ཀོ་རཱིན་ཐི་དང་པ་ལེའུ་ 7 - རྫོང་ཁ་

གཉེན་གྱི་སྐོར།

¹ ད་ཁྱེད་ཀྱིས་དྲི་བའི་ལོ་རྒྱུས་ཀྱི་ལན་ལུ་ ཁྱེད་ཀྱིས་འབད་བ་ཅིན་ ཕོ་སྐྱེས་ཀྱིས་ཨམ་སྲུ་དང་ལུས་འབྲེལ་མ་འབད་བ་ཅིན་ ལེགས་ཤོམ་འོང་ཟེར་སླབ་མས།

² དེ་འབདཝ་ད་ འདོད་སྤྱོད་ཀྱི་ལཱ་ཚུ་གནམ་མེད་ས་མེད་ཡོདཔ་ལས་བརྟེན་ཏེ་ ཕོ་སྐྱེས་རང་གི་ཨམ་སྲུ་དང་གཅིག་ཁར་སྡོད་དགོཔ་མ་ཚད་ ཨམ་སྲུ་གིས་ཡང་ རང་གི་རྨགཔ་དང་གཅིག་ཁར་སྡོད་དགོ།

³ རྨགཔ་གིས་ཁོ་རའི་ཨམ་སྲུ་དང་ ཨམ་སྲུ་གིས་མོ་རའི་རྨགཔ་གི་བར་ནང་ ལུས་འབྲེལ་གྱིས་འོས་འབབ་ཚུ་ཨོ་ཏོག་ཏོ་སྦེ་བཞག་དགོཔ་ཨིན།

⁴ ཨམ་སྲུ་མོ་རའི་གཟུགས་ མོ་རའི་རྨགཔ་རྐྱངམ་གཅིག་མ་གཏོགས་ མོ་རང་ལུ་དབང་ཚད་མེད་ འདི་བཟུམ་སྦེ་རྨགཔ་གི་གཟུགས་ཡང་ ཁོ་རའི་ཨམ་སྲུ་མ་གཏོགས་ ཁོ་རང་ལུ་ཡང་དབང་ཚད་མེདཔ་ཨིན།

⁵ རྨགཔ་དང་ཨམ་སྲུ་གཉིས་ཆ་རང་ བསྟུན་གྲོས་བརྐྱབས་ཞིནམ་ད་ སྐབས་གཅིག་གི་དོན་ལུ་སོ་སོ་སྦེ་ སྨོན་ལམ་ནང་སྡོད་ནི་གི་དོན་ལུ་མ་གཏོགས་ གཅིག་དང་གཅིག་ལུ་བྱིན་དགོ་པའི་དུས་ཚོད་ཁས་ལེན་མེད་པར་མ་སྡོད་ ཁྱེད་ཀྱིས་རང་སེམས་རང་གིས་སྲུང་མ་ཤེས་ནི་དེ་གིས་ སྨོན་ལམ་ནང་སྡོད་ཞིནམ་ད་ བདུད་ སེ་ཏཱན་གྱི་བར་ཆད་ནང་མ་ཚུད་པའི་དོན་ལུ་ ཁྱེད་རང་གཉིས་ད་རུང་ལོག་སྟེ་བསྡོམ་དགོ།

⁶ དེ་ང་གིས་ཁྱེད་ལུ་བཀའ་རྒྱ་བྱིནམ་མེན་པར་ གནང་བ་སྤྲོདཔ་ཨིན།

⁷ མི་ག་ར་ང་བཟུམ་སྦེ་ གཉེན་མ་རྐྱབ་པར་སྡོད་ཚུགས་པ་ཅིན་དགའ་ནི་མས་ དེ་འབདཝ་ད་མི་རེ་རེ་ལུ་ དཀོན་མཆོག་ལས་གསོལ་རས་ མ་གཅིགཔ་མ་འདྲཝ་སྦེ་ཐོབ་ཡོདཔ་ཨིན།

⁸ དེ་འབདཝ་ད་ གཉེན་མ་རྐྱབ་མི་དང་ཡུགས་ས་མོ་ཚུ་ལུ་ ང་གིས་སླབ་དོ་ ཁྱེད་ཆ་ཁྱབ་ང་བཟུམ་སྦེ་གཉེན་མ་རྐྱབ་པར་སྡོད་པ་ཅིན་ ཁྱེད་ཀྱི་དོན་ལུ་ལེགས་ཤོམ་འབྱུང་ནི་ཨིན།

