ཀོ་རཱིན་ཐི་དང་པ་ལེའུ་ 12 - རྫོང་ཁ་

དམ་པའི་ཐུགས་ཉིད་ཀྱི་གསོལ་རས་ཀྱི་སྐོར།

¹ ངེའི་སྤུན་ཆ་ཚུ་ ཁྱེད་ཀྱིས་ དམ་པའི་ཐུགས་ཉིད་ཀྱི་སྐོར་ལས་ ང་ལུ་དྲི་བ་དཔྱད་དེ་ཡོད་མི་གི་སྐོར་ལས་ ཁྱེད་ག་ནི་ཡང་མ་ཤེས་པར་བཞག་ནི་གི་སེམས་མེད།

² ཁྱེད་ཆ་ཁྱབ་དད་པ་མ་སྐྱེད་པའི་ཧེ་མ་ ལམ་འཛོལ་འགྱོ་སྟེ་ ཁ་སླབ་མ་ཚུགས་པའི་སྐུ་འདྲ་ཚུ་ལུ་ མཆོདཔ་ཕུལ་སྡོད་ཅི་ཟེར་ཁྱེད་ཀྱིས་ཤེས།

³ དེ་འབདཝ་ལས་ ག་ར་འབད་རུང་ དཀོན་མཆོག་གི་ཐུགས་ཉིད་ཀྱི་ཐོག་ལས་སླབ་མི་དེ་གིས་ ཡེ་ཤུ་ལུ་ཆདཔ་ཕོག་བཅུག་ཟེར་མི་སླབ་ དེ་ལས་དམ་པའི་ཐུགས་ཉིད་ཀྱི་ཐོག་ལས་སྦེ་རྐྱངམ་གཅིག་ ཡེ་ཤུ་ཁིརཱིས་གཙོ་བོ་ཨིན་ཟེར་ཞུ་ཚུགས་ཟེར་ ཁྱེད་ཆ་ཁྱབ་ལུ་ཧ་གོ་བཅུག་ནིའི་སེམས་ང་ལུ་ཡོད།

⁴ དམ་པའི་ཐུགས་ཉིད་ཀྱི་གསོལ་རས་དེ་ཚུ་ མ་གཅིགཔ་ལེ་ཤ་ཡོད་ དེ་འབདཝ་ད་ དམ་པའི་ཐུགས་ཉིད་དེ་ གཅིག་ལས་ལྷག་སྟེ་མེད།

⁵ དེ་བཟུམ་སྦེ་རང་ ཞབས་ཏོག་ཕུལ་ནི་གི་ཐབས་ཤེས་ལེ་ཤ་ཡོད་ དེ་འབདཝ་ད་གཙོ་བོ་དེ་ གཅིག་ལས་ལྷག་སྟེ་མེད།

⁶ ལཱ་ལྷམ་པ་མ་གཅིགཔ་ལེ་ཤ་ཡོད་ དེ་འབདཝ་ད་ མི་ག་ར་གི་ཐོག་ལས་སྦེ་ དེ་ཚུ་ག་ར་མཛད་གནང་མི་དཀོན་མཆོག་དེ་ གཅིག་ལས་ལྷག་སྟེ་མེད།

⁷ མི་ག་ར་ལུ་ཕན་བཏགས་བྱིན་ནིའི་དོན་ལས་ ང་བཅས་རེ་རེ་ལུ་དམ་པའི་ཐུགས་ཉིད་ཀྱི་གསོལ་རས་གནང་སྟེ་ཡོད།

⁸ མི་གཅིག་ལུ་མཁས་པའི་བསླབ་བྱ་བྱིན་ནི་དང་ གཞན་གཅིག་ལུ་ཡོན་ཏན་ཐོབ་ནིའི་བློ་སླབ་ནི་ དེ་ཚུ་གསོལ་རས་སོ་སོ་ཨིན་ཏེ་འབད་རུང་ གནང་མི་དེ་གཅིག་ཨིན་ དེ་ཐུགས་ཉིད་ཁོ་རང་ཨིན།

