པེ་ཏྲོ་དང་པ་ལེའུ་ 2 - རྫོང་ཁ་

¹ དེ་འབདཝ་ལས་ མགུ་བསྐོར་རྐྱབ་ནི་ ཁ་ཆོས་འབད་ནི་ ཕྲག་དོག་བསྐྱེད་ནི་ ཁ་གཏང་ནི་ སྤྱོད་ངན་འབད་ནི་ དེ་ཚུ་ག་ར་ ཁྱེད་ཀྱིས་སྤང་དགོ།

² དེ་ལས་ ཨ་ལོ་གསརཔ་སྐྱེས་མི་ལུ་ ཨོམ་རྐྱངམ་གཅིག་འཐུང་དགོཔ་བཟུམ་སྦེ་ ཁྱེད་ཡང་དཀོན་མཆོག་གི་གསུང་གི་ ཨོམ་ཉག་རྐྱང་འཐུང་ནི་གི་རེ་འདོད་བསྐྱེད་དེ་སྡོད་དགོ་ དེ་ལས་ཁྱེད་ཆ་ཁྱབ་དད་པ་ནང་ཁུག་སྟེ་ ཐར་པའི་ལམ་ནང་ཡར་རྒྱས་འགྱོ་འོང་།

³ ག་ཅི་སྨོ་ཟེར་བ་ཅིན་ གཙོ་བོ་འདི་ག་ཅི་དེས་ཅིག་ཐུགས་བརྩེ་བ་ཡོདཔ་ཨིན་ན་ ད་ཁྱེད་ཀྱིས་ཉམས་མྱོང་འབད་དེ་བལྟ་ཚརཝ་ཨིན།།

གསོན་པོའི་རྡོ་དཀོན་མཆོག་གི་མཆོད་ཁང་ཨིན་པའི་སྐོར།

⁴ ད་ཁྱེད་ཆ་ཁྱབ་ཁིརཱིས་ཀྱི་སྐུ་མདུན་ལུ་ཤོག་ མ་གཞི་ ཁིརཱིས་འདི་ མི་གིས་མ་དགོ་པར་བཀོག་བཞག་བཞག་པའི་ གསོན་པོའི་ཟུར་རྡོ་ཨིན་རུང་ དེ་དཀོན་མཆོག་གི་ཐུགས་ཁར་ བཙག་འཐུ་གནང་གནང་མིའི་ རྩ་ཆེ་ཤོས་དེ་ཨིན།

⁵ དེ་མ་ཚད་དཀོན་མཆོག་གིས་ ཁྱེད་ཡང་གསོན་པོའི་རྡོ་སྦེ་བཙུགས་གནང་སྟེ་ ཐུགས་ཉིད་ཀྱི་བཞུགས་ཁང་བཞེངས་གནང་བའི་བསྒང་རང་ཨིན་ དེ་ལས་ཁྱེད་ཆ་ཁྱབ་དམ་པའི་བླམ་སྦེ་བཀལ་གནངམ་ཨིནམ་མ་ཚད་ ཡེ་ཤུ་ཁིརཱིས་ལས་རྒྱུད་དེ་ ཁྱེད་ཀྱིས་ ཁོ་གི་ཐུགས་དགྱེས་པའི་ སེམས་ཉིད་ཀྱི་མཆོདཔ་ཕུལ་ནི་ཨིན།

⁶ ག་ཅི་སྨོ་ཟེར་བ་ཅིན་ གསུང་རབ་ནང་ལུ། ང་གིས་ ཟི་ཨཱོན་ནང་རྡོ་གཅིག་བཙུག་དོ་ རྡོ་འདི་ གདམ་ཁ་རྐྱབ་རྐྱབ་དང་ ཟུར་རྡོ་རྩ་ཅན་གཅིག་ཨིན་ ཁོ་ལུ་དད་པ་བསྐྱེད་མི་ག་ར་ཨིན་རུང་ ནམ་ཡང་བློ་ཕམ་མི་བཅུག

⁷ ད་ཁྱེད་དད་པ་བསྐྱེད་མི་ཚུ་གི་དོན་ལུ་ རྡོ་འདི་རྩ་ཅན་གཅིག་ཨིན་ དེ་འབདཝ་ད་ དད་པ་མ་བསྐྱེད་མི་ཚུ་གི་དོན་ལུ་འབད་བ་ཅིན། རྩིག་བཟོཔ་གིས་མ་དགོ་པར་ བཀོག་བཞག་མིའི་རྡོ་འདི་ ཤུལ་མ་ཟུར་རྡོ་རྩ་ཅན་ལུ་འགྱུར་ནུག

