ཀོ་རཱིན་ཐི་དང་པ་ལེའུ་ 3 - རྫོང་ཁ་

ཆོས་ཚོགས་ནང་ཁ་མ་འཆམ་པའི་སྐོར།

¹ སྤུན་ཆ་ཚུ་ ང་ཁྱེད་དང་གཅིག་ཁར་སྡོདཔ་ད་ ཐུགས་ཉིད་ནང་ཡོད་མི་ཚུ་དང་བློ་སླབ་དོཝ་བཟུམ་སྦེ་ སླབ་མ་ཚུགས་ དེ་འབདཝ་ད་ ལུས་ཀྱི་རང་བཞིན་དང་མཐུན་ཏེ་སྡོད་མི་ཚུ་ ཨོམ་འཐུང་མི་ཨ་ལོ་ཚུ་ལུ་སླབ་དོཝ་བཟུམ་སྦེ་ སླབ་སྡོད་ཅི།

² ང་གིས་ཁྱེད་ལུ་ ཨ་ལོ་ཨོམ་བཅད་དེ་བཞེས་སྒོ་འགོ་དང་པ་ བྱིན་མི་དེ་མེན་པར་ ཨོམ་རང་འཐུང་བཅུག་ཅི་ ག་ཅི་སྨོ་ཟེར་བ་ཅིན་ ཁྱེད་འདི་བཟུམ་གྱི་བཞེས་སྒོ་ ཟ་ནི་མ་རནམ་ལས་བརྟེན་ཏེ་ཨིན་ དེ་འབདཝ་ད་ ད་ལྟོ་ཡང་ཁྱེད་ འདི་བཟུམ་གྱི་བཞེས་སྒོ་ཟ་ནི་གི་དོན་ལུ་གྲ་སྒྲིག་མིན་འདུག

³ ད་ལྟོ་ཡང་ཁྱེད་ལུས་ཀྱི་རང་བཞིན་དང་མཐུན་ཏེ་སྡོདཔ་མས་ ག་ཅི་སྨོ་ཟེར་བ་ཅིན་ ཁྱེད་གཅིག་གིས་གཅིག་ལུ་མིག་ཏོ་ཚ་ འཐབ་འཛིང་འབདཝ་ད་ ཁྱེད་ཀྱི་སྤྱོད་པ་ཚུ་ མི་གི་རང་བཞིན་ནང་ཡོད་མི་ཚུ་བཟུམ་སྦེ་སྡོདཔ་མས་མེན་ན།

⁴ ག་ཅི་སྨོ་ཟེར་བ་ཅིན་ ལ་ལུ་གིས་ང་ པའུལ་གྱི་ཨིན་ཟེར་སླབ་ ད་རུང་ལ་ལུ་གིས་ང་ ཨ་པོ་ལཱོས་ཀྱི་ཨིན་ཟེར་སླབ་པ་ཅིན་ ཁྱེད་མི་གི་རང་བཞིན་ནང་ཡོད་མི་ཚུ་བཟུམ་སྦེ་སླབ་མས་མེན་ན།

⁵ མ་གཞི་ ཨ་པོ་ལཱོས་ག་སྨོ་ ང་ པའུལ་ག་སྨོ་ ང་བཅས་གཉིས་ཁྱེད་ལུ་དད་པ་བསྐྱེད་བཅུག་མི་ དཀོན་མཆོག་གི་ཞབས་ཕྱིཔ་རྐྱངམ་གཅིག་ཨིན་ ཁོ་གིས་བཀའ་གནངམ་བཞིན་དུ་ ང་བཅས་ཀྱིས་ཕྱག་ཞུ་ཡི།

⁶ སོན་དེ་ང་གིས་བཏབ་ཅི་ ཨ་པོ་ལཱོས་ཀྱིས་ཆུ་བླུགས་ དེ་ལས་དཀོན་མཆོག་གིས་འདི་ལུ་ཐོན་སྐྱེད་གནང་ཡི།

⁷ དེ་འབདཝ་ལས་ཐོན་སྐྱེད་གནང་མི་དཀོན་མཆོག་མ་གཏོགས་ གཞན་སོན་བཏབ་མི་དང་ཆུ་བླུགས་མི་ཚུ་ཁག་མི་ཆེ།