⁹ དེ་འབདཝ་ད་ ཁོང་གིས་རང་ལུ་ འདོད་ཆགས་ཀྱིས་བཀག་ཐབས་འབད་མ་ཚུགས་པ་ཅིན་ ཁོང་གཉེན་བརྐྱབ་དགོ་ འདོད་ཆགས་ཀྱིས་གང་སྦེ་སྡོདཔ་བ་འདི་ གཉེན་བརྐྱབ་ནི་དེ་དྲག་འོང་།

¹⁰ ད་ང་གིས་གཉེན་རྐྱབ་ཚར་མི་ཚུ་ལུ་བཀའ་རྒྱ་བྱིན་དོ་ བཀའ་རྒྱ་དེ་ང་ལས་མེན་པར་ གཙོ་བོ་གི་བཀའ་རྒྱ་ཨིན་ ཨམ་སྲུ་རྨགཔ་ལས་ཁ་འབྱལ་འགྱོ་མ་བཅུག

¹¹ དེ་འབདཝ་ད་ ག་དེམ་ཅིག་སྦེ་ མོ་རའི་རྨགཔ་དང་ཁ་འབྱལ་འགྱོ་བ་ཅིན་ མོ་རང་རྐྱངམ་གཅིག་སྦེ་སྡོད་དེ་ གཞན་དང་གཉེན་རྐྱབ་ནི་མི་འོང་ དེ་ལས་གཅིག་སྦེ་སྡོད་མ་ཚུགས་པ་ཅིན་ མོ་རའི་རྨགཔ་དང་འཆམ་ཁ་བཟོ་ཞིནམ་ད་ གཅིག་ཁར་མཐུན་སྡོད་དགོ་ རྨགཔ་གིས་རང་གི་ཨམ་སྲུ་དང་ཁ་འབྱལ་འགྱོ་ནི་མི་འོང་།

¹² ཁྱེད་གཞན་ཚུ་ལུ་ གཙོ་བོ་ལས་མེན་པར་ ང་རང་ལས་ཁྱེད་ལུ་བསླབ་བྱ་བཟུམ་ཅིག་སྦེ་སླབ་ཨིན་ དདཔ་ཅན་སྤུན་ཆ་གཅིག་ལུ་ དད་པ་མ་བསྐྱེད་མི་ཨམ་སྲུ་ཡོད་པ་ཅིན་ མོ་རང་ཁོ་དང་སྡོད་ནི་སེམས་ཡོད་པ་ཅིན་ ཁོ་གིས་མོ་དང་ཁ་འབྱལ་འགྱོ་ནི་མི་འོང་།

¹³ འདི་བཟུམ་སྦེ་རང་ དདཔ་ཅན་ཨམ་སྲུ་གཅིག་ལུ་དད་པ་མ་བསྐྱེད་མི་རྨགཔ་ཡོདཔ་ད་ ཁོ་ཨམ་སྲུ་དང་གཅིག་ཁ་རང་ སྡོད་ནིའི་སེམས་ཡོད་པ་ཅིན་ མོ་གིས་ཁོ་དང་ཁ་འབྱལ་འགྱོ་ནི་མི་འོང་།

¹⁴ ག་ཅི་སྨོ་ཟེར་བ་ཅིན་ དད་པ་མ་བསྐྱེད་མིའི་རྨགཔ་དེ་ རང་གི་ཨམ་སྲུ་གི་ཐོག་ལས་རྣམ་པར་དག་ཏོག་ཏོ་སྦེ་འགྱོ་ནི་ཨིན་ དེ་ལས་དད་པ་མ་བསྐྱེད་མིའི་ཨམ་སྲུ་དེ་ རང་གི་རྨགཔ་གི་ཐོག་ལས་རྣམ་པར་དག་ཏོག་ཏོ་སྦེ་འགྱོ་ནི་ཨིན་ འདི་མེན་པ་ཅིན་ཁྱེད་ཀྱི་ ཨ་ལོ་ཚུ་མ་པ་གཙངམ་ཡོད་རུང་མ་གཙངམ་འགྱུར་འོང་།

