ཀོ་རཱིན་ཐི་དང་པ་ལེའུ་ 4 - རྫོང་ཁ་

ཁིརཱིས་ཀྱི་སྐུ་ཚབ་ཚུ་གི་སྐོར།

¹ ང་དང་ ཨ་པོ་ལཱོས་མི་ག་བཟུམ་ཅིག་སྦེ་བརྩི་དགོ་ག་ཟེར་སླབ་པ་ཅིན་ ང་བཅས་ཁིརཱིས་ཀྱི་ཞབས་ཕྱིཔ་དང་ དཀོན་མཆོག་གི་གསང་བའི་གཏེར་གྱི་བདག་འཛིན་པ་སྦེ་བརྩི་དགོ།

² ད་འདི་ལས་ཡང་ལྷགཔ་སྦེ་ཁག་ཆེ་ཤོས་དེ་ བདག་འཛིན་པ་ཚུ་དམ་ཚིག་བསྟེན་དགོཔ་ཨིན།

³ ང་རང་གི་སྐོར་ལས་སླབ་དགོཔ་ཐལཝ་ད་ ཁྱེད་ཀྱིས་འབད་རུང་རང་ མི་གི་ཁྲིམས་ལུགས་ལྟར་དུ་འབད་རུང་རང་ ང་ལུ་ག་དེ་སྦེ་དབྱེ་ཞིབ་འབདཝ་ཨིན་ན་ཟེར་ ང་ལུ་ཚ་གྱང་ལངས་དགོཔ་མེད་ མ་གཞི་ ང་རང་གི་བསམ་འཆར་ལུ་ཡང་བློ་མི་གཏད།

⁴ ང་རང་གིས་འབད་བ་ཅིན་ ང་གིས་འབད་མི་ནང་ལུ་ཉེས་པ་མེད་ དེ་འབདཝ་ད་ འདི་གིས་ང་ལུ་ཉེས་པ་མེད་ཟེར་བདེན་ཁུངས་བཀལ་མི་ཚུགས་ ང་ལུ་བརྟག་དཔྱད་མཛད་མི་དེ་གཙོ་བོ་ཁོ་རང་ཨིན།

⁵ དེ་འབདཝ་ལས་ དུས་ཚོད་མ་རནམ་ལས་ག་ལུ་ཡང་དབྱེ་བ་མ་དཔྱད་ གཙོ་བོ་མ་འབྱོནམ་བར་དུ་བསྒུག་སྡོད་ ཁོ་གིས་གནག་དུང་དུ་ནང་སྦ་བཞག་མི་ གསང་བ་ཚུ་ག་ར་ཕྱི་ཁར་འོད་ནང་བཏོན་ཏེ་ མི་གི་སེམས་ནང་ག་ཡོད་མི་དེ་ ག་ར་གིས་མཐོང་སར་བཏོན་གནང་འོང་ དེ་ལས་མི་རེ་རེ་གིས་དཀོན་མཆོག་ལས་བསྟོད་པ་ཐོབ་ནི་ཨིན།

⁶ སྤུན་ཆ་ཚུ་ ང་གིས་ང་རང་དང་ ཨ་པོ་ལཱོས་ཀྱི་དཔེ་བཤད་མིའི་དོན་དག་དེ་ གསུང་རབ་ནང་ག་བྲིས་ཏེ་ཡོད་མི་ནང་ལས་འགལ་འགྱོ་མ་བཅུག་ཟེར་བའི་དཔེ་དེ་ ཧ་གོ་ཞིནམ་ལས་ ཁྱེད་ཆ་ཁྱབ་འགོ་ཁྲིདཔ་གཅིག་ལུ་མར་ཕབ་རྐྱབ་ནི་ གཞན་གྱི་ཧོངས་ལས་འཐོན་ཏེ་བསྟོད་པ་བརྐྱབས་ཏེ་ དཔའ་རྔམ་སྟོན་མ་བཅུག་ནིའི་དོན་ལུ་ཨིན།

⁷ ཁྱེད་ལུ་དྲག་ཤོས་གཅིག་སྦེ་བརྩིས་མི་ག་ཡོདཔ་སྨོ་ ཁྱེད་ལུ་དཀོན་མཆོག་ལས་མ་ཐོབ་ག་ཅི་ཡོདཔ་སྨོ་ དེ་ཚུ་ག་ར་ཁྱེད་ཀྱིས་དཀོན་མཆོག་ལས་ཐོབ་སྟེ་ཡོད་རུང་ ཁྱེད་རང་གི་ཐོབ་ཐོབ་བཟུམ་སྦེ་ རང་གི་རང་ལུ་ག་ཅི་འབད་བསྟོད་པ་རྐྱབ་སྨོ།

