ཀོ་རཱིན་ཐི་དང་པ་ལེའུ་ 5 - རྫོང་ཁ་

ཆོས་ཚོགས་ནང་ཚུལ་དང་མ་མཐུན་པའི་ལཱ་གི་སྐོར།

¹ དོན་ལས་རང་སླབ་པ་ཅིན་ དཀོན་མཆོག་ངོ་མ་ཤེས་མི་ཚུ་གི་སྦུག་ལུ་ཡང་མ་བྱུང་མི་ འཆལ་སྤྱོད་ངན་པའི་ལཱ་འབད་མི་ ཁྱེད་ཀྱི་གྲལ་ཁ་ལུ་འདུག་ཟེར་ང་བཅས་ལུ་སྙན་ཞུ་ལྷོད་ཅི་ ཁྱེད་ཀྱི་གྲལ་ཁ་ལས་ མི་གཅིག་གིས་ རང་གི་ཨ་པ་གི་ཨམ་སྲུ་དང་མཉམ་གཅིག་སྡོདཔ་ཨིན་མས་ཟེར་གོ་ཡི།

² ཨིན་རུང་ ཁྱེད་ཆ་ཁྱབ་ངོམ་སྟོན་སྡོདཔ་ཨིན་མས་ ཨ་ནི་བཟུམ་ངོ་ཚ་སི་སི་བལྟ་སྟེ་ མྱ་ངན་གྱིས་བརྡུང་སྟེ་སྡོད་མི་དགོ་ག་ མི་དེ་ལུ་ཁྱེད་ཀྱི་གྲལ་ཁ་ལས་ཕྱི་ཁར་བཏོན་གཏང་དགོ།

³ ང་ཁྱེད་དང་མཉམ་གཅིག་མེད་རུང་ ངེ་གི་སེམས་ཁྱེད་དང་གཅིག་ཁར་ཡོད་ ང་ཁྱེད་དང་གཅིག་ཁར་ཡོད་དོཝ་བཟུམ་སྦེ་རང་ ཨ་ནི་བཟུམ་གྱི་ལཱ་འབད་མི་དེ་ལུ་ ང་རང་ཁ་ཐུག་ལས་ཁྲིམས་དཔྱད་ཚར་ཡི།

⁴ དེ་གིས་འབད་ ཁྱེད་ཆ་ཁྱབ་ གཙོ་བོ་ཡེ་ཤུ་གི་མཚན་ནང་གཅིག་ཁར་འཛོམ་ད་ ངེ་གི་སེམས་ཡང་ཁྱེད་དང་གཅིག་ཁར་འཛོམ་ཨིནམ་མ་ཚད་ འདི་ནང་ལུ་ང་བཅས་ཀྱི་གཙོ་བོ་གི་དབང་ཤུགས་ཡང་ཡོདཔ་ཨིན།

⁵ དེ་ལས་འཛོམ་ཞིནམ་ད་ ཨ་ནི་བཟུམ་གྱི་ལཱ་འབད་མི་དེ་ལུ་ ཁོ་རའི་སྡིག་པའི་ལུས་དེ་མེདཔ་གཏང་བཅུག་ནིའི་དོན་ལུ་ བདུད་ སེ་ཏཱན་གྱི་ལག་པ་སྤྲོད་གཏང་ དེ་ལས་གཙོ་བོ་གི་ཉིནམ་ལུ་ ཁོ་གི་སེམས་ཉིད་དེ་སྐྱབས་མཛད་འོང་།།

དཔེ་བུལ་ཏོག་མ་བླུག་མིའི་ཨ་ཁམ་གྱི་སྐོར།

⁶ ཁྱེད་ཀྱིས་རང་བསྟོད་རྐྱབ་ནི་དེ་ལེགས་ཤོམ་མེན་ བུལ་ཏོག་ཨ་ཙི་ཅིག་གིས་ཕྱེ་བསྣད་བསྣདཝ་ ག་ར་སྦོ་གཏངམ་ཨིན་ཟེར་ཁྱེད་ཀྱིས་མ་ཤེས་ག།