¹⁵ དེ་འབདཝ་ད་ དད་པ་མ་བསྐྱེད་མི་དེ་ཁ་འབྱལ་འགྱོ་ནི་དགའ་བ་ཅིན་འགྱོ་བཅུག་ ག་ཅི་སྨོ་ཟེར་བ་ཅིན་ དདཔ་ཅན་གྱི་རྨགཔ་ཡང་ན་ཨམ་སྲུ་ལུ་ ཨ་ནི་བཟུམ་གནས་སྟངས་ཚུ་གིས་དབང་སྟེ་མེད་ དཀོན་མཆོག་གིས་ ང་བཅས་ལུ་ཞི་བདེ་ནང་སྡོད་ནིའི་དོན་ལུ་འབོ་གནང་ཡི།

¹⁶ དབའེ་ཁྱེད་ཨམ་སྲུ་ཆ་ཁྱབ་ ཁྱེད་ཀྱི་ཐོག་ལས་ཁྱེད་རང་གི་རྨགཔ་ སྐྱབས་འབད་འོང་ག་མི་འབད་ག་ཟེར་ཁྱེད་ཀྱིས་ག་དེ་སྦེ་ཤེསཔ་ ཡང་ན་ཁྱེད་རྨགཔ་ཆ་ཁྱབ་ ཁྱེད་ཀྱི་ཐོག་ལས་ཁྱེད་རང་གི་ཨམ་སྲུ་ སྐྱབས་འབད་འོང་ག་མི་འབད་ག་ཟེར་ཁྱེད་ཀྱིས་ག་དེ་སྦེ་ཤེས་ནི་སྨོ།།

ཁག་ཆེ་ཤོས་དེ་དཀོན་མཆོག་གི་བཀའ་ཉན་ནི་ཨིན།

¹⁷ ཁྱེད་རེ་རེ་གིས་ ཁྱེད་རའི་མི་ཚེ་ནང་ལུ་ གཙོ་བོ་གིས་ག་གནང་མི་དང་ དཀོན་མཆོག་གིས་ག་ཅི་གི་དོན་ལུ་འབོ་ཡོདཔ་ཨིན་ན་ འདི་དང་བསྟུན་ཏེ་སྡོད་དགོ་ཟེར་ ང་གིས་ཆོས་ཚོགས་ག་ར་གི་དོན་ལུ་ ཆོས་ཁྲིམས་དེ་བཞགཔ་ཨིན།

¹⁸ ད་ག་དེམ་ཅིག་སྦེ་ མི་གཅིག་ལུ་དཀོན་མཆོག་གིས་མ་འབོ་པའི་ཧེ་མ་ ལུས་ལུ་རྟགས་བཀལ་འཐོན་སོང་པ་ཅིན་ ཁོ་གིས་ད་རུང་རྟགས་མ་བཀལཝ་སྦེ་བཟོ་མི་དགོ་ དེ་ལས་ད་རུང་ དད་པ་ནང་མ་འོང་པའི་ཧེ་མ་རྟགས་མ་བཀལ་མི་ཆ་ཁྱབ་ རྟགས་བཀལ་དགོ་ཟེར་མེད།

¹⁹ མི་དེ་ལུས་ལུ་རྟགས་བཀལ་རུང་མ་བཀལ་རུང་ དེ་ཁག་ཆེཝ་མིན་འདུག་ དེ་འབདཝ་ད་ ཁག་ཆེ་ཤོས་དེ་དཀོན་མཆོག་གི་བཀའ་ཉན་ནི་ཨིན།

²⁰ ཧེ་མ་ཁྱེད་རེ་རེ་ལུ་ དཀོན་མཆོག་གིས་ག་ཅི་གི་དོན་ལུ་འབོ་གནང་ཡོདཔ་ཨིན་ན་ འདི་དང་བསྟུན་ཏེ་སྡོད།

²¹ ཁྱོད་ལུ་འབོ་པའི་སྐབས་ལུ་ ཁྱོད་རྒྱོབོ་སྦེ་སྡོད་སྡོདཔ་ཨིན་ན་ འདི་ལུ་སྣང་དག་མ་བསྐྱེད་ དེ་འབདཝ་ད་ འདི་ལས་ཐར་ཚུགས་པ་ཅིན་ འཐོན་འགྱོ་རུང་ལེགས་ཤོམ་འོང་།