⁸ སོན་བཏབ་མི་དང་ཆུ་བླུག་མི་གཉིས་ཆ་རང་ རྒྱུ་མཚན་གཅིག་ལུ་བརྟེན་ཏེ་ལཱ་འབདཝ་ཨིན་ ཁོང་གཉིས་ཆ་རང་གིས་ དཀའཝ་སྤྱད་མི་དང་བསྟུན་ཏེ་ གླ་ཆ་ཐོབ་ནི་ཨིན།

⁹ ག་ཅི་སྨོ་ཟེར་བ་ཅིན་ ང་བཅས་གཉིས་ཆ་རང་དཀོན་མཆོག་གི་ཕྱག་ཞུ་མི་ཨིན་ དེ་ལས་ཁྱེད་ཆ་ཁྱབ་ དཀོན་མཆོག་གི་བྱཱ་ཞིང་ཨིནམ་མ་ཚད་ ཁོ་གི་བཞུགས་ཁང་ཡང་ཨིན།།

སློབ་དཔོན་ཚུ་གི་འགན་ཁག་གི་སྐོར།

¹⁰ ང་ལུ་གནང་མི་དཀོན་མཆོག་གི་ཐུགས་རྗེ་དང་བསྟུན་ཏེ་ བཟོ་བོ་མཁས་དྲགས་ཅིག་བཟུམ་སྦེ་ ང་གིས་རྩིག་འགྱམ་བཙུགས་བཞགཔ་ལས་བརྟེན་ གཞན་གྱིས་འདི་གི་གུ་ལས་འཕྲོ་མཐུད་དེ་ རྩིགཔ་རྐྱབ་འགྱོཝ་ཨིན་ འདི་གི་གུ་ལུ་འཕྲོ་མཐུད་དེ་རང་རྐྱབ་འགྱོ་མི་ཚུ་གིས་ ག་དེ་སྦེ་རྐྱབ་དོ་ག་ ག་ར་གིས་རིགཔ་སྒྱིམ་དགོ།

¹¹ ག་ཅི་སྨོ་ཟེར་བ་ཅིན་ ང་གིས་ཡེ་ཤུ་ཁིརཱིས་རྩིག་འགྱམ་སྦེ་བཙུགས་ཅི་ དེ་མ་གཏོགས་ རྩིག་འགྱམ་གཞན་ ག་གིས་ཡང་བཙུགས་མི་ཚུགས།

¹² ག་རང་ཨིན་རུང་ འཕྲོ་མཐུད་དེ་རྩིག་འགྱམ་དེ་གི་གུ་ལུ་རྐྱབ་ད་ གསེར་དང་དངུལ་ རིན་ཆེན་ནོར་བུ་ ཤིང་ སུག་མ་དེ་ཚུ་ ག་ཅི་གིས་རང་བཙུགས་ཏེ་བཟོཝ་འདྲཝ་ཅིག་འབད་བ་ཅིན།

¹³ ཁྲིམས་དཔྱད་པའི་ཉིནམ་ལུ་ མི་རེ་རེ་བཞིན་གྱིས་འབད་མི་ལཱ་དེ་ མེ་གི་ཐོག་ལས་སྦེ་ཕྱི་བཏོན་བྱིན་འོང་ ཁྲིམས་དཔྱད་བའི་ཉིནམ་དེ་ མི་ག་ར་གི་ལཱ་ག་བཟུམ་སྦེ་ཡོདཔ་ཨིན་ན་ མེ་གིས་བརྟག་དཔྱད་འབད་འོང་།

¹⁴ མི་ག་གིས་རང་འབད་རུང་ རྩིག་འགྱམ་དེ་གི་གུ་རྐྱབ་མི་མཁོ་ཆས་ མེ་གིས་མ་འཚིག་པར་གནས་པ་ཅིན་ ཁོ་གིས་གསོལ་རས་ཐོབ་ནི་ཨིན་མས།

