ཀོ་རཱིན་ཐི་དང་པ་ལེའུ་ 11 - རྫོང་ཁ་

¹ ང་གིས་ཁིརཱིས་ཀྱི་དཔེ་བལྟ་དོཝ་བཟུམ་སྦེ་ ཁྱེད་ཡང་ངེ་གི་དཔེ་བལྟ་ཞིག།

ཨམ་སྲུ་གིས་སྨོན་ལམ་ཞུཝ་ད་མགུ་ཏོ་སྤུབ་དགོ་པའི་སྐོར།

² ཁྱེད་ཀྱི་སྐོར་ལས་ང་གིས་བསྟོད་པ་རྐྱབ་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱིས་ནམ་རང་འབད་རུང་ ང་ལུ་སེམས་ཁར་དྲནམ་ཨིན་ དེ་མ་ཚད་ ང་གིས་སྟོན་མི་ ང་བཅས་ཀྱིས་ཨ་རྟག་འབད་མི་ལུགས་སྲོལ་དེ་ཚུ་ ཁྱེད་ཀྱིས་འབདཝ་ཨིན་མས།

³ དེ་འབདཝ་ད་ ཁྱེད་ལུ་ཨ་ནི་ཤེས་བཅུག་དགོ་མནོ་ཡི་ དེ་ག་ཅི་སྨོ་ཟེར་བ་ཅིན་ ཁིརཱིས་དེ་མི་རེ་རེ་གི་དབུ་ཨིནམ་མ་ཚད་ ཨམ་སྲུ་གི་མགུ་ཏོ་འདི་མོ་རའི་རྨགཔ་ཨིན་ དེ་ལས་དཀོན་མཆོག་ཁིརཱིས་ཀྱི་དབུ་ཨིན།

⁴ སྨོན་ལམ་བཏབ་ད་ ཡང་ན་ལུང་བསྟན་བཤདཔ་ད་ མགུ་ཏོ་སྤུབ་མི་ཕོ་སྐྱེས་དེ་གིས་ རང་གི་མགུ་དམའ་ཕབ་རྐྱབ་ཨིན།

⁵ དེ་འབདཝ་ད་ མིའི་འཛོམས་ས་མགུ་ཏོ་མ་སྤུབ་པར་ སྨོན་ལམ་བཏབ་མི་དང་ ལུང་བསྟན་བཤད་མི་ཨམ་སྲུ་དེ་གིས་ རང་གི་མགུ་ཏོ་དམའ་ཕབ་རྐྱབ་ཨིནམ་མ་ཚད་ མོ་རའི་མགུ་ཏོ་གི་སྐྱ་བཞུར་བཏང་དཔ་བཟུམ་སྦེ་རང་ཨིན།

⁶ ཨམ་སྲུ་ག་ར་འབད་རུང་ སྨོན་ལམ་གྱི་དུས་སྐབས་ལུ་ མགུ་ཏོ་མ་སྤུབ་པ་ཅིན་ མོ་ལུ་སྐྱ་བཏོག་བཅུག་ དེ་འབདཝ་ད་ སྐྱ་བཏོག་ནི་དང་སྐྱ་བཞུར་ནི་དེ་ ཨམ་སྲུ་ཚུ་གི་དོན་ལུ་ ངོ་ཚ་བའི་ལོ་རྒྱུས་ཅིག་ཨིནམ་ལས་ མོ་གིས་རང་གི་མགུ་ཏོ་སྤུབ་དགོ།

⁷ ཕོ་སྐྱེས་ཀྱིས་རང་གི་མགུ་ཏོ་སྤུབ་ནི་མི་འོང་ ག་ཅི་སྨོ་ཟེར་བ་ཅིན་ ཁོ་དཀོན་མཆོག་གི་སྐུ་འདྲ་དང་གཟི་བརྗིད་ཨིན་ དེ་འབདཝ་ད་ ཨམ་སྲུ་དེ་ཕོ་སྐྱེས་ཀྱི་གཟི་བརྗིད་ཨིན།

⁸ ག་ཅི་སྨོ་ཟེར་བ་ཅིན་ འགོ་ཐོག་དང་པ་ཕོ་སྐྱེས་དེ་ ཨམ་སྲུ་ལས་སྦེ་བྱུང་བྱུངམ་མེན་ དེ་འབདཝ་ད་ ཨམ་སྲུ་དེ་ཕོ་སྐྱེས་ལས་སྦེ་འབྱུངམ་ཨིན།