⁸ ད་རུང་། ཁོ་རྐངམ་ཐོགས་བཅུག་མིའི་རྡོ་ ཁོ་གུ་ཐོགས་ཏེ་འགྱེལ་འགྱོ་འོང་ཟེར་ དེ་སྦེ་བྲིས་ཏེ་འདུག་ ཁོང་རྐངམ་ཐོགས་དོ་ ག་ཅི་སྨོ་ཟེར་བ་ཅིན་ དཀོན་མཆོག་གི་གསུང་ལུ་མ་ཉན་ནི་འདི་གིས་ཨིན་ དེ་ལས་ཁོང་གི་དོན་ལུ་བཙག་འཐུ་མཛད་བཞག་མི་དང་ཁ་ཐུག་རྐྱབ་ཨིན།

⁹ དེ་འབདཝ་ད་ ཁྱེད་ཁོང་བཟུམ་སྦེ་མེན་ ཁྱེད་དཀོན་མཆོག་གིས་བཙག་འཐུ་མཛད་གནང་མི་དང་ རྒྱལ་འཛིན་གྱི་བླམ་ དམ་པའི་མི་རིགས་ དཀོན་མཆོག་ཁོ་རང་གི་མི་ཚུ་ཨིན་ ད་ ཁོ་གིས་ཁྱེད་ཆ་ཁྱབ་གནག་དུང་ནང་ལས་ ཡ་མཚན་ཆེ་བའི་འོད་ནང་འབོ་སྟེ་གནངམ་ལས་བརྟེན་ཏེ་ དཀོན་མཆོག་གི་ཧ་ལས་པའི་ཕྱག་ལཱ་དེ་ཚུ་གཞན་ལུ་ ཁྱེད་ཀྱིས་སྟོན་བྱིན་འོང་།

¹⁰ ཧེ་མ་ཁྱེད་དཀོན་མཆོག་གི་མི་མེན་པས་ ད་ཁྱེད་ཁོ་གི་མི་ཨིན་ ཧེ་མ་དཀོན་མཆོག་གི་སྙིང་རྗེ་ག་ནི་ཡང་མ་ཐོབ་པར་སྡོད་སྡོདཔ་ཨིན་ ད་ཁྱེད་ལུ་ཁོ་རང་གི་སྙིང་རྗེ་གིས་གཟིགས་ཏེ་རང་ཡོད།

¹¹ ངེ་གི་བྱམས་པའི་ཆ་རོགས་ཆ་ཁྱབ་ ཁྱེད་འཇིག་རྟེན་ནང་ལུ་ ཕྱི་རྒྱལ་གྱི་མི་ ཐག་རིང་ས་ལས་འོང་མིའི་མགྱོནམ་བཟུམ་ཅིག་ཨིན་ དེ་གིས་འབད་ ཁྱེད་ལུ་དགྲ་འབད་མི་སྡིག་པའི་འདོད་ཆགས་ཚུ་སྤང་དགོ་ཟེར་ང་གསོལཝ་བཏབ་ཨིན།

¹² ཁྱེད་ཀྱིས་དདཔ་ཅན་མེན་མིའི་ཁྱིམ་ཚང་ཚུ་དང་སྡོདཔ་ད་ རང་གི་བྱ་བ་སྤྱོད་ལམ་དེ་ཚུ་དྲནམ་བཏོན་ཏེ་ ལེགས་ཤོམ་འབད་དགོ་ ཁོང་གིས་ཁྱེད་ལུ་སྐྱོན་བཏགས་ཏེ་འཛོལ་བ་འབདཝ་མས་ཟེར་སླབ་རུང་ ཁྱེད་ཀྱི་བྱ་བ་སྤྱོད་ལམ་ལེགས་ཤོམ་ལུ་བལྟ་སྟེ་ ཁིརཱིས་ལོག་སྟེ་ཁྲིམས་ཕྱེ་བ་བྱོན་པའི་ཉིནམ་ལུ་ ཁོང་གིས་དཀོན་མཆོག་ལུ་བསྟོད་པ་ཕུལ་འོང་།།

