པེ་ཏྲོ་དང་པ་ལེའུ་ 3 - རྫོང་ཁ་

ཨམ་སྲུ་དང་རྨགཔ་གི་སྐོར།

¹ དེ་བཟུམ་སྦེ་ ཁྱེད་ཨམ་སྲུ་ཚུ་ རྨགཔ་གི་དབང་ཚད་ཀྱི་འོག་ལུ་སྡོད་དགོ་ དེ་སྦེ་འབདཝ་ད་ ཁོང་རྨགཔ་ལ་ལུ་ཅིག་ དཀོན་མཆོག་གི་གསུང་ལུ་མ་ཉན་མི་ཡོད་དེ་འབད་རུང་ ཁོང་ལུ་ཁ་ལན་འཇལ་ནི་མེན་པར་ ཁྱེད་རང་གི་འབད་གཞག་གི་ཐོག་ལས་ རྒྱལ་ཁ་ཐོབ་སྟེ་ ཁོང་དད་པ་བསྐྱེད་ཚུགས་འོང་།

² ག་ཅི་སྨོ་ཟེར་བ་ཅིན་ ཁོང་གིས་ཁྱེད་ཀྱི་འབད་གཞག་ རྣམ་པར་དག་ཏོག་ཏོ་དང་ གུས་ཞབས་ཡོད་མི་དེ་ལུ་བལྟ་འོང་།

³ ཁྱེད་ཀྱི་ངོ་རིས་ལེགས་ཤོམ་འདི་ ཕྱི་ཁར་ལས་ སྐྱ་དང་སྐྱའི་གུ་ མགུ་ཤད་བརྐྱབས་ཏེ་བཟོ་བཟོ་ནི་དང་ གསེར་གྱི་རྒྱན་ཆ་བཏགས་ནི་ དེ་ལས་བགོ་ལ་ལེགས་ཤོམ་གྱོན་ནི་ཚུ་མེན།

⁴ ཁྱེད་ཀྱི་ངོ་རིས་ལེགས་ཤོམ་འདི་ སེམས་ཀྱི་ནང་ན་ མིག་གིས་མ་མཐོང་མི་ ཁུ་སིམ་སི་སྦེ་ འགྱུར་བ་མེད་པའི་ ཉམ་ཆུང་སྦེ་ཡོད་མི་རྣམ་ཤེས་འདི་ཨིན་ འདི་དཀོན་མཆོག་གི་ཁ་ཐུག་ལུ་རྩ་ཆེ་བའི་རིན་གོང་སྦོམ་ཨིན།

⁵ ཧེ་མ་གི་དུས་ཀྱི་ཨམ་སྲུ་དམ་པ་ཚུ་གིས་ཡང་ དེ་བཟུམ་སྦེ་འབད་ནུག་ ཁོང་གིས་དཀོན་མཆོག་ལུ་རེ་བ་བསྐྱེད་དེ་ ཁོང་རང་གི་རྨགཔ་གི་ཁ་ལུ་ཉན་པའི་ཐོག་ལས་ ཁོང་རང་གི་ངོ་རིས་ལེགས་ཤོམ་བཟོ་བཟོཝ་ཨིན་མས།

⁶ དེ་ལས་ ས་ར་ཡང་དེ་བཟུམ་སྦེ་ ཕ་བརྒྱུད་ ཨབ་ར་ཧམ་གྱི་ཁ་ལུ་ཉན་ཏེ་ ཁོ་ལུ་གཙོ་བོ་ཟེར་ཞུ་ཞུཝ་ཨིན་མས་ ཁྱེད་ཡང་ ག་ཅི་ལུ་ཡང་མ་འདྲོག་པར་ ག་ཀྲིག་ཀྲི་ཨིན་མི་འདི་འབད་བ་ཅིན་ མོ་གི་བུམོ་ཨིན།