⁹ ཐུགས་ཉིད་དེ་གིས་རང་ ལ་ལུ་ཅིག་ལུ་དད་པ་སྐྱེད་ནི་དང་ ལ་ལུ་ཅིག་ལུ་ནདཔ་ལུ་དྲགཔ་བཟོ་ནི་གི་གསོལ་རས་དེ་ཚུ་གནངམ་ཨིན།

¹⁰ ལ་ལུ་ཅིག་ལུ་ཧ་ལས་པའི་ཕྱག་ལཱ་འབད་ནི་དང་ ལ་ལུ་ཅིག་ལུ་ལུང་བསྟན་བཤད་ནི་ ལ་ལུ་ཅིག་ལུ་སེམས་ཉིད་བདེན་པ་དང་རྫུས་མ་དབྱེ་བ་ཕྱེ་ནི་ ལ་ལུ་ཅིག་ལུ་དཀོན་མཆོག་གི་སྐད་རིགས་མ་འདྲཝ་དང་མ་གཅིགཔ་ནང་སླབ་ཚུགས་ནི་ ལ་ལུ་ཅིག་ལུ་དཀོན་མཆོག་གི་སྐད་རིགས་མ་འདྲཝ་དང་མ་གཅིགཔ་ཚུ་གི་ དོན་དག་བཤད་པ་རྐྱབ་ནིའི་གསོལ་རས་དེ་ཚུ་གནང་སྟེ་ཡོད།

¹¹ དེ་འབདཝ་ད་ དེ་ཚུ་ག་ར་བགོ་བཤའ་རྐྱབ་གནང་མི་དེ་གཅིག་ཨིན་ དེ་ཐུགས་ཉིད་ཁོ་རང་ཨིན་ ཁོ་གིས་མི་ག་ར་ལུ་ ཁོ་རང་གི་ཐུགས་དགོངས་བཞིན་དུ་གསོལ་རས་གནངམ་ཨིན།།

གཟུགས་གཅིག་ལུ་ཡན་ལག་ལེ་ཤ་ཡོད་པའི་སྐོར།

¹² མི་གི་གཟུགས་དེ་གཅིག་ཨིན་རུང་ དེ་གི་ཡན་ལག་ལེ་ཤ་ཡོད་ ཡན་ལག་ལེ་ཤ་བསྡོམས་ཏེ་ གཟུགས་གཅིག་བཟོཝ་ཨིན་ དེ་བཟུམ་སྦེ་རང་ ཁིརཱིས་ཀྱི་སྐུ་གཟུགས་ཟེར་སླབ་ད་ལུ་ འདི་བཟུམ་སྦེ་རང་ཨིན།

¹³ ང་བཅས་ལ་ལུ་ཅིག་ ཡ་ཧུ་ད་པ་ཨིན་ ལ་ལུ་ཕྱིའི་མི་རིགས་ ད་རུང་ལ་ལུ་རྒྱོབོ་རྒྱམོ་དང་ ལ་ལུ་རང་དབང་ཡོད་མི་ཚུ་ཨིན་ དེ་འབདཝ་ད་ ང་བཅས་ག་ར་ཐུགས་ཉིད་གཅིག་ལས་རང་ སྐུ་གཟུགས་གཅིག་བཟོ་ནི་སྦེ་ ཁྲུས་གསོལ་ཞུ་མི་ཚུ་ཨིན་ དེ་འབདཝ་ལས་བརྟེན་ཏེ་ དཀོན་མཆོག་གིས་ང་བཅས་ག་ར་གི་སེམས་ཁར་ཐུགས་ཉིད་འབྱོ་གནང་ཡི།

¹⁴ ག་ཅི་སྨོ་ཟེར་བ་ཅིན་ གཟུགས་དེ་ཡན་ལག་གཅིག་མེན་པར་ ཡན་ལག་ལེ་ཤ་གིས་བཟོ་བཟོཝ་ཨིན།

¹⁵ རྐངམ་གིས་ང་ལགཔ་མེན་ འདི་གིས་འབད་ ང་གཟུགས་ཀྱི་ཡན་ལག་གི་གྲངས་སུ་མི་ཚུད་ཟེར་སླབ་པ་ཅིན་ དེ་གཟུགས་ཀྱི་ཡན་ལག་མེནམ་ཨིན་ན།