⁷ ད་ཕྱེ་འདི་བུལ་ཏོག་མ་བླུག་མིའི་ཨ་ཁམ་གསརཔ་ལུ་འགྱུར་བའི་དོན་ལུ་ བུལ་ཏོག་རྙིངམ་དེ་ཕྱི་ཁར་བཏོན་བཀོག་དགོ་ དེ་བཟུམ་སྦེ་རང་ འཆལ་སྤྱོད་ངན་པའི་ལཱ་འབད་མི་དེ་ལུ་ ཁྱེད་ཀྱི་ནང་ན་ལས་ཕྱི་ཁར་བཏོན་གཏང་དགོ་ ག་ཅི་སྨོ་ཟེར་བ་ཅིན་ ཁྱེད་དོན་ལས་རང་བུལ་ཏོག་མ་བླུག་མི་ཨ་ཁམ་བཟུམ་རང་ཨིན་ ཤི་ས་ལས་ཐར་བའི་དུས་ཆེན་གྱི་ལུག་གི་ཕྱུག་ཀུ་ ཁིརཱིས་དེ་ང་བཅས་ཀྱི་དོན་ལུ་ཁྲམ་ཤིང་གུ་བཀྲོང་ཚར་ཡི།

⁸ དེ་འབདཝ་ལས་ ང་བཅས་གནོད་སེམས་དང་ངན་སེམས་ཀྱི་ བུལ་ཏོག་རྙིངམ་གིས་མེན་པར་ བུལ་ཏོག་མ་བླུག་བའི་དྲང་སེམས་དང་ བདེན་པ་གི་ཏད་ཟས་ཀྱི་དུས་ཆེན་སྒྲིག་གེ།

དདཔ་ཅན་ཨིན་ཟེར་སླབ་སྟེ་སྤྱོད་ངན་གྱི་ལཱ་འབད་མི་དང་གཅིག་ཁར་མཐུན་ལམ་མ་བཞག་ནིའི་སྐོར།

⁹ ངེ་གི་ཡི་གུ་ནང་ ཁྱེད་ཆ་ཁྱབ་ལུ་འཆལ་སྤྱོད་ངན་པ་འབད་མི་ཚུ་དང་གཅིག་ཁར་ མཐུན་ལམ་མ་བཞག་ཟེར་བྲིས་ཡི།

¹⁰ འདི་གི་དོན་དག་དེ་ ཨ་ནི་འཛམ་བུ་གླིང་ནང་ཡོད་པའི་འཆལ་སྤྱོད་ངན་པ་གི་མི་དེ་ཚུ་ འདོདཔ་ཆེ་དྲགས་ཚུ་ མགུ་སྐོར་རྐྱབ་མི་ཚུ་ ཡང་ན་སྐུ་ལུ་མོས་མི་ཚུ་དང་གཅིག་ཁར་ རྩ་ལས་རང་མཐུན་ལམ་མ་བཞག་ཟེར་སླབ་མེན་ དེ་སྦེ་ཨིན་པ་ཅིན་ ཁྱེད་འཛམ་བུ་གླིང་སྤངས་ཏེ་འགྱོ་དགོཔ་ཐལ་འོང་།

¹¹ ད་ང་གིས་ཁྱེད་ལུ་ རང་ལུ་དདཔ་ཅན་ཨིན་ཟེར་སླབ་སྟེ་ རང་གིས་འཆལ་སྤྱོད་ངན་པ་འབད་ འདོདཔ་ཆེ་དྲགས་བསྐྱེད་ མགུ་སྐོར་རྐྱབ་ སྐུ་ལུ་མོས་ དམའ་ཕབ་རྐྱབ་ ཡང་ན་ཆང་གིས་ར་བཟི་ ཨ་ནི་བཟུམ་གྱི་མི་ཚུ་དང་གཅིག་ཁར་མཐུན་ལམ་མ་བཞག་ ཁོང་དང་གཅིག་ཁར་བཞེས་སྒོ་ཡང་མ་ཟ་ཟེར་བྲིས་དོ།

¹² ཕྱིའི་མི་རིགས་ཚུ་ལུ་ཁྲིམས་དཔྱད་ནིའི་ འགན་ཁུར་ང་ལུ་མི་ཕོག་ དེ་འབདཝ་ད་ ཆོས་ཚོགས་ནང་ན་སྡིག་པ་འབད་མི་ཆ་ཁྱབ་ལུ་ ཁྲིམས་དཔྱད་ནི་ ཁྱེད་ཀྱི་འགན་ཁུར་ཨིན།

¹³ དཀོན་མཆོག་ཁོ་རང་གིས་ ཕྱིའི་མི་རིགས་ཚུ་ལུ་ཁྲིམས་དཔྱད་འོང་ གསུང་རབ་ནང་བྲིས་དོཝ་བཟུམ་སྦེ་ ཁྱེད་ཆ་ཁྱབ་ཀྱི་སྦུག་ལུ་ཡོད་མིའི་ མི་ངན་པ་ཚུ་ཕྱི་ཁར་བཏོན་གཏང་ཞིག།