ཀོ་རཱིན་ཐི་དང་པ་ལེའུ་ 6 - རྫོང་ཁ་

དདཔ་ཅན་གཅིག་གིས་གཅིག་ལུ་ཁྲིམས་ཁང་ནང་འཁྱིད་མ་བཏུབ་པའི་སྐོར།

¹ ཁྱེད་ཀྱི་གྲལ་ཁ་ལུ་ མི་གཅིག་གིས་ཆོས་ཚོགས་ཀྱི་སྤུན་ཆ་གཅིག་དང་ འཐབ་འཛིང་བྱུང་སྟེ་ རྩོད་གཞི་ཕྱེ་དགོཔ་ཐལཝ་ད་ དཀོན་མཆོག་ཁོ་རའི་དམ་པའི་མི་ཚུ་ཡོད་སར་མ་འགྱོ་བར་ ཆོས་སེམས་མེད་མི་ཚུ་འབད་སར་ག་ཅི་འབད་ཁྱིད་འགྱོཝ་སྨོ།

² དཀོན་མཆོག་གི་དམ་པའི་མི་ཚུ་གིས་ འཛམ་བུ་གླིང་གི་མི་ཚུ་ལུ་ ཉིནམ་གཅིག་གི་ཚེ་ཁྲིམས་དཔྱད་ནི་ཨིན་ཟེར་ཁྱེད་ཀྱིས་མ་ཤེས་ག་ ཁྱེད་མི་ཚུ་གི་ཁྲིམས་དཔྱད་མི་འབད་བ་ཅིན་ འདི་བཟུམ་གྱི་རྩོད་གཞི་ཆུང་ཀུ་ཅིག་ཡང་ ཁྱེད་ཀྱིས་ཕྱེ་མི་ཚུགས་ག།

³ མ་འོང་པའི་དུས་ལུ་ ང་བཅས་ཀྱིས་ཕོ་ཉ་ཚུ་ལུ་ ཁྲིམས་ཕྱེ་ནི་ཨིན་ཟེར་ཁྱེད་ཀྱིས་མ་ཤེས་ག་ དེ་སྦེ་ཨིན་པ་ཅིན་ ཐད་རི་བ་རི་རང་ ད་ལྟོ་གི་ཚེ་འདི་ནང་གི་ཉོགས་འཛིན་ཚུ་ཡང་ ང་བཅས་ཀྱིས་ཁྲིམས་ཕྱེ་ཚུགས།

⁴ འདི་བཟུམ་གྱི་རྩོད་གཞི་ཁྱེད་ཀྱི་སྦུག་ལུ་ཡོད་པ་ཅིན་ ཆོས་ཚོགས་ཀྱིས་བརྩི་མཐོང་མ་བསྐྱེད་མི་ཚུ་ལུ་ ག་ཅི་འབད་ཁྲིམས་ཕྱེ་བཅུགཔ་སྨོ།

⁵ ཁྱེད་ལུ་ངོ་ཚ་བཅུག་ནིའི་དོན་ལུ་ ང་གིས་དེ་སྦེ་སླབ་དོ་ ཁྱེད་ཆ་ཁྱབ་ཀྱི་སྦུག་ལུ་ཨ་ནི་བཟུམ་གྱི་རྩོད་གཞི་འཐོནམ་ད་ དེ་ནང་ལུ་ ཁ་འགྲིགས་ཏེ་བྱིན་ཚུགས་མི་ཤེས་རབ་ཅན་ག་ཡང་ ཁྱེད་ཀྱི་སྦུག་ལུ་མེདཔ་འོང་ག།

⁶ འདི་གི་ཚབ་ལུ་ ཁོང་དདཔ་མ་བསྐྱེད་མི་ཚུ་གི་གདོང་ཁར་ ཁྱེད་དདཔ་ཅན་སྤུན་ཆ་གཅིག་གིས་གཅིག་ལུ་ ཁྲིམས་སར་སྐྱེལཝ་ཨིན་མས།