²² ག་ཅི་སྨོ་ཟེར་བ་ཅིན་ གཙོ་བོ་ནང་འབོ་པའི་སྐབས་ལུ་ རྒྱོབོ་སྦེ་སྡོད་མི་དེ་ ད་གཙོ་བོ་གི་རང་དབང་ཡོད་པའི་མི་ལུ་འགྱུར་ཡི་ འདི་བཟུམ་སྦེ་རང་ ཧེ་མ་གཙོ་བོ་གིས་འབོ་པའི་སྐབས་ལུ་ རང་དབང་ཡོད་པའི་མི་ཨིན་པ་ཅིན་ ད་མི་དེ་ཁིརཱིས་ནང་རྒྱོབོ་ལུ་འགྱུར་ཡི།

²³ ཁྱེད་ཆ་ཁྱབ་རིན་གོང་སྦོམ་བྱིན་ཏེ་ ཉོ་ཉོཝ་ཨིནམ་ལས་ མི་དེ་ཚུ་གི་རྒྱོབོ་རྒྱམོ་སྦེ་མ་སྡོད།

²⁴ དེ་འབདཝ་ལས་ངེ་གི་སྤུན་ཆ་ཚུ་ ཧེ་མ་ཁྱེད་རེ་རེ་ལུ་ ག་ཅི་གི་དོན་ལུ་གཙོ་བོ་གིས་འབོ་གནང་ཡི་ག་ འདི་དང་བསྟུན་ཏེ་དཀོན་མཆོག་གི་སྐུ་མདུན་ལུ་སྡོད།།

གཉེན་མ་རྐྱབ་མི་དང་ཡུགས་ས་མོ་ཚུ་གི་སྐོར།

²⁵ ད་གཉེན་མ་རྐྱབ་མི་ཚུ་གི་སྐོར་ལས་ གཙོ་བོ་ལས་བཀའ་རྒྱ་ང་ལུ་ག་ནི་ཡང་མེད་ དེ་འབདཝ་ད་ ང་གཙོ་བོ་གི་སྙིང་རྗེ་གི་ཐོག་ལས་ བློ་གཏད་ཚུགས་པའི་མི་གཅིག་ཨིནམ་ལས་ ང་གིས་ཁྱེད་ལུ་བསྟུན་གྲོས་བཟུམ་སྦེ་སླབ་ཨིན།

²⁶ ད་རེས་ནངས་པ་གི་དུས་ཚོད་དེ་ ལེགས་ཤོམ་མེད་ནི་འདི་གིས་ ཁྱེད་ཆ་ཁྱབ་ཧེ་མ་ག་ཨིནམ་བཟུམ་སྦེ་རང་སྡོད་ཚུགས་པ་ཅིན་ དྲག་འོང་ཟེར་ ང་མནོ་བསམ་གཏངམ་ཨིན།

²⁷ ཁྱོད་གཉེན་བརྐྱབས་ཏེ་ཨམ་སྲུ་ཡོད་པ་ཅིན་ མོ་དང་ཁ་འབྱལ་འགྱོ་ནི་མནོ་བསམ་མ་གཏང་ ཁྱོད་གཉེན་མ་རྐྱབ་པར་ཡོད་པ་ཅིན་ཨམ་སྲུ་མ་འཚོལ།

²⁸ དེ་འབདཝ་ད་ ཁྱོད་གཉེན་རྐྱབ་རུང་ཉེས་པ་མེད་ བུམོ་ན་ཆུངམ་གིས་གཉེན་རྐྱབ་པ་ལུ་ཉེས་པ་མེད་ ཨིན་རུང་ གཉེན་རྐྱབ་མི་ཚུ་གིས་ མི་ཚེ་འདི་ནང་ལུ་དཀའ་ངལ་མྱོང་དགོ་ དེ་གིས་འབད་ཁྱེད་ལུ་ཨ་ནི་དེ་ཚུ་ལས་ སྐྱབས་འབད་ནི་གི་འདོད་པ་ང་ལུ་ཡོད།

