ཅིན་ ཁྱེད་ཀྱི་འདས་པའི་མི་ཚེ་འདི་ནང་ དཀོན་མཆོག་ངོ་མ་ཤེས་མི་བཟུམ་སྦེ་ སྤྱོད་ངན་འབད་ནི་དང་ འདོད་ཆགས་ལུ་སྤྱོད་ནི་ ཆང་གིས་ར་བཟི་ནི་ འཆལ་སྤྱོད་སྤྲོ་སྟོན་ནང་བཅའ་མར་གཏོགས་ནི་ ཞེན་པ་ལོག་སི་སི་གི་སྐུ་ལུ་ཕྱག་འཚལ་ནི་ཚུ་ འབད་དེ་ ཁྱེད་ཀྱིས་ དེ་ཚུ་ལངམ་སྦེ་འབད་ཡི།

⁴ ད་ཁྱེད་ཀྱི་ཧེ་མ་གི་ཆ་རོགས་ཚུ་གིས་ ཁོང་གིས་སྤྱོད་ངན་གྱི་ལཱ་འབད་དོཝ་བཟུམ་སྦེ་ ད་ལྟོ་ཁྱེད་ཀྱིས་མ་འབདཝ་མཐོངམ་ད་ ཁོང་ཧ་ལས་ཏེ་ ཁོང་གིས་ཁྱེད་ཀྱི་སྐོར་ལས་གཏམ་ངན་སླབ་འོང་།

⁵ ཨིན་རུང་ མི་གསོན་པོ་དང་མི་ཤི་མི་ གཉིས་ཆ་ར་ལུ་ ཁྲིམས་ཕྱེ་ནིའི་དོན་ལུ་གྲ་སྒྲིག་སྦེ་བཞུགས་མིའི་ དཀོན་མཆོག་ལུ་ ཁོང་གིས་རྩིས་ཕུལ་དགོ།

⁶ ག་ཅི་སྨོ་ཟེར་བ་ཅིན་ དེ་གི་དོན་ལུ་ ཁོང་ཤི་སོང་མི་ཚུ་ལུ་ཡང་ གཏམ་བཟང་བཤད་དགོ་པའི་དོན་དག་འདི་ མིའི་ལུས་འདི་ལུ་ ཆདཔ་ཕོག་སྟེ་ ཤི་དགོ་རུང་ སེམས་ཉིད་འདི་ དཀོན་མཆོག་དང་གཅིག་ཁར་ གསོན་པོ་སྦེ་སྡོད་ནིའི་དོན་ལུ་ཨིན་མས།

⁷ དུས་མཐའན་མཇུག་ལུ་ ག་ཅི་འབྱུང་ནི་ཨིན་ན་ དེ་ཚུ་ག་ར་ནཱ་སྦོ་ལོགས་ཁར་ལྷོད་ཅི་ དེ་འབདཝ་ལས་ མནོ་བསམ་ལེགས་ཤོམ་སྦེ་བཏང་སྟེ་ སེམས་ཁར་ལུ་དྲནམ་བཏོན་ དེ་ལས་ཁྱེད་ཆ་ཁྱབ་ཀྱིས་སྨོན་ལམ་བཏབ་ཚུགས།

⁸ ག་ར་ལས་དྲག་ཤོས་འདི་ གཅིག་གིས་གཅིག་ལུ་ཧིང་ལས་རང་བྱམས་པ་འབད་དགོ་ ག་ཅི་སྨོ་ཟེར་བ་ཅིན། བྱམས་པ་འདི་གིས་ སྡིག་པ་ག་དེ་ཅིག་རང་མང་རུང་ བཀབ་བཞག་ཚུགས།

⁹ དེ་ལས་ཁྱིམ་ནང་མགྱོནམ་འོངམ་ད་ ཁ་སྡུག་མ་འབར་བར་ དགའ་ཚོར་གྱི་ཐོག་ལས་ བསུ་ལེན་འབད་དགོ།

¹⁰ རེ་རེ་བཞིན་གྱིས་ དཀོན་མཆོག་ལས་ག་ཐོབ་མིའི་གསོལ་རས་དང་བསྟུན་ཏེ་ དཀོན་མཆོག་གིས་གསོལ་རས་མ་དྲཝ་ལེ་ཤ་གནང་ཡོད་མི་འདི་ ལག་ལེན་འཐབ་སྟེ་ གཅིག་གིས་གཅིག་ལུ་ཆ་རོགས་འབད།

¹¹ ག་གིས་རང་འབད་རུང་ ཆོས་བཤད་ནིའི་གསོལ་རས་ཡོད་པ་ཅིན་ དཀོན་མཆོག་ཁོ་རང་གིས་གསུངས་དོཝ་བཟུམ་སྦེ་ཆོས་བཤད་ དེ་ལས་ག་གིས་རང་འབད་རུང་ གཞན་ལུ་ཆ་རོགས་འབད་ནིའི་གསོལ་རས་ཡོད་པ་ཅིན་ དཀོན་མཆོག་གིས་གནང་མིའི་སྟོབས་ཤུགས་དང་བསྟུན་ཏེ་ ཆ་རོགས་འབད་ དེ་འབདཝ་ལས་ ཁྱེད་ཀྱིས་འབད་མི་ག་ར་ནང་ལུ་ ཡེ་ཤུ་ཁིརཱིས་ཀྱི་ཐོག་ལས་ དཀོན་མཆོག་གི་མཚན་ཡར་ཡར་སྙན་གྲགས་ཅན་སྦེ་འགྱོ་འོང་ དེ་ལས་གཟི་བརྗིད་དང་དབང་ཤུགས་ག་ར་ དུས་ཨ་རྟག་རང་ཁོ་གི་ཨིན་ནོ་ ཨ་མཱེན།།