⁷ དེ་བཟུམ་སྦེ་ ཁྱེད་རྨགཔ་ཚུ་གིས་ཡང་ རང་གི་ཨམ་སྲུ་དང་གཅིག་ཁར་སྡོདཔ་ད་ མོ་ལུ་ཤུགས་སྟོབས་མེད་ཟེར་ཧ་གོ་སྟེ་ མོ་ལུ་གུས་ཞབས་འབད་དགོ་ མོ་ལུ་བརྩི་མཐོང་གི་ཐོག་ལས་ ལེགས་ཤོམ་སྦེ་འབད་བྱིན་དགོ་ ག་ཅི་སྨོ་ཟེར་བ་ཅིན་ མོ་གིས་ཡང་ཁྱེད་དང་གཅིག་ཁར་ རང་དང་འདྲ་བའི་ནོར་སྐལ་ དཀོན་མཆོག་གིས་གནང་མིའི་ཚེ་ གསོལ་རས་སྦེ་ཐོབ་ཡོདཔ་ཨིན་ ཁྱེད་རྨགཔ་ཚུ་གིས་དེ་སྦེ་འབདཝ་ད་ ཁྱེད་རང་གི་སྨོན་ལམ་ནང་ བར་ཆད་མི་འབྱུང་།།

གཞན་དང་མཐུན་ལམ་བསྒྲིག་ནིའི་སྐོར།

⁸ མཐའན་མཇུག་ལུ་ ཁྱེད་ག་ར་སེམས་དང་མནོ་བསམ་གཅིག་སྦེ་བཏང་དགོ་ གཅིག་གིས་གཅིག་ལུ་ཤ་ཚ་སྟེ་ སྤུན་ཆ་ལུ་བྱམས་པ་འབད་ སྙིང་རྗེ་བསྐྱེད་དེ་ ཉམ་ཆུང་སྦེ་སྡོད་དགོ།

⁹ དེ་ལས་ ངན་ལན་ངན་པ་གིས་མ་འཇལ་ ཚིག་རྩུབ་སླབ་མིའི་ལན་ ཚིག་རྩུབ་ཀྱིས་མ་འཇལ་བར་ དེ་གི་ཚབ་མ་ལུ་ བྱིན་རླབས་ཞུ་བྱིན་དགོ་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཁྱེད་ལུ་ ཨ་ནི་འབད་ནི་སྦེ་འབོ་གནང་གནངམ་ཨིན་ དེ་ལས་དེ་གིས་འབད་ ཁྱེད་ཡང་བྱིན་རླབས་ཐོབ་ནི་ཨིན།

¹⁰ ག་ཅི་སྨོ་ཟེར་བ་ཅིན། ག་ར་འབད་རུང་ རང་གི་མི་ཚེ་ནང་དགའ་ཏོག་ཏོ་ ཉིནམ་ལེགས་ཤོམ་བལྟ་དགོ་མནོ་བ་ཅིན་ ཨིན་ཅི་མིན་ཅི་ རང་གི་ལྕེ་འདི་གིས་ ཚིག་ངན་སླབ་ནི་སྤངས་ཏེ་ ཁ་གིས་མགུ་བསྐོར་དང་གཡོ་སྒྱུ་གི་གཏམ་རྩ་ལས་ར་མ་སླབ།

¹¹ དེ་ལས་ངན་པ་སྤངས་ཏེ་བཟང་པོ་འབད་ གཞན་དང་མཐུན་ལམ་བསྒྲིག་ནི་ལུ་ བརྩོན་ཤུགས་བསྐྱེད་དེ་སྡོད།

¹² ག་ཅི་སྨོ་ཟེར་བ་ཅིན་ གཙོ་བོ་གི་སྤྱན་འདི་ ཆོས་སེམས་ཡོད་མི་ལུ་གཟིགས་ཏེ་ ཁོ་གི་སྙན་འདི་ ཁོང་གིས་ཞུ་མིའི་སྨོན་ལམ་ལུ་གསནམ་ཨིན་ དེ་འབདཝ་ད་ ཁོ་གི་ཞལ་འདི་ སྤྱོད་ངན་འབད་མི་ཚུ་ལུ་གཟིགས་ཏེ་ དགོངསམ་ཁྲེལཝ་ཨིན།།