གཞུང་གི་འགོ་དཔོན་ལུ་ཞེ་ས་འབད་དགོ་པའི་སྐོར།

^13-14 ག་ར་ལས་དབང་ཚད་ཡོད་མིའི་རྒྱལཔོ་འབད་རུང་ གཞུང་གི་འགོ་དཔོན་འབད་རུང་ དབང་ཚད་ག་ར་གི་འོག་ལུ་སྡོད་དགོ་ དེ་སྦེ་འབད་མི་འདི་ གཙོ་བོ་གི་དོན་ལུ་ཨིན་ ག་ཅི་སྨོ་ཟེར་བ་ཅིན་ རྒྱལཔོ་གིས་དབང་ཚད་གནང་སྟེ་བཏང་མིའི་འགོ་དཔོན་འདི་ འཛོལ་བ་འབད་མི་ ག་འབད་རུང་ མི་འདི་ལུ་ཁྲིམས་བཏང་ནི་དང་ ལཱ་ལེགས་ཤོམ་དང་ཀྲིག་ཀྲི་སྦེ་འབད་མི་ ག་འབད་རུང་ འདི་ལུ་བསྟོད་པ་བརྐྱབ་ནི་གི་དོན་ལུ་ཨིན།

¹⁵ དེ་ལས་ དཀོན་མཆོག་གི་ཐུགས་དགོངས་འདི་ཨ་ནི་ཨིན་ ཁྱེད་ཀྱིས་བྱ་བ་བཟང་པོ་འབད་བའི་ཐོག་ལས་ མི་རྩ་རྒས་ཚུ་གི་ཁུངས་མེད་པའི་བློ་ཚུ་གིས་ ཁྱེད་ལུ་སྐྱོན་བཏགས་མ་ཚུགསཔ་སྦེ་ ཁུ་སིམ་སི་བཟོ་ནི་འདི་ཨིན་མས།

¹⁶ དེ་ལས་ ཁྱེད་རྒྱོབོ་མེན་པར་ རང་དབང་རང་ཚད་ཡོད་མི་ཚུ་ཨིན་ དེ་འབདཝ་ལས་ ཁྱེད་ རང་དབང་རང་ཚད་ཡོད་མི་ཚུ་ཨིནམ་ལས་ ལཱ་ངན་པ་འབད་ནི་གི་དོན་ལུ་ ཧད་འཕུལ་ནི་མེན་པར་ དཀོན་མཆོག་གི་ཕྱག་ཞུ་སྟེ་སྡོད་དགོ།

¹⁷ དེ་ལས་ མི་ག་ར་ལུ་ཞེ་ས་འབད་དགོཔ་མ་ཚད་ དདཔ་ཅན་སྤུན་ཆ་ཚུ་ལུ་བྱམས་པ་འབད་དགོ་ དེ་ལས་དཀོན་མཆོག་ལུ་བལྟ་སྟེ་འདྲོག་ རྒྱལཔོ་ལུ་གུས་ཞབས་ཞུ།།

ཞབས་ཏོག་ཞུ་མི་དང་གཡོགཔ་གི་སྐོར།

¹⁸ དེ་ལས་ཁྱེད་ཀྱིས་གཡོག་རྒྱུག་མི་ རང་གི་སྦྱིན་བདག་གི་བཀའ་ལུ་ཉན་ཏེ་ གུས་ཞབས་དང་བཅསཔ་སྦེ་འབད་དགོ་ དེ་འབདཝ་ད་ སྦྱིན་བདག་བྱམས་བརྩེ་ཅན་དང་ལེགས་ཤོམ་རྐྱངམ་གཅིག་ལུ་མེན་པར་ སྦྱིན་བདག་གདུག་དྲགས་ཡོད་མི་ཚུ་ལུ་ཡང་ཉན་དགོ།

¹⁹ དེ་ལས་ ཁྱེད་ལུ་ཉེས་པ་ག་ནི་ཡང་མེད་རུང་ གཞན་གྱིས་ཁྱེད་ལུ་གནོད་པ་སྐྱེལ་ཏེ་སྡུག་བསྔལ་མྱོང་དགོཔ་ད་ དཀོན་མཆོག་གི་ཐུགས་དགོངས་སེམས་ཁར་དྲན་ཏེ་བཟོད་པ་བསྒོམས་ཏེ་སྡོད་པ་ཅིན་ དཀོན་མཆོག་གིས་ཁྱེད་ལུ་ཐུགས་དགྱེས་འོང་།