⁷ དེ་བཟུམ་སྦེ་ ཁྲིམས་ཁང་ནང་སླབ་གཞི་རྐྱབ་ད་ ཕམ་ཤོས་ཁྱེད་རང་ཨིན་ དེ་བ་འདི་རྫུན་ཁ་རང་གིས་འབག་སྟེ་སྡོདཔ་མི་དྲག་ག་ ཡང་ན་ རོགས་ཀྱི་མགུ་འབྱིད་ནང་བཟོད་པ་བསྒོམ་སྡོདཔ་དྲག་མེན་ན།

⁸ དེ་འབདཝ་ད་ ཁྱེད་ ཁྱེད་རང་གི་རང་ དདཔ་ཅན་སྤུན་ཆ་ཚུ་ལུ་ ཁྱེད་རང་གིས་གནོད་པ་བཀལཝ་མ་ཚད་ ཁོང་ལུ་མགུ་འབྱིད་ནང་ཡང་བཙུགསཔ་མས།

⁹ མི་ངན་པ་ཚུ་གིས་ དཀོན་མཆོག་གི་རྒྱལ་སྲིད་ཀྱི་བགོ་བཤའ་མི་ཐོབ་ཟེར་ཁྱེད་ཀྱིས་མི་ཤེས་ག་ མགུ་འབྱིད་ནང་མ་ཚུད་པར་སྡོད་ འདོད་སྤྱོད་ཀྱི་སྡིག་པ་འབད་མི་ཚུ་ སྐུ་ལུ་མོས་མི་ཚུ་ གཉེན་ལས་འགལ་བའི་ལུས་འབྲེལ་འབད་མི་ཚུ་ ཁོང་རང་ཕོ་སྐྱེས་ནང་འཁོད་ལུས་འབྲེལ་འབད་མི་ཚུ།

¹⁰ ཨརཝ་རྐུ་མི་ འདོདཔ་ཆེ་དྲགས་འབད་མི་ ཆང་ཟེ་ དམའ་ཕབ་རྐྱབ་མི་དང་ མགུ་སྐོར་རྐྱབ་མི་དེ་ཚུ་ དཀོན་མཆོག་གི་རྒྱལ་སྲིད་ཀྱི་བགོ་བཤའ་མི་ཐོབ།

¹¹ ཁྱེད་ཀྱི་གྲལ་ལས་ལ་ལུ་ཅིག་ཨ་ནི་བཟུམ་སྦེ་སྡོད་དེ་སྦེ་རུང་ ད་ལྟོ་ཁྱེད་གཙོ་བོ་ཡེ་ཤུ་ཁིརཱིས་ཀྱི་མཚན་ནང་ ང་བཅས་ཀྱི་དཀོན་མཆོག་གི་ཐུགས་ཉིད་ཀྱི་ཐོག་ལས་ ཁྱེད་ལུ་ཆུ་བཤལ་བརྐྱབས་ཏེ་ གཙང་ཏོག་ཏོ་དང་ཡང་དག་པ་བཟོ་སྟེ་ཡོད་ དེ་མ་ཚད་ ཁྱེད་དཀོན་མཆོག་ནང་བདེན་པ་ཟངས་ཡི།།

དདཔ་ཅན་གྱི་གཟུགས་དེ་གཙོ་བོ་གི་དོན་ལུ་ཨིན་པའི་སྐོར།

¹² ལ་ལུ་གིས་ ང་གིས་ག་ར་འབད་ཆོག་ཟེར་སླབ་མས་ ཨིན་རུང་ དེ་ཚུ་ག་ར་ང་ལུ་ཕན་ཐོགས་མེད་ཟེར་ང་གིས་ཞུཝ་ཨིན་ ད་རུང་ ང་གིས་ག་ར་འབད་ཆོག་ཟེར་སླབ་ནི་ཡོད་རུང་ དབང་ཚད་ག་ཅི་གི་འོག་ལུ་ཡང་ ང་གིས་འགྱོ་ནི་མི་འོང་ཟེར་ང་གིས་ཞུཝ་ཨིན།