དདཔ་ཅན་འབད་དེ་སྡུག་བསྔལ་མྱོང་རུང་བྱིན་རླབས་ཐོབ་ནི་ཨིན་པའི་སྐོར།

¹² ངེ་གི་བྱམས་པའི་ཆ་རོགས་ཚུ་ ཁྱེད་ཀྱི་མི་ཚེ་ནང་ དཀའ་ངལ་ཁག་དྲགས་ བརྟག་དཔྱད་འབད་ནི་སྦེ་འབྱུངམ་ད་ ནམ་ཡང་བྱུང་མ་མྱོང་མི་ མ་འདྲཝ་བྱུང་དོ་ཟེར་ ཧ་ལས་ཏེ་རྣམ་རྟོག་མ་ལང་།

¹³ ཨིན་རུང་ དེ་ལུ་དགའ་སྤྲོ་འགྱུར་ ག་ཅི་སྨོ་ཟེར་བ་ཅིན་ ཁྱེད་ཀྱིས་ཁིརཱིས་ཀྱི་དཀའ་ངལ་མྱོང་མིའི་ནང་ བཅའ་མར་གཏོགསཔ་ཨིན་ དེ་ལས་དུས་མཐའན་མཇུག་ལུ་ ཁོ་གི་གཟི་བརྗིད་འདི་ ཕྱི་ཁར་ཐོནམ་ད་ ཁྱེད་དེ་ལས་ཡང་ལྷག་པའི་དགའ་སྤྲོ་འགྱུར་འོང་།

¹⁴ དེ་ལས་ག་དེམ་ཅིག་སྦེ་ཁིརཱིས་ཀྱི་མཚན་གྱི་སྦེ་ ཁྱེད་ལུ་གཏམ་ངན་སླབ་སྟེ་མར་སྨད་རྐྱབ་པ་ཅིན་ ཁྱེད་ཀྱིས་བྱིན་རླབས་ཐོབ་ཐོབ་ཨིན་ ག་ཅི་སྨོ་ཟེར་བ་ཅིན་ གཟི་བརྗིད་དང་ལྡན་མིའི་ དཀོན་མཆོག་གི་ཐུགས་ཉིད་འདི་ ཁྱེད་གུ་བྱོན་ཏེ་བཞུགས་ཡོད།

¹⁵ དེ་འབདཝ་ད་ སྡུག་བསྔལ་མྱོང་པ་ཅིན་ ཁྱེད་ཀྱིས་ མི་གསད་ ཡང་ན་ཨརཝ་བརྐུ་ ལཱ་ངན་པ་འབད་ མི་གཞན་གྱི་བར་ན་དཀྲོག་ཁ་རྐྱབ་སྟེ་བྱུང་མིའི་སྡུག་བསྔལ་ ཁྱེད་ག་ལུ་ཡང་བྱུང་མ་བཅུག

¹⁶ ཨིན་རུང་ ག་ར་འབད་རུང་ ཡེ་ཤུ་པ་འབད་ཡི་ཟེར་ སྡུག་བསྔལ་མྱོང་པ་ཅིན་ ཁོ་གིས་ངོ་མ་ཚ་བར་ ཁིརཱིས་ཀྱི་མཚན་གྱི་དོན་ལུ་ སྡུག་བསྔལ་འབག་ནི་འོས་འབབ་ཡོདཔ་ཨིན་ཟེར་ དཀོན་མཆོག་ལུ་བཀའ་དྲིན་ཆེ་ཟེར་ཞུ་དགོ།

¹⁷ ག་ཅི་སྨོ་ཟེར་བ་ཅིན་ དཀོན་མཆོག་ཁོ་རང་གི་བཟའ་ཚང་ཚུ་ལུ་ཡང་ ཁྲིམས་ཕྱེ་བའི་དུས་ཚོད་ལུ་ལྷོད་ཅི་ དེ་ལས་ང་བཅས་ལས་རང་འགོ་བཙུགསཔ་ཨིན་པ་ཅིན་ དཀོན་མཆོག་གི་གཏམ་བཟང་མ་ཉན་མི་ཆ་ཁྱབ་ལུ་ ག་ཅི་འབྱུང་ནི་སྨོ།

¹⁸ ཆོས་སེམས་ཡོད་མི་དེ་ཚུ་ལུ་ཡང་ ཐར་པ་ཐོབ་ནི་ལཱ་ཁག་ཡོད་པ་ཅིན་ དཀོན་མཆོག་ལུ་དད་པ་མ་བསྐྱེད་མིའི་སྡིག་ཅན་ཚུ་ལུ་ ག་དེམ་ཅིག་ལཱ་ཁག་འོང་ནི་སྨོ།

¹⁹ དེ་འབདཝ་ལས་ ག་ར་འབད་རུང་ དཀོན་མཆོག་གི་ཐུགས་དགོངས་བཞིན་དུ་ སྡུག་བསྔལ་མྱོང་དགོ་པ་ཅིན་ འཕྲོ་མཐུད་དེ་རང་ ལེགས་ཤོམ་འབད་དེ་ རང་མཛད་གནང་མིའི་དཀོན་མཆོག་ལུ་ རང་གི་མི་ཚེ་ཕུལ་དགོ་ ག་ཅི་སྨོ་ཟེར་བ་ཅིན་ ཁོ་བརྟན་ཏོག་ཏོ་ཅིག་ཨིན།།