²⁰ མ་གཞི་ ག་དེམ་ཅིག་སྦེ་ ཁྱེད་ཀྱིས་ལཱ་འཛོལ་བ་འབད་དེ་ རོགས་ཀྱིས་ཁྱེད་ལུ་དྲང་བརྡུངམ་ད་ ཁྱེད་ཀྱིས་བཟོད་པ་སྒོམ་པ་ཅིན་ འདི་ལུ་ཧ་ལས་མི་ཚུགས་ དེ་འབདཝ་ད་ ཁྱེད་ཀྱིས་ལཱ་ལེགས་ཤོམ་འབད་དེ་ སྡུག་བསྔལ་མྱོངམ་ད་ བཟོད་པ་སྒོམ་ཚུགས་པ་ཅིན་ དཀོན་མཆོག་གིས་ཁྱེད་ལུ་ཐུགས་དགྱེས་འོང་།

²¹ ལེགས་ཤོམ་འབད་དེ་ སྡུག་བསྔལ་མྱོང་ནིའི་དོན་ལུ་ ཁྱེད་ལུ་འབོ་གནང་གནངམ་ཨིན་ ག་ཅི་སྨོ་ཟེར་བ་ཅིན་ ཁིརཱིས་ཀྱིས་ཁྱེད་ཀྱི་དོན་ལུ་སྡུག་བསྔལ་མྱོང་ཡི་ ཁིརཱིས་ཀྱི་ཞབས་རྗེས་འདི་ ཁྱེད་ཀྱི་དོན་ལུ་དཔེ་སྦེ་སྟོན་ཏེ་བཞག་ཅི་ ཁྱེད་ཀྱིས་ཁོ་གི་རྟིང་ཤུལ་བདའ་དགོཔ་ཨིན།

²² ཁིརཱིས་ཀྱིས་སྡིག་པའི་ཕྱག་ལཱ་རྩ་ལས་རང་མ་མཛད་ ཁོ་གིས་ག་ལུ་ཡང་མགུ་བསྐོར་མ་བརྐྱབས།

²³ ཁོ་ལུ་སྐྱོན་བཏགས་ཏེ་སྐུར་པ་བཏབ་མི་ལུ་ ཁོ་གིས་ལོག་སྟེ་ལན་ག་ཅི་ཡང་མ་གསུངས་ ཁོ་གིས་སྡུག་བསྔལ་མྱོང་སྟེ་འབད་རུང་ དགྲ་ལན་འཇལ་ནིའི་ཚིག་གཅིག་ཡང་མ་གསུངས་པར་ རྩོད་གཞི་འདི་ ག་ར་ཁྲིམས་ཕྲང་སྟེ་ཕྱེ་མིའི་ དཀོན་མཆོག་གི་ཕྱག་ལུ་ཕུལ་བཞག་ཅི།

²⁴ དེ་ལས་ང་བཅས་ སྡིག་པའི་དབང་ཚད་འོག་ལུ་སྡོད་ནི་བཞག་སྟེ་ དཀོན་མཆོག་གི་ཐུགས་དང་ལྡན་པའི་ཕྲངམ་སྦེ་སྡོད་ནི་གི་དོན་ལུ་ ཁིརཱིས་ཀྱིས་ང་བཅས་ཀྱི་སྡིག་པ་འདི་ ཁོ་རང་གི་སྐུ་གཟུགས་ལུ་བསྣམས་ཏེ་ ཁྲམས་ཤིང་གུ་གཤགས་ཅི་ ཁོ་གི་རྨ་གིས་ན་ཟུག་ལས་འབད་ ཁྱེད་ལུ་དྲགཔ་མཛད་ཅི།

²⁵ ཧེ་མ་ཁྱེད་ཆ་ཁྱབ་ལུག་བཟུམ་སྦེ་ བྱང་སྟོར་ཞུགས་མི་ཨིན་རུང་ ད་ལྟོ་ལོག་སྟེ་ ཁྱེད་རང་གི་ལུག་རྫིཔ་དང་ བདག་འཛིན་པ་བཞུགས་སར་ལྷོད་ཅི།།