བྱ་སྤྱོད་བཟང་པོ་ལས་བརྟེན་ཏེ་དཀའ་ངལ་མྱོང་པའི་སྐོར།

¹³ དེ་ལས་ཁྱེད་ཀྱིས་ཕྲང་སྟེ་ལེགས་ཤོམ་འབད་ནི་ལུ་རྩ་འགེངས་པ་ཅིན་ ག་གིས་ཁྱེད་ལུ་གནོདཔ་བཀལ་ནི་སྨོ།

¹⁴ ཨིན་རུང་ ཁྱེད་ཀྱིས་ཕྲངམ་ལས་བརྟེན་ཏེ་ དཀའ་ངལ་མྱོང་དགོ་པ་ཅིན་ དཀོན་མཆོག་གིས་ཁྱེད་ལུ་བྱིན་རླབས་གནང་འོང་ དེ་འབདཝ་ལས། ཁོང་ལུ་བལྟ་སྟེ་ ཚ་གྱང་མ་ལང་ འདྲོག་ཡང་མི་དགོ།

¹⁵ དེ་འབདཝ་ད་ ཁྱེད་རང་གི་སེམས་ཁར་ལུ་ ཁིརཱིས་འདི་གཙོ་བོ་དམ་པ་སྦེ་མཇལ་ཏེ་ ཁོ་ལུ་གུས་ཞབས་ཕུལ་དགོ་ དེ་ལས་ཁིརཱིས་ལུ་ཁྱེད་ཀྱིས་རེ་བ་བསྐྱེད་དགོ་མི་དོན་དག་གི་སྐོར་ལས་ མི་ཚུ་གིས་ཁྱེད་ལུ་དྲི་བ་ཅིན་ ལན་སླབ་ནི་ལུ་གྲ་སྒྲིག་སྦེ་སྡོད་དགོ།

¹⁶ དེ་འབདཝ་ད་ ཨ་ནི་འདི་ཉམ་ཆུང་དང་ ཞེ་ས་གི་ཐོག་ལས་ལན་སླབ་དགོཔ་མ་ཚད་ རང་གི་དྲན་ཤེས་གསལ་ཏོག་ཏོ་སྦེ་ རང་ལུ་འཛོལ་བ་ག་ནི་ཡང་མེད་པར་ བྱ་བ་སྤྱོད་ལམ་ཚུ་ལེགས་ཤོམ་འབད་དེ་སྡོད་དགོ་ དེ་ལས་ཁྱེད་ལུ་སྐྱོན་བཏགས་ཏེ་ གཏམ་ངན་སླབ་ ཁ་གཏང་དགོ་མནོ་མི་དེ་ཚུ་གིས་ འདི་མཐོངམ་ད་ ཁོང་རང་ངོ་ཚ་སྟེ་སྡོད་འོང་ ག་ཅི་སྨོ་ཟེར་བ་ཅིན་ ཁྱེད་ཁིརཱིས་ཀྱི་ཞབས་ཕྱིཔ་ཚུ་ཨིན།

¹⁷ དེ་བཟུམ་སྦེ་ སྡུག་བསྔལ་མྱོང་དགོཔ་འདི་ དཀོན་མཆོག་གི་ཐུགས་དགོངས་ཨིན་པ་ཅིན་ ངན་པ་འབད་དེ་སྡུག་བསྔལ་མྱོངསམ་བ་འདི་ བཟང་པོ་འབད་དེ་ སྡུག་བསྔལ་མྱོང་ནི་དེ་ལེགས་ཤོམ་ཨིན།

