ཀོ་རཱིན་ཐི་དང་པ་ལེའུ་ 10 - རྫོང་ཁ་

ཨཱིས་ར་ཨཱེལ་གྱི་བྱུང་རབས་ནང་ལས་ཉེན་བརྡ་སྤྲོད་པའི་སྐོར།

¹ ངེའི་སྤུན་ཆ་ཚུ་ ལོ་རྒྱུས་གཅིག་ང་གིས་ཁྱེད་ལུ་ཤེས་བཅུག་དགོ་མནོ་ཡི་ ཧེ་མ་ང་བཅས་ཀྱི་ཕ་བརྒྱུད་དེ་ཚུ་རི་སྟོང་ནང་ལས་ཕར་ ས་སྨུག་གིས་ལམ་སྟོན་འཁྱིད་དེ་ རྒྱ་མཚོ་བརྒལ་བའི་སྐབས་ ས་སྐམ་གུ་ལས་ཕར་གོམ་སྤོ་འགྱོ་དོཝ་བཟུམ་སྦེ་སོང་ཡི།

² ཁོང་ག་ར་ ས་སྨུག་དང་རྒྱ་མཚོ་གི་རྒྱུད་ལས་ ཁྲུས་གསོལ་ཞུ་སྦེ་ མོ་སཱེས་ཀྱི་རྟིང་བདའ་མི་ཚུ་བྱུང་ཡི།

³ དེ་བ་ལྷགཔ་སྦེ་ སེམས་ཉིད་ཀྱི་བཞེས་སྒོ་དེ་ ཁོང་ག་ར་གིས་གཅིག་སྦེ་ཟ།

⁴ སེམས་ཉིད་ཀྱི་ཆུ་དེ་ཡང་ ཁོང་ག་ར་གིས་གཅིག་ལས་འཐུང་ནུག་ ག་ཅི་སྨོ་ཟེར་བ་ཅིན་ ཁོང་དང་གཅིག་ཁར་བྱོན་མི་ཐུགས་ཉིད་ཀྱི་རྡོ་ལས་བཏོན་མི་ཆུ་ ཁོང་གིས་འཐུང་ནུག་ ཨ་ནི་རྡོ་དེ་ ཁིརཱིས་ཁོ་རང་ཨིན་མས།

⁵ ཨིན་རུང་ ཁོང་གི་གྲལ་ཁ་ལས་ ལེ་ཤ་དང་གཅིག་ཁར་ དཀོན་མཆོག་ཐུགས་ཕམ་སྟེ་ ཨ་ནི་མི་ཚུ་རི་སྟོང་ནང་རང་ཤི་བཅུག་ནུག་ཟེར་ ང་གིས་ཁྱེད་ཆ་ཁྱབ་ལུ་དྲན་གསོ་འབད་དགོ་མནོ་ཡི།

⁶ ང་བཅས་རའི་ཕ་བརྒྱུད་ཚུ་བཟུམ་སྦེ་ འདོད་པ་ངན་པ་སྐྱེད་མ་བཅུག་ནི་གི་དོན་ལུ་ དེ་ཚུ་ང་བཅས་ཀྱི་དོན་ལུ་དཔེ་སྦེ་སྟོན་བཞག་ནུག

⁷ ཁོང་ལ་ལུ་གི་སྐོར་ལས་གསུང་རབ་ནང་། མི་དེ་ཚུ་བཟའ་འཐུང་ནི་གི་དོན་ལུ་མར་སྡོད་ དེ་ལས་དཀོན་མཆོག་ངོ་མ་