⁹ དེ་མ་ཚད་ ཕོ་སྐྱེས་ཨམ་སྲུ་གི་དོན་ལུ་བཟོ་བཟོཝ་མེན་པར་ ཨམ་སྲུ་ཕོ་སྐྱེས་ཀྱི་དོན་ལུ་བཟོ་བཟོཝ་ཨིན་མས།

¹⁰ དེ་ཚུ་ག་ར་གི་དོན་ལུ་དང་ ཕོ་ཉ་ཚུ་གི་བལྟ་ཡོདཔ་ལས་ ཨམ་སྲུ་གིས་ མོ་རང་ཡང་དབང་ཚད་འོག་ལུ་ཨིན་ཟེར་བའི་རྟགས་མཚན་ལུ་ མོ་རའི་མགུ་ཏོ་སྤུབ་དགོཔ་ཨིན་མས།

¹¹ དེ་སྦེ་ཨིན་ས་ཅིག་རུང་ གཙོ་བོ་ནང་ཨམ་སྲུ་དེ་ཕོ་སྐྱེས་ལས་ རང་དབང་མི་ཐོབ་ དེ་མ་ཚད་ ཕོ་སྐྱེས་ཡང་ཨམ་སྲུ་ལས་རང་དབང་མ་ཐོབ་ཨིན།

¹² ག་ཅི་སྨོ་ཟེར་བ་ཅིན་ འགོ་ཐོག་དང་པ་གི་ཨམ་སྲུ་དེ་ཕོ་སྐྱེས་ལས་འབྱུངམ་ཨིན་ དེ་གི་ཤུལ་ལས་ཕོ་སྐྱེས་ཚུ་ག་ར་ཨམ་སྲུ་ལས་སྐྱེས་སྐྱེསཝ་ཨིན་ ཨིན་རུང་ འདི་ཚུ་ག་ར་དཀོན་མཆོག་ལས་འགྲུབ་འོངམ་ཨིན།

¹³ ཨམ་སྲུ་གིས་མི་འཛོམས་ས་མགུ་ཏོ་མ་སྤུབ་པར་ དཀོན་མཆོག་ལུ་སྨོན་ལམ་ཞུ་ནི་ལེགས་ཤོམ་ཨིན་ན་མེན་ན་ ཁྱེད་རང་དབྱེ་ཞིབ་དཔྱད་དེ་བལྟ་ཞིག

¹⁴ མིའི་རང་བཞིན་ལས་བལྟཝ་ད་ ཕོ་སྐྱེས་ཀྱིས་སྐྱ་རིངམ་སྦེ་བཞགཔ་ད་ ཁོ་རང་བློ་བཙོང་བའི་གཞི་གཅིག་རང་ཨིན་མས་མེན་ན།

¹⁵ དེ་འབདཝ་ད་ ཨམ་སྲུ་ལུ་སྐྱ་རིངམོ་ཡོད་པ་ཅིན་ འདི་མོ་གི་གཟི་བརྗིད་ཨིནམ་མ་ཚད་ ཨམ་སྲུ་གི་སྐྱ་དེ་ མོ་རའི་མགུ་ཏོ་གུ་བཀབ་ནིའི་དོན་ལུ་བྱིན་བྱིནམ་ཨིན་མས།

¹⁶ ག་གིས་རང་འབད་རུང་ འདི་གི་སྐོར་ལས་ རྩོད་པ་རྐྱབ་དགོ་མནོ་བ་ཅིན་ ང་བཅས་ཡང་ནཱ་དཀོན་མཆོག་གི་ཆོས་ཚོགས་ནང་ ལུགས་སྲོལ་གཞན་རྩ་ལས་མེད་ཟེར་སླབ་ནི་ཨིན།།

གཙོ་བོའི་ཚོགས་སྟོན་གྱི་སྐོར།

¹⁷ ད་དེའི་འོག་ལས་མར་གྱི་བཀོད་རྒྱ་ནང་ ང་ཁྱེད་ལུ་བསྟོད་པ་མི་རྐྱབ་ ག་ཅི་སྨོ་ཟེར་བ་ཅིན་ ཁྱེད་ཆ་ཁྱབ་འཛོམས་པའི་སྐབས་ལུ་ ལེགས་ཤོམ་འབད་ནི་ལས་ ཟོགཔ་མང་སུ་འབད་འགྱོཝ་མས།

¹⁸ དང་པ་རང་ ཁྱེད་ཆ་ཁྱབ་ཆོས་ཚོགས་ཀྱི་འཐུས་མི་ཚུ་གཅིག་ཁར་འཛོམས་པའི་སྐབས་ལུ་ ཁྱེད་ཀྱི་སྦུག་ལུ་མ་བསྒྲིགསཔ་བྱུང་སྟེ་ སྡེ་ཚན་མ་འདྲཝ་འདུག་ཟེར་ང་གིས་གོ་ཡི་ བློ་ལ་ལུ་ཅིག་བདེན་པ་ཡང་འོང་ཟེར་མནོ་ཡི།