¹³ ལ་ལུ་གིས་ བཞེས་སྒོ་དེ་ཕོཝ་གི་དོན་ལུ་དང་ཕོཝ་དེ་བཞེས་སྒོ་གི་དོན་ལུ་ཨིན་ཟེར་སླབ་མས་ མ་པ་ དཀོན་མཆོག་གིས་དེ་གཉིས་ཆ་རང་རྩ་མེད་མཛད་འོང་ ཨིན་རུང་ ང་བཅས་ཀྱི་གཟུགས་དེ་འདོད་སྤྱོད་ངན་པ་གི་དོན་ལུ་མེན་ དེ་འབདཝ་ད་ གཟུགས་དེ་གཙོ་བོ་གི་དོན་ལུ་དང་ གཙོ་བོ་གཟུགས་ཀྱི་དོན་ལུ་ཨིན།

¹⁴ དེ་ལས་དཀོན་མཆོག་གིས་ཁོ་རའི་སྟོབས་ཤུགས་ཀྱིས་ གཙོ་བོ་ལུ་གསོན་པོ་བཞེངས་གནང་ཡི་ དེ་བཟུམ་སྦེ་ང་བཅས་ལུ་ཡང་ ཁོ་གི་སྟོབས་ཤུགས་ཀྱིས་གསོན་པོ་ལྷོང་གནང་འོང་།

¹⁵ ཁྱེད་ཀྱི་གཟུགས་ཁིརཱིས་ཀྱི་ཡན་ལག་ཨིནམ་ཁྱེད་ཀྱིས་མི་ཤེས་ག་ དེ་འབདཝ་ལས་ང་གིས་ཁིརཱིས་ཀྱི་ཡན་ལག་ལུ་ གཞང་བཙོངམ་དང་བསྡོམ་བཅུག་འོང་ག་ འདི་རྩ་ལས་མི་འབད།

¹⁶ གཞང་བཙོངམ་དང་བསྡོམ་མི་དེ་ མོ་དང་གཅིག་ཁར་གཟུགས་གཅིག་ལུ་འགྱུརཝ་ཨིན་ཟེར་ཁྱེད་ཀྱིས་མི་ཤེས་ག་ ག་ཅི་སྨོ་ཟེར་བ་ཅིན་ གསུང་རབ་ནང་ ཁོང་གཉིས་ཤ་གཟུགས་གཅིག་སྦེ་འགྱུར་ཡི་ཟེར་བྲིས་ཏེ་ཡོད།

¹⁷ དེ་འབདཝ་ད་ གཙོ་བོ་དང་གཅིག་ཁར་བསྡོམ་མི་དེ་ གཙོ་བོ་གི་ཐུགས་ཉིད་དང་གཅིག་སྦེ་འགྱུར་ནི་ཨིན།

¹⁸ དེ་འབདཝ་ལས་འདོད་སྤྱོད་ཀྱི་ལཱ་ལས་བྱོག་སྟེ་སྡོད་ མི་གིས་འབད་མི་སྡིགཔ་ག་ཅི་རང་འབད་རུང་ འདི་གཟུགས་ཀྱི་ཕྱི་ཁར་འབདཝ་ཨིན་ དེ་འབདཝ་ད་ འདོད་སྤྱོད་འབད་མི་གིས་ རང་གི་གཟུགས་ལུ་སྡིག་པ་འབདཝ་ཨིན།

¹⁹ ཁྱེད་ཀྱི་གཟུགས་དེ་དམ་པའི་ཐུགས་ཉིད་ཀྱི་བཞུགས་ཁང་ཨིན་ དམ་པའི་ཐུགས་ཉིད་དེ་ ཁྱེད་ཀྱིས་དཀོན་མཆོག་ལས་ཐོབ་ཐོབ་ཨིནམ་མ་ཚད་ ཁོ་ཁྱེད་ཀྱི་ནང་ན་བཞུགསཔ་ཨིན་ཟེར་མི་ཤེས་ག་ ཁྱེད་ཀྱི་གཟུགས་དེ་ཁྱེད་རང་གི་མེན།

²⁰ རིན་གོང་སྦོམ་སྤྲོད་དེ་ཁྱེད་ཆ་ཁྱབ་ཉོ་ཉོཝ་ཨིན་ དེ་འབདཝ་ལས་ཁྱེད་ཀྱི་གཟུགས་ཀྱི་ཐོག་ལས་ དཀོན་མཆོག་ལུ་གུས་ཞབས་ཕུལ་དགོ།།