⁸ ད་ཁྱེད་ལུ་ག་ར་ལངམ་སྦེ་འདུག་ ཁྱེད་ཕྱུགཔ་ལུ་འགྱུར་སོང་ནུག་ ང་བཅས་མེད་པར་རང་ ཁྱེད་རྒྱལཔོ་ལུ་འགྱུར་སོང་ནུག་ ཁྱེད་དོན་ལས་རང་རྒྱལཔོ་ལུ་འགྱུར་ཏེ་འབད་བ་ཅིན་ ལེགས་ཤོམ་སོང་སོངམ་འོང་ ག་ཅི་སྨོ་ཟེར་བ་ཅིན་ ང་བཅས་ཡང་ཁྱེད་དང་མཉམ་གཅིག་རྒྱལཔོ་འབད་རྒྱལ་སྲིད་སྐྱོང་ནི་ཐོབ་འོང་།

⁹ ག་ཅི་སྨོ་ཟེར་བ་ཅིན་ ཉེས་ཁྲིམས་ཕོག་མི་ཚུ་ བསད་ནིའི་དོན་ལུ་གྱལ་མཇུག་བཞག་དོཝ་བཟུམ་སྦེ་ དཀོན་མཆོག་གིས་ང་བཅས་སྐུ་ཚབ་ཚུ་ལུ་ཡང་བཞག་ཡོད་ཟེར་མནོཝ་མས་ ག་ཅི་སྨོ་ཟེར་བ་ཅིན་ འཛམ་བུ་གླིང་ག་ར་གི་གདོང་ཁར་ མི་འབད་རུང་ ཕོ་ཉ་འབད་རུང་ ང་ལྟདམོ་གཅིག་ལུ་འགྱུར་ཡི།

¹⁰ ཁྱེད་ཆ་ཁྱབ་ཀྱིས་འབད་བ་ཅིན་ ཁིརཱིས་ནང་ཁྱེད་རང་རྐྱངམ་གཅིག་གནམ་མེད་ས་མེད་ མཁས་མཆོག་ཐལ་སོང་ཡི་ཟེར་མནོ་སྟེ་ ང་བཅས་ཁིརཱིས་ཀྱི་དོན་ལས་བརྩོན་ཤུགས་བསྐྱེད་མི་ཆ་ཁྱབ་ རྩ་རྒས་བཟུམ་སྦེ་མནོཝ་ཨིན་མས་ ད་ཁྱེད་སྟོབས་ཤུགས་ཅན་ཐལ་སོང་ཡི་ཟེར་མནོ་སྟེ་ ང་བཅས་ཆ་ཁྱབ་ཁེ་རྒོ་ག་ནི་ཡང་མེད་ཟེར་མནོཝ་མས་ ཁྱེད་གུས་ཞབས་ཐོབ་དགོཔ་ལྡན་ཏོག་ཏོ་ཨིན་ཟེར་མནོ་སྟེ་ ང་བཅས་ལུ་མར་ཕབ་རྐྱབ་རུང་བཏུབ་པས་ཟེར་མནོཝ་མས།

¹¹ ང་བཅས་ད་ལྟོ་བར་ན་ཡང་ལྟོཝ་བཀྱེས་ཁ་སྐོམ་ གཟུགས་ཁར་ལུ་བགོ་ལ་ཚ་ཏོག་ཏོ་གཅིག་རང་གྱོན་ནི་མེདཔ་མ་ཚད་ འཕྲལ་འཕྲལ་རང་རོགས་ཀྱིས་དྲང་ དེ་ལས་སྡོད་སའི་ཁྱིམ་ཡང་མེད་པར་སྡོདཔ་ཨིན།

¹² དེ་ལས་ང་བཅས་རའི་ལག་པ་གིས་དཀའཝ་སྤྱད་ལཱ་འབད་དེ་ མི་གིས་ང་བཅས་ལུ་ཚིག་ངན་སླབ་ད་ དེ་ལུ་བྱིན་རླབས་ཞུ་བྱིནམ་ཨིན་ དཀའ་ངལ་བྱིན་ཏེ་འབད་རུང་བཟོད་པ་བསྒོམ་སྡོདཔ་ཨིན།