¹⁹ མ་གཞི་ ཁྱེད་ཀྱི་གྲལ་ཁར་ དཀོན་མཆོག་གི་ཐུགས་དགྱེས་མི་ཚུ་ག་ཨིན་ན་ ངོ་ཤེས་ནིའི་དོན་ལུ་ ཁྱེད་ཀྱི་སྦུག་ལུ་ སྡེ་ཚན་སོ་སོ་སྦེ་འགྱོ་དགོཔ་ ཁག་ཆེ་ཏོག་ཏོ་ཨིན་མས།

²⁰ ཁྱེད་ཆ་ཁྱབ་གཅིག་ཁར་འཛོམས་ཏེ་བཟའ་མི་དེ་ གཙོ་བོའི་ཚོགས་སྟོན་མེན།

²¹ ག་ཅི་སྨོ་ཟེར་བ་ཅིན་ བཟའ་ནི་སྦེ་སྡོདཔ་ད་ གཅིག་དང་གཅིག་ལུ་མ་སྒུག་པར་ བཟའ་ནི་འགོ་བཙུགསཔ་མས་ དེ་ལས་ ལ་ལུ་ཅིག་ཕོཝ་སྟོངམ་ལུས་ ལ་ལུ་ཅིག་ཚད་ལས་བརྒལ་འཐུང་སྟེ་ ཆང་གིས་བཟི་སྡོདཔ་མས།

²² ཁྱེད་ལུ་བཟའ་ནི་དང་འཐུང་ནི་གི་དོན་ལུ་ ཁྱེད་རའི་ཁྱིམ་མེད་ག་ ཡང་ཅིན་ ཁྱེད་ཀྱིས་དཀོན་མཆོག་གི་ ཆོས་ཚོགས་ལུ་ཁུངས་མེདཔ་བཟོཝ་ཨིན་ན་ ཡང་ན་སྤྱང་ཀ་ཚུ་གི་བློ་བཙོངམ་སྨོ་ ད་ང་གིས་ཁྱེད་ལུ་ག་ཅི་སླབ་ནི་ འདི་ཚུ་གི་དོན་ལུ་ཁྱེད་ལུ་བསྟོད་པ་རྐྱབ་འོང་ཟེརཝ་ཨིན་ན་ ང་རྩ་ལས་ཁྱེད་ལུ་བསྟོད་པ་མི་རྐྱབ།

²³ ང་གིས་གཙོ་བོ་ལས་ཐོབ་མིའི་སྟོན་པ་ཚུ་ དེ་ཁྱེད་ལུ་ཡང་སྟོན་བྱིན་ཡི་ ཡེ་ཤུ་དགྲ་གི་ལག་པར་སྤྲོད་པའི་ཕྱི་རུ་ ཁོ་གིས་ཏད་ཟས་ཕྱག་ལུ་བསྣམས་ཏེ།

²⁴ བཀའ་དྲིན་ཆེ་ཟེར་ཞུ་ཞིནམ་ལས་བཅགས་ཏེ་ དེ་ངེ་གི་གཟུགས་ཨིན་ ཁྱེད་ཀྱི་དོན་ལུ་བྱིནམ་ཨིན་ ང་ལུ་སེམས་ཁར་དྲན་ནི་གི་དོན་ལུ་ ཁྱེད་ཀྱིས་དེ་བཟུམ་སྦེ་རང་འབད་དགོ་ཟེར་གསུངས་ནུག

²⁵ འདི་བཟུམ་སྦེ་རང་ ཚོགས་བཞེས་ཚརཝ་ད་ཡེ་ཤུ་གིས་ བཞེས་ཆ་ཕྱག་ལུ་བསྣམས་ཏེ་ ཨ་ནི་བཞེས་ཆ་ནང་ཡོད་མིའི་ཁྲག་དེ་ དཀོན་མཆོག་གི་ཞལ་འཆེས་གསརཔ་འདི་ཨིན་ ནམ་རང་འབད་རུང་ ཁྱེད་ཀྱིས་དེ་འཐུངམ་ད་ ང་ལུ་སེམས་ཁར་དྲན་དགོ་ཟེར་གསུངས་ནུག