²⁹ དབའེ་སྤུན་ཆ་ཚུ་ ང་གིས་སླབ་མིའི་དོན་དག་དེ་ ད་དུས་ཚོད་གངམ་མེདཔ་ལས་བརྟེན་ཏེ་ གཉེན་རྐྱབ་ཚར་མི་ག་ར་ཨིན་རུང་ རང་གི་ཨམ་སྲུ་ལུ་རྐྱངམ་གཅིག་ གཙོ་བོ་བསྟེན་ཏེ་སྡོད་ནི་མི་འོང་།

³⁰ མྱ་ངན་འབད་མི་ཆ་ཁྱབ་ མྱ་ངན་མེདཔ་བཟུམ་སྦེ་སྡོད་དགོཔ་མ་ཚད་ དགའ་སྤྲོ་འགྱུར་མི་ཆ་ཁྱབ་ དགའ་སྤྲོ་མ་འགྱུར་མི་ཚུ་བཟུམ་སྦེ་སྡོད་དགོ་ ཉོ་ཚོང་འཐབ་མི་ཚུ་ ཅ་ལ་ཉོ་སྟེ་སྦེ་རུང་ དེ་ཁོང་རང་གི་མེནམ་བཟུམ་སྦེ་སྡོད་དགོ།

³¹ འཛམ་བུ་གླིང་གི་རྒྱུ་ཅ་ལ་ཚུ་ལག་ལེན་འཐབ་མི་ཚུ་གིས་ ད་དེ་ཚུ་ནང་འདོད་པ་རྩ་ལས་རང་མེདཔ་སྦེ་སྡོད་དགོ་ ག་ཅི་སྨོ་ཟེར་བ་ཅིན་ ད་རེས་ནངས་པ་ འཛམ་བུ་གླིང་གི་བཟོ་རྣམ་ཡལ་འགྱོ་དོ།

³² ཁྱེད་ག་ར་ཚ་གྱང་མ་ལང་པར་སྡོད་བཅུག་ནིའི་འདོད་པ་ང་ལུ་ཡོད་ གཉེན་མ་རྐྱབ་པར་སྡོད་མི་དེ་གིས་ ག་དེ་སྦེ་གཙོ་བོ་གི་ཕྱག་ཞུ་ནི་ཨིན་ན་ཟེར་གཙོ་བོ་བསྟེན་ཏེ་ གཙོ་བོ་གི་ཐུགས་དགྱེས་བཅུགས་ནི་སྦེ་སྡོདཔ་ཨིན།

³³ དེ་འབདཝ་ད་ ཨམ་སྲུ་ཡོད་མི་རྨགཔ་གིས་ འཇིག་རྟེན་པའི་འགན་ཁུར་འདི་ཚུ་འབག་སྟེ་ ཁོ་རའི་ཨམ་སྲུ་ལུ་སེམས་དགའ་བཅུག་ནི་སྦེ་སྡོདཔ་ཨིན།

³⁴ ཨ་ནི་བཟུམ་གྱི་མི་ ཁོ་རའི་སེམས་དེ་ འདོད་པ་གཉིས་ལུ་གཏང་སྡོད་འོང་ གཉེན་མ་རྐྱབ་མི་ཨམ་སྲུ་དང་ བུམོ་ན་ཆུངམ་ མོ་རང་གི་ལུས་དང་སེམས་ཉིད་ནང་ཡང་ ག་དེ་སྦེ་གཙངམ་སྦེ་སྡོད་ནི་འཚོལ་ཏེ་ གཙོ་བོ་གི་ཕྱག་ཞུཝ་ཨིན་ དེ་འབདཝ་ད་ རྨགཔ་ཡོད་མི་ཨམ་སྲུ་གིས་ འཇིག་རྟེན་པའི་འགན་ཁུར་འདི་ཚུ་འབག་སྟེ་ མོ་རའི་རྨགཔ་ལུ་སེམས་དགའ་བཅུག་ནི་སྦེ་སྡོདཔ་ཨིན།