¹³ ང་བཅས་ལུ་ཚིག་ངན་སླབ་འོངམ་ད་ ང་བཅས་ཁོང་ལུ་ཁ་ཧན་ཏོང་ཏོ་སླབ་བྱིནམ་ཨིན་ ད་ལྟོ་བར་ན་ཡང་ ང་བཅས་འཛམ་བུ་གླིང་ཡོངས་ཀྱིས་ ཕྱགས་སྙིགས་བླུག་སའི་དོང་དང་ གོ་མ་ཆོད་པའི་ཅ་ལ་ཅོག་འཐདཔ་སྦེ་བརྩིས་ཏེ་ཡོད།

¹⁴ ད་ང་གིས་ཁྱེད་ཆ་ཁྱབ་ལུ་ངོ་ཚ་བཅུག་ནིའི་དོན་ལུ་དེ་འབྲིཝ་མེན་ དེ་འབདཝ་ད་ ངེ་གི་བརྩེ་བའི་ཨ་ལོ་གཅིག་བཟུམ་སྦེ་བསླབ་བྱ་བྱིནམ་ཨིན།

¹⁵ ཁིརཱིས་ནང་ཁྱེད་ཀྱི་སློབ་དཔོན་ སྟོང་ཕྲག་བཅུ་ཐམ་ལས་ལྷགཔ་འོང་ ཨིན་རུང་ ཁྱེད་ཀྱི་ཨ་པ་ལེ་ཤ་མི་འོང་ གཏམ་བཟང་གི་ཐོག་ལས་སྦེ་ཁིརཱིས་ཡེ་ཤུ་ནང་ང་ཁྱེད་ཀྱི་ཨ་པ་བྱུང་ཡི།

¹⁶ དེ་འབདཝ་ལས་ཁྱེད་ཆ་ཁྱབ་ངེ་གི་དཔེ་ལྟ་ཟེར་ནན་སྐུལ་འབདཝ་ཨིན།

¹⁷ དོན་དག་འདི་ལས་བརྟེན་ཏེ་ ཏི་མོ་ཐི་ཁྱེད་སྡོད་སར་གཏང་དོ་ གཙོ་བོ་ནང་ཁོ་ངེ་གི་བྱམས་པའི་བུ་ དམ་ཚིག་ཅན་ཨིན་ ང་གིས་ས་གནས་ག་ཏེ་རང་ཨིན་རུང་ ཆོས་ཚོགས་དེ་ཚུ་ནང་སྟོན་དོཝ་བཟུམ་སྦེ་ ཁིརཱིས་ཡེ་ཤུ་ནང་ཨིན་མི་ཚུ་གི་འབད་ཐངས་ ང་ཡང་ག་དེ་སྦེ་འབད་ཡི་ག་ འདི་ཁོ་གིས་ཁྱེད་ཀྱི་སེམས་ཁར་དྲན་བཅུག་འོང་།

¹⁸ ད་ང་ཁྱེད་སྡོད་སར་ལོག་མི་འོང་མནོ་སྟེ་ ཁྱེད་ལ་ལུ་ཅིག་དཔའ་མདོག་ཤིག་ཤི་ཡར་སོང་ནུག

¹⁹ དེ་འབདཝ་ད་ གཙོ་བོ་གི་ཐུགས་དགོངས་ཡོད་པ་ཅིན་ ང་མགྱོགས་པར་ཁྱེད་སྡོད་ས་ལུ་འོང་ནི་འབད་དོ་ དཔའ་མདོག་བསྒྱུར་མི་ཚུ་གིས་སླབ་མི་བློ་རྐྱངམ་གཅིག་མེན་པར་ ཁོང་གི་སྟོབས་ཤུགས་དེ་ག་བཟུམ་ཅིག་ཡོདཔ་ཨིན་ན་ དེ་ཡང་བལྟ་ནི་ཨིན།

²⁰ ག་ཅི་སྨོ་ཟེར་བ་ཅིན་ དཀོན་མཆོག་གི་རྒྱལ་སྲིད་དེ་ བཤད་ཐོ་གི་རྒྱལ་སྲིད་མེན་པར་ དབང་དང་ནུས་པ་ཡོད་པའི་རྒྱལ་སྲིད་ཨིན།

²¹ ང་ཁྱེད་སྡོད་ས་ལུ་ རྟས་ལྕག་འབག་འོང་ནི་ཨིན་ན་ ཡང་ན་བྱམས་པ་དང་ ཞི་ཞིང་འཇམ་པའི་སྒོ་ལས་འོངམ་ དེ་གཉིས་ལས་ཁྱེད་ག་འདི་དགའཝ་སྨོ།།