ཀོ་རཱིན་ཐི་དང་པ་ལེའུ་ 2 - རྫོང་ཁ་

དཀོན་མཆོག་གི་ཤེས་རབ་ཀྱི་སྐོར།

¹ སྤུན་ཆ་ཚུ་ ང་ཁྱེད་སྡོད་ས་འགོ་དང་པ་འོངམ་ད་ ཁ་མཁས་དྲགས་དང་རིག་པ་ཅན་གྱི་ཐོག་ལས་ དཀོན་མཆོག་གི་འཛོམ་དཔང་བཤད་དེ་མ་འོང་།

² ག་ཅི་སྨོ་ཟེར་བ་ཅིན་ ཁྱེད་དང་གཅིག་ཁར་སྡོདཔ་ད་ ཁྲམ་ཤིང་གུ་བཀྲོངས་ཡོད་མི་ཡེ་ཤུ་ཁིརཱིས་ཀྱི་སྐོར་ལས་མ་གཏོགས་ གཞན་ག་ཅི་གི་སྐོར་ལས་ཡང་ ཁྱེད་ལུ་མི་སྟོན་ཟེར་ཐག་བཅད་ཅི།

³ ང་ཁྱེད་སྡོད་ས་འོངམ་ད་ སྟོབས་ཤུགས་མེད་པའི་རང་བཞིན་ནང་ འདྲོག་སྟེ་སྒྱིད་ཐག་འདར་ཏེ་འོངས་ཡི།

⁴ ང་གིས་འབག་འོང་མི་ཁ་འཐེན་དང་བཤད་མི་ཆོས་དེ་ རིག་པ་ཅན་གྱི་ཚིག་དང་ ཁྱེད་ལུ་ཡིད་ཆེས་བཅུག་ནི་སྦེ་རྩ་ལས་མ་བཤད་ དེ་འབདཝ་ད་ དམ་པའི་ཐུགས་ཉིད་ཀྱི་སྟོབས་ཤུགས་ལས་བརྟེན་ ཆོས་སྟོན་ཏེ་བཤད་ཅི།

⁵ ག་ཅི་སྨོ་ཟེར་བ་ཅིན་ ཁྱེད་ཀྱི་དད་པ་དེ་མི་གི་ཤེས་རབ་ལས་མེན་པར་ དཀོན་མཆོག་གི་མཐུ་སྟོབས་ལས་བརྟེན་ཏེ་ཨིན།

⁶ ཨིན་རུང་ དད་པ་ནང་སྒྲིང་སྒྲིང་ཡོད་མི་ཆ་ཁྱབ་ཀྱི་སྦུག་ལུ་ ང་བཅས་ཤེས་རབ་ཀྱི་ཆོས་བཤདཔ་ཨིན་ དེ་འཛམ་བུ་གླིང་གི་ཤེས་རབ་བཟུམ་སྦེ་མེན་ དེ་བཟུམ་གྱི་ཤེས་རབ་དེ་ འཛམ་བུ་གླིང་དང་འཛམ་བུ་གླིང་གི་དབང་དཔོན་ཚུ་བཟུམ་སྦེ་ མགྱོགས་པ་རང་ཡལ་འགྱོ་ནི་ཨིན།

⁷ དེ་འབདཝ་ད་ གཡིབ་བཞག་ཡོད་མི་གསང་བ་ དཀོན་མཆོག་གི་ཤེས་རབ་དེ་གི་སྐོར་ལས་ ང་བཅས་ཀྱིས་ཆོས་བཤདཔ་ཨིན་ དེ་འཇིག་རྟེན་འགོ་མ་བཙུག་པའི་ཧེ་མ་ལས་ ང་བཅས་ཡང་གཟི་བརྗིད་ཅན་སྦེ་འགྱུར་ནི་གི་དོན་ལུ་ དཀོན་མཆོག་གིས་བཀོད་བཞག་གནང་ནུག

⁸ དེ་འབདཝ་ད་ འཇིག་རྟེན་སྐྱོང་མིའི་ དབང་དཔོན་ཆ་ཁྱབ་ཀྱིས་ཤེས་རབ་དེ་ཧ་མ་གོ་བས་ དེ་ཁོང་གིས་ཧ་གོ་གོཝ་འབད་བ་ཅིན་ གཟི་བརྗིད་ཅན་ཨིན་མི་གཙོ་བོ་ལུ་ཁྲམ་ཤིང་གུ་མ་དཀྲོངསམ་འོང་།

⁹ དེ་གིས་འབད། སེམས་ཀྱི་གདིང་ལས་རང་ དཀོན་མཆོག་ལུ་བྱམས་པ་འབད་མི་ཆ་ཁྱབ་ཀྱི་དོན་ལུ་ ནམ་ཡང་མིག་གིས་མ་མཐོང་མི་དང་ རྣམ་ཅོག་གིས་མ་གོ་མི་ མི་གིས་སེམས་ཁར་མ་དྲན་མི་དེ་ དཀོན་མཆོག་གིས་གྲ་སྒྲིག་མཛད་གནང་ཡི་ཟེར་ གསུང་རབ་ནང་བྲིས་ཏེ་འདུག