¹⁶ དེ་ལས་རྣམ་ཅོག་གིས་ང་མིག་ཏོ་མེན་ འདི་གིས་འབད་ ང་གཟུགས་ཀྱི་ཡན་ལག་གི་གྲངས་སུ་མི་ཚུད་ཟེར་སླབ་པ་ཅིན་ དེ་གཟུགས་ཀྱི་ཡན་ལག་མེནམ་ཨིན་ན།

¹⁷ གཟུགས་ཆ་མཉམ་མིག་ཏོ་འབད་བ་ཅིན་ ཁྱེད་ག་དེ་སྦེ་རྣ་བ་ཉན་ནི་སྨོ་ གཟུགས་ཆ་མཉམ་རྣམ་ཅོག་འབད་བ་ཅིན་ ཁྱེད་ཀྱིས་ག་དེ་སྦེ་ལྷ་པ་གིས་དྲིམ་ཚོར་ནི་སྨོ།

¹⁸ དེ་བཟུམ་སྦེ་རང་ ང་བཅས་ཀྱི་གཟུགས་ལུ་ཡན་ལག་ལེ་ཤ་ཡོད་ དེ་ཚུ་ག་ར་དཀོན་མཆོག་གི་ཐུགས་དགོངས་བཞིན་དུ་ གོ་རིམ་བསྒྲིག་སྟེ་བཞག་གནང་ནུག

¹⁹ གཟུགས་གཅིག་ནང་ཡན་ལག་ག་ར་ཅོག་འཐདཔ་འབད་བ་ཅིན་ ཨ་ནི་གཟུགས་འདི་ ག་དེ་སྦེ་འབད་ནི་སྨོ།

²⁰ ད་ཡན་ལག་ལེ་ཤ་ཡོད་རུང་ གཟུགས་དེ་གཅིག་རང་ཨིན།

²¹ མིག་ཏོ་གིས་ལགཔ་ལུ་ང་ཁྱོད་མིན་དགོ་ཟེར་སླབ་མི་ཚུགས་ དེ་ལས་མགུ་ཏོ་གིས་ཡང་རྐངམ་ལུ་ ང་ཁྱོད་མིན་དགོ་ཟེར་སླབ་མི་ཚུགས།

²² མ་གཞི་ གཟུགས་ཀྱི་ཡན་ལག་ལ་ལུ་ཅིག་སྟོབས་ཤུགས་མེདཔ་དང་ ཁག་མ་ཆེཝ་སྦེ་མཐོངམ་ཨིན་ དེ་འབདཝ་ད་ འདི་ཚུ་ཡང་གནམ་མེད་ས་མེད་ཁག་ཆེ་ཤོས་ཚུ་ཨིན།

²³ དེ་ལས་གཟུགས་ཀྱི་ཡན་ལག་བསྟོད་པ་ཆེ་ཏོག་ཏོ་སྦེ་མ་མཐོང་མི་ཚུ་ལུ་ ང་བཅས་ཀྱིས་གྱོན་ཆས་ལེགས་ཤོམ་གྱོན་ཏེ་ དེ་ཚུ་ལུ་ག་དེ་དྲག་དྲག་བདག་འཛིན་འཐབ་སྟེ་སྦ་བཞགཔ་ཨིན།

²⁴ དེ་འབདཝ་ད་ བསྟོད་པ་ཆེ་ཏོག་ཏོ་ཡོད་མིའི་ཡན་ལག་ཚུ་ལུ་ བདག་འཛིན་འཐབ་མི་དགོ་ ཨིན་རུང་ བརྩི་མཐོང་མེད་མི་ཡན་ལག་དེ་ཚུ་ལུ་ ག་དེ་དྲག་དྲག་བདག་འཛིན་འཐབ་དགོཔ་སྦེ་ དཀོན་མཆོག་གིས་མཛད་གནང་ནུག