¹⁵ དེ་འབདཝ་ད་ མེ་གིས་འཚིག་སྟེ་མེདཔ་ཤོར་སོང་པ་ཅིན་ བཟོ་བོ་དེ་གིས་རྒུད་འབག་དགོ་ ཨིན་རུང་བཟོ་བོ་དེ་ མེ་གིས་འཚིག་ས་ལས་བྱོག་ཐལ་དོཝ་བཟུམ་སྦེ་ཐར་པ་ཐོབ་འོང་།

¹⁶ ཁྱེད་ཆ་ཁྱབ་དཀོན་མཆོག་གི་བཞུགས་ཁང་ཨིནམ་ལས་ ཁོ་གི་དམ་པའི་ཐུགས་ཉིད་དེ་ ཁྱེད་ཀྱི་ནང་ན་བཞུགས་ཡོདཔ་ཁྱེད་ཀྱིས་མ་ཤེས་ག།

¹⁷ དཀོན་མཆོག་གི་བཞུགས་ཁང་འདི་ལུ་མི་ག་གིས་འབད་རུང་རྩ་མེད་གཏང་པ་ཅིན་ དཀོན་མཆོག་གིས་དེ་ལུ་ཡང་རྩ་མེད་གནང་ནི་ཨིན་མས་ ག་ཅི་སྨོ་ཟེར་བ་ཅིན་ དཀོན་མཆོག་གི་བཞུགས་ཁང་དེ་དམ་པ་ཨིན་ ཁོ་གི་བཞུགས་ཁང་དེ་ཁྱེད་ཆ་ཁྱབ་ཨིན།

¹⁸ མི་རང་གིས་རང་ལུ་མགུ་མ་བསྐོར་ ཁྱེད་ཀྱི་གྲལ་ཁ་ལས་ ག་ར་འབད་རུང་ ང་ཨ་ནི་འཛམ་བུ་གླིང་ནང་ ཤེས་རབ་ཅན་གཅིག་ཨིན་ཟེར་མནོ་བ་ཅིན་ མི་དེ་ངོ་མ་རང་ཤེས་རབ་ཅན་སྦེ་འགྱོ་བའི་དོན་ལུ་ ཁོ་རང་དང་པ་ག་ནི་ཡང་མ་ཤེས་མི་ལུ་འགྱུར་དགོ།

¹⁹ ག་ཅི་སྨོ་ཟེར་བ་ཅིན་ འཛམ་བུ་གླིང་གི་ཤེས་རབ་དེ་ དཀོན་མཆོག་གི་དོན་ལུ་ཁུངས་མེད་པའི་ཤེས་རབ་ཨིན། ཁོ་གིས་ ཤེས་རབ་ཅན་ཚུ་ལུ་ ཁོང་རའི་མཁས་དྲགས་ཀྱི་ཧིང་ནང་ལས་བཟུང་འོང་ཟེར་ གསུང་རབ་ནང་བྲིས་ཏེ་འདུག

²⁰ ད་རུང་། ཤེས་རབ་ཅན་ཚུ་གི་མནོ་བསམ་དེ་ ཁུངས་མེད་ཟེར་གཙོ་བོ་གིས་མཁྱེན།

²¹ དེ་འབདཝ་ལས་ མི་ཚུ་ལུ་ ག་གིས་ཡང་བསྟོད་པ་རྐྱབ་མ་བཅུག་ ག་ཅི་སྨོ་ཟེར་བ་ཅིན་ དེ་ཚུ་ག་ར་ཁྱེད་ཆ་ཁྱབ་ཀྱི་དོན་ལས་རང་ཨིན།

²² པའུལ་ཨིན་རུང་ ཨ་པོ་ལཱོས་ཨིན་རུང་ ཀེ་ཕཱས་ཨིན་རུང་ འཛམ་བུ་གླིང་ཨིན་རུང་ ཚེ་ཡང་ན་འཆི་བ་ཨིན་རུང་ དུས་ད་ལྟོ་ ཡང་ན་མ་འོང་པ་གི་དུས་ཨིན་རུང་ ག་ར་ཁྱེད་ཆ་ཁྱབ་ཀྱི་དོན་ལས་རང་ཨིན།

²³ དེ་ལས་ཁྱེད་ཆ་ཁྱབ་ཁིརཱིས་ཀྱི་ཨིནམ་མ་ཚད་ ཁིརཱིས་དཀོན་མཆོག་གི་ཨིན་ནོ།།