¹⁰ དཀོན་མཆོག་གིས་ ཁོ་གི་ཐུགས་ཉིད་ཀྱི་སྒོ་ལས་སྦེ་ དེ་ཚུ་ག་ར་ང་བཅས་ལུ་མངོན་སུམ་དུ་བཏོན་གནང་ཡི་ ག་ཅི་སྨོ་ཟེར་བ་ཅིན་ དམ་པའི་ཐུགས་ཉིད་ཀྱིས་ག་ར་འཚོལ་ཏེ་བརྟག་ཞིབ་མཛདཔ་མ་ཚད་ དཀོན་མཆོག་གི་ལོ་རྒྱུས་གཏིང་ཟབ་དྲགས་དེ་ཚུ་ཡང་འཚོལ་གནངམ་ཨིན།

¹¹ མི་གི་ནང་ན་ཡོད་མི་མནོ་བསམ་དེ་ཚུ་ རང་གི་སེམས་ཀྱིས་མ་གཏོགས་གཞན་གྱིས་ཧ་གོ་མི་ཚུགས་ དེ་བཟུམ་སྦེ་རང་ དཀོན་མཆོག་གི་ཐུགས་བསམ་འདི་ལུ་ ཁོ་གི་ཐུགས་ཉིད་ཀྱིས་མ་གཏོགས་གཞན་ ག་གིས་ཡང་ཧ་གོ་མི་ཚུགས།

¹² ད་ང་བཅས་ཀྱིས་འཛམ་བུ་གླིང་གི་མནོ་ཐངས་ཚུ་མ་ཐོབ་ དེ་འབདཝ་ད་ དཀོན་མཆོག་གིས་ང་བཅས་ལུ་སྟོང་པ་སྦེ་གནང་མིའི་གསོལ་རས་དེ་ ག་ཅི་ཨིན་ན་ཧ་གོ་ཚུགས་ནིའི་དོན་ལུ་ ང་བཅས་ལུ་དམ་པའི་ཐུགས་ཉིད་གནང་སྟེ་ཡོད།།

¹³ ང་བཅས་ཀྱིས་ མི་གི་ཤེས་རབ་ཀྱིས་སྟོན་མི་ཚིག་ཚུ་ནང་མེན་པར་ དམ་པའི་ཐུགས་ཉིད་ཀྱིས་སྟོནམ་བཞིན་དུ་ ཆོས་བཤདཔ་ཨིན་ དེ་འབདཝ་ལས་ ཐུགས་ཉིད་ནང་ཨིན་མི་ཚུ་ལུ་ ང་བཅས་ཀྱིས་ ཐུགས་ཉིད་ཀྱི་བདེན་པ་ཚུ་བཤད་བྱིནམ་ཨིན།

¹⁴ ཐུགས་ཉིད་ནང་མེད་མི་དེ་གིས་ ཨ་ནི་དཀོན་མཆོག་གི་ཐུགས་ཉིད་ལས་འོངས་མི་ བློ་བདེན་པ་ཚུ་ལུ་ཁ་མི་བཟེད་ ག་ཅི་སྨོ་ཟེར་བ་ཅིན་ དེ་ཚུ་ཁོ་གི་དོན་ལུ་འབྱུང་ཁུངས་མེད་པའི་བློ་བཟུམ་ཅིག་ཨིན་ ཁོང་དམ་པའི་ཐུགས་ཉིད་ནང་ཡོད་མི་རྐྱངམ་གཅིག་གིས་ དོན་དག་ཧ་གོ་ཚུགསཔ་ཨིནམ་ལས་ ཁོ་གིས་དེ་ལུ་ཧ་གོ་མི་ཚུགས།

¹⁵ ཐུགས་ཉིད་དང་ལྡན་མི་ཆ་ཁྱབ་ཀྱིས་རྐྱངམ་གཅིག་ ག་ར་དབྱེ་ཞིབ་འབད་བལྟ་ཚུགས་ དེ་འབདཝ་ད་ མི་ག་གིས་ཡང་ཁོ་ལུ་དབྱེ་ཞིབ་འབད་མི་ཚུགས།

¹⁶ ག་ཅི་སྨོ་ཟེར་བ་ཅིན། གཙོ་བོ་གི་ཐུགས་བསམ་འདི་ལུ་ག་གིས་ཧ་གོ་ཚུགས་ནི་སྨོ་ ཁོ་ལུ་ག་གིས་སྟོན་ཚུགས་ནི་སྨོ། དེ་འབདཝ་ད་ ང་བཅས་ཀྱིས་ཁིརཱིས་ཀྱི་ཐུགས་བསམ་ཧ་གོ་ཚུགསཔ་ཨིན།།