²⁶ ག་ཅི་སྨོ་ཟེར་བ་ཅིན་ ཁྱེད་ཆ་ཁྱབ་ ནམ་རང་འབད་རུང་ ཨ་ནི་ཏད་ཟས་ཟ་ ཨ་ནི་བཞེས་ཆ་ནང་ལས་འཐུངམ་ད་ གཙོ་བོ་ལོག་མ་བྱོན་ཚུན་ཚོད་ཀྱི་བར་ན་ ཁྱེད་ཀྱིས་ཁོ་གཤགས་པའི་སྐོར་ལས་ ཁྱབ་བསྒྲགས་འབདཝ་ཨིན།

²⁷ དེ་འབདཝ་ལས་ འོས་འབབ་མེད་པའི་འབད་ཐངས་ཀྱི་ཐོག་ལས་ ཨ་ནི་ཏད་ཟས་བཟའ་ བཞེས་ཆ་ནང་ལས་འཐུང་མི་དེ་ལུ་ གཙོ་བོ་གི་སྐུ་གཟུགས་དང་ སྐུ་ཁྲག་ལུ་མ་གཙངམ་བཟོ་བའི་ཉེས་པ་ཕོག་ནི་ཨིན།

²⁸ ཏད་ཟས་མ་ཟ་བའི་ཧེ་མ་དང་ བཞེས་ཆ་ནང་ལས་མ་འཐུང་པའི་ཧེ་མ་ རང་གིས་རང་ལུ་བརྟག་དཔྱད་འབད་དགོ།

²⁹ ཁིརཱིས་ཀྱི་སྐུ་གཟུགས་ངོ་མ་དེ་ག་ཅི་ཨིན་ན་ ཁྱེད་ཀྱིས་དབྱེ་བ་མ་ཕྱེ་པར་ ཏད་ཟས་དང་བཞེས་ཆ་ནང་ལས་ཟ་འཐུང་འབད་བ་ཅིན་ ཁྱེད་དཀོན་མཆོག་གི་ཉེས་ཆད་ཟ་འཐུང་དོཝ་བཟུམ་སྦེ་རང་ཨིན།

³⁰ གནད་དོན་དེ་ལས་བརྟེན་ཏེ་ ད་རེས་ནངས་པ་ཁྱེད་མང་རབས་ཅིག་ གཟུགས་སྟོབས་མེདཔ་ ནདཔ་འཐོན་ ལེ་ཤ་ཅིག་རང་ཤི་སོང་ཡི་ཟེར་སླབ་ནི་ཨིན།

³¹ དེ་འབདཝ་ད་ ང་བཅས་རང་གིས་རང་ལུ་ལེགས་ཤོམ་སྦེ་ བརྟག་དཔྱད་འབད་དེ་ཟ་འཐུང་འབད་བ་ཅིན་ དཀོན་མཆོག་གིས་ང་བཅས་ལུ་ཁྲིམས་རྩ་ལས་མི་དཔྱད།

³² ཨིན་ས་ཅིག་རུང་ གཙོ་བོ་གིས་ང་བཅས་ལུ་ཁྲིམས་དཔྱད་དེ་འབད་བ་ཅིན་ ང་བཅས་ལུ་སྒྲིགས་བཙུགསཔ་ཨིན་ དེ་ང་བཅས་འཇིག་རྟེན་པ་ཚུ་དང་གཅིག་ཁར་ ཁྲིམས་མ་བཀལ་ནིའི་ཐབས་ལུ་ཨིན།

³³ དེ་འབདཝ་ལས་ངེ་གི་སྤུན་ཆ་ཚུ་ ཁྱེད་གཙོ་བོ་གི་ཚོགས་སྟོན་གྱི་དོན་ལུ་འཛོམས་ད་ བཟའ་འཐུང་ལེན་ནི་གི་ཧེ་མ་ གཅིག་དང་གཅིག་ལུ་བསྒུག་སྡོད།

³⁴ ཁྱེད་དོན་ལས་རང་ ལྟོཝ་བཀྱེསཔ་བཟུམ་ཅིག་འབད་བ་ཅིན་ མ་འཛོམས་པའི་ཧེ་མ་ལས་ ཁྱེད་རའི་ཁྱིམ་ནང་ཟ་སྟེ་འོང་དགོ་ དེ་དཀོན་མཆོག་གི་ཉེས་ཁྲིམས་ཁྱེད་རའི་གུ་འབག་མ་འོང་ནི་དོན་ལུ་ཨིན་ བཀོད་རྒྱ་གཞན་ཚུ་གི་སྐོར་ལས་ ང་ཁྱེད་སྡོད་ས་ལྷོདཔ་ད་ ཁྱེད་ལུ་སྟོན་བྱིན་ནི་ཨིན།།