³⁵ ང་གིས་དེ་སྦེ་སླབ་ད་ ཁྱེད་ལུ་བཀག་རྐྱབ་མེན་པར་ ཁྱེད་ཀྱི་ཕན་ཐོགས་པའི་དོན་ལུ་སླབ་དོ་ འདི་གིས་འབད་ ཁྱེད་དོན་དག་གཞན་གྱི་དོན་ལུ་ སྣང་དག་མ་བསྐྱེད་པར་ ཁྱེད་སེམས་གཅིག་སྦེ་ གཙོ་བོ་ལུ་དམ་ཚིག་བསྟེན་ཏེ་ འབད་སྤྱོད་ལེགས་ཤོམ་སྒྲིག་སྡོད་བཅུག་ནིའི་འདོད་པ་ང་ལུ་ཡོད།

³⁶ མི་ག་ར་འབད་རུང་ ཨ་པ་གིས་རང་གི་བུམོ་ན་ཆུངམ་དེ་ལུ་ གཉེན་གྱི་ཁ་ཚིག་བྱིན་མ་བཏུབ་པའི་བར་ན་ བུམོ་འདི་ གཉེན་རྐྱབ་ནིའི་ལོ་ཚད་ལས་ རྒས་སོང་པ་ལས་ ཁོ་གིས་མནོ་ལོག་བསྐྱེད་དེ་ ད་རུང་བུམོ་ན་ཆུངམ་འདི་ལུ་ཉེན་བརྐྱབ་ནིའི་སེམས་ཡོད་པ་ཅིན་ གཉེན་གྱི་ཁ་ཚིག་བྱིན་རུང་བཏུབ་པས་ འདི་ཉེས་པ་མེན།

³⁷ དེ་འབདཝ་ད་ མི་དེ་གིས་རང་གི་བུམོ་ན་ཆུངམ་ལུ་ གཉེན་གྱི་ཁ་ཚིག་བྱིན་ནི་ཨིན་ན་ མ་བྱིན་ནི་ཨིན་ན་ ཁོ་ར་གི་ལག་པ་ཨིན་ ག་དེ་སྦེ་འབད་རུང་ ཁོ་གིས་གཉེན་གྱི་ཁ་ཚིག་ མི་བྱིན་ནིའི་སེམས་ཐག་བཅད་དེ་འབད་བ་ཅིན་ ཁོ་གིས་འབད་མི་དེ་ ལེགས་ཤོམ་ཨིན།

³⁸ འདི་བཟུམ་སྦེ་ ཁོ་རའི་བུམོ་ན་ཆུངམ་ལུ་ གཉེན་གྱི་ཁ་ཚིག་བྱིན་ནི་དེ་ཡང་ལེགས་ཤོམ་ཨིན་ དེ་འབདཝ་ད་ དྲག་ཤོས་དེ་ གཉེན་གྱི་ཁ་ཚིག་མ་བྱིན་པར་ སྡོད་ཚུགས་པ་ཅིན་ དེ་ལེགས་ཤོམ་ཨིན།

³⁹ རྨགཔ་དེ་མ་ཤི་བར་དུ་ ཨམ་སྲུ་དེ་རྨགཔ་གི་དབང་ཚད་འོག་ལུ་སྡོད་དགོཔ་ཨིན་ རྨགཔ་དེ་ཤི་སོང་པ་ཅིན་ ཤུལ་ལས་མོ་རང་ག་དགའ་མི་དང་གཅིག་ཁར་ གཉེན་རྐྱབ་ནི་གི་རང་དབང་ཐོབ་ཨིན་ དེ་འབདཝ་ད་ མི་དེ་གཙོ་བོ་ལུ་དད་པ་བསྐྱེད་མི་གཅིག་དགོ།

⁴⁰ དེ་འབདཝ་ད་ ང་གིས་འབད་བ་ཅིན་ མོ་གཉེན་མ་རྐྱབ་པར་སྡོད་པ་ཅིན་ གཉེན་རྐྱབ་ནི་ལས་ཡང་ལྷག་སྟེ་ དགའ་ཚོར་ཐོབ་འོང་ ང་གིས་དེ་སྦེ་སླབ་ད་ དཀོན་མཆོག་གི་ཐུགས་ཉིད་ཀྱིས་དེ་ང་ལུ་སྟོན་གནང་ཡི་ཟེར་ཡིད་ཆེས་བསྐྱེད་དེ་ ཁྱེད་ལུ་ཡང་བསླབ་བྱ་དེ་བྱིན་དོ།།