¹⁸ ག་ཅི་སྨོ་ཟེར་བ་ཅིན་ དུས་རྟག་པ་གི་དོན་ལུ་ སྟབས་གཅིག་སྦེ་ཁིརཱིས་ ང་བཅས་ཀྱི་སྡིག་པ་གསལ་ནིའི་དོན་ལུ་ སྡུག་བསྔལ་མྱོང་སྟེ་ ཆོས་སེམས་ཡོད་མི་དང་ སྐྱོན་མེདཔ་ཨིན་མི་དེ་གིས་ ང་བཅས་མི་ཉེས་པ་དང་སྡིག་པ་ དཀོན་མཆོག་གི་སྐུ་མདུན་ལུ་འཁྱིད་འོང་ནི་སྦེ་གཤགས་ཅི་ ཁོ་རའི་སྐུ་གཟུགས་འདི་ ཁྲམ་ཤིང་གུ་བཀྲོངས་ཏེ་འབད་རུང་ ཐུགས་ཉིད་དེ་གིས་ ཁོ་སྐུ་གསོན་པོ་བཞེངས་གནང་ཡི།

¹⁹ ཐུགས་ཉིད་ཀྱི་རྒྱུད་ལས་ ཁོང་སེམས་ཉིད་ཀྱི་བཙོན་པ་ཚུ་སྡོད་སར་བྱོན་ཏེ་ ཁོ་གིས་ཆོས་བཤད་ཅི།

²⁰ ཨ་ནི་དེ་ཚུ་ དུས་ཡུན་མང་རབས་ཅིག་གི་ཧེ་མ་ ནོ་ཝ་གིས་གྲུ་བཟོ་བའི་སྐབས་ལུ་ དཀོན་མཆོག་གིས་ཐུགས་ཁར་བཟོད་པ་བཞེས་ཏེ་སྒུག་བཞུགསཔ་ད་ དཀོན་མཆོག་གི་བཀའ་ལུ་མ་ཉན་མི་དེ་ཚུ་ཨིན་མས་ དེའི་གྲལ་ཁ་ལས་ མི་བརྒྱད་ གྲུ་ནང་འཛུལ་ཏེ་ ཆུའི་གུ་ལས་ཕར་འགྱོ་མི་ཚུ་ལུ་སྐྱབས་མཛད་ནུག

²¹ དེ་ལས་ཨ་ནི་ཆུ་གི་དཔེ་འདི་ ད་ལྟོ་ང་བཅས་ཁྲུས་གསོལ་ཞུ་སྟེ་ སྐྱབས་མཛད་མིའི་དོན་དག་འདི་དང་ གཅིག་རང་ཨིན་མས་ ཁྲུས་གསོལ་ཞུ་ནི་ཟེརཝ་ད་ གཟུགས་ཆུ་འཁྱུ་སྟེ་ དྲེག་པ་དགཔ་བཟོཝ་མེན་ དེ་འབདཝ་ད་ ཁིརཱིས་གཤགས་ས་ལས་སྐུ་གསོན་པོ་བཞེངས་གནང་མི་འདི་གིས་ དཀོན་མཆོག་གི་གཟིགས་སར་ཁྱེད་ དྲན་ཤེས་གསལ་ཏོག་ཏོ་མཛད་གནང་ཡི་ཟེར་ངོས་ལེན་འབདཝ་ཨིན།

²² ཁིརཱིས་ཞིང་ཁམས་ལུ་བྱོན་ཏེ་ དཀོན་མཆོག་གི་ཕྱག་གཡས་ཁ་ཐུག་ལུ་བཞུགས་ཏེ་ ཕོ་ཉ་ཚུ་དང་ གནམ་ཁ་གི་དབང་འཛིན་འབད་མི་ བདུད་དང་བཙན་ ག་ར་ཁོ་གི་དབང་ཚད་འོག་ལུ་ བཙུགས་ཏེ་ཡོད།།