²⁵ དེ་ལས་བརྟེན་ཏེ་ ཡན་ལག་ག་ར་མཐུན་ཏོག་ཏོ་དང་ གཅིག་དང་གཅིག་ལུ་བརྩི་མཐོང་ཡོདཔ་སྦེ་སྡོད་འོང་།

²⁶ ཡན་ལག་གཅིག་ལུ་དཀའ་ངལ་འབྱུངམ་ད་ ཡན་ལག་ཆ་མཉམ་གྱིས་དཀལ་ངལ་དེ་རུབ་སྟེ་འབགཔ་ཨིན་ དེ་ལས་ཡན་ལག་གཅིག་གིས་བསྟོད་པ་ཐོབ་པ་ཅིན་ དེ་དང་གཅིག་ཁར་ཡན་ལག་ཆ་མཉམ་དགའ་སྤྲོ་འགྱུརཝ་ཨིན།

²⁷ ཁྱེད་ཆ་ཁྱབ་ག་ར་གཅིག་ཁར་བསྡོམས་ཏེ་ ཁིརཱིས་ཀྱི་སྐུ་གཟུགས་གཅིག་སྦེ་འགྱུརཝ་ཨིན་ དེ་ལས་ཁྱེད་རེ་རེ་ ཁོ་གི་ཡན་ལག་རེ་རེ་ཨིན།

²⁸ དཀོན་མཆོག་གི་ཆོས་ཚོགས་ནང་། འགོ་དང་པ་རང་སྐུ་ཚབ་དང་ གཉིས་པ་ལུ་ལུང་སྟོན་པ་ གསུམ་པ་སློབ་དཔོན་ དེ་ལས་ཧ་ལས་པའི་ཕྱག་ལཱ་འབད་ཚུགས་མི་དང་ ནདཔ་ལུ་དྲགཔ་བཟོ་ནིའི་གསོལ་རས་ཐོབ་མི་ གཞན་ལུ་རོགས་རམ་འབད་ཚུགས་མི་ བདག་སྐྱོང་འབད་ཚུགས་མི་ དཀོན་མཆོག་གི་སྐད་རིགས་མ་འདྲཝ་ནང་སླབ་ཚུགས་མི། དེ་ཚུ་ག་ར་ལུ་འགན་ཁུར་བཀལ་གནང་ནུག

²⁹ ང་བཅས་ག་ར་སྐུ་ཚབ་ཨིན་ན་ ག་ར་ལུང་སྟོན་པ་ཨིན་ན་ ཡང་ན་ག་ར་སློབ་དཔོན་ཨིན་ན་ ག་ར་ཧ་ལས་པའི་ཕྱག་ལཱ་འབད་ཚུགས་མི་ཚུ་ཨིན་ན།

³⁰ ང་བཅས་ག་ར་ལུ་ནདཔ་དྲགཔ་བཟོ་ནི་གི་གསོལ་རས་འདུག་ག་ ཡང་ན་ང་བཅས་ག་ར་གིས་ དཀོན་མཆོག་གི་སྐད་རིགས་མ་འདྲཝ་ནང་ཁ་སླབ་ཚུགས་ནི་གི་གསོལ་རས་འདུག་ག་ ཡང་ན་ག་ར་གིས་ལུང་བསྟན་གྱི་དོན་དག་བཤད་ཚུགས་ག་ དེ་སྦེ་རྩ་ལས་རང་མེན།

³¹ དེ་འབདཝ་ད་ དེ་ལས་ལྷག་པའི་གསོལ་རས་ཚུ་ཐོབ་ནི་གི་དོན་ལུ་ རེ་འདོད་བསྐྱེད་དགོ་ ང་གིས་ཁྱེད་ལུ་ད་རུང་སྔར་ལས་ལྷག་པའི་ཐབས་ལམ་སྟོན་ནི་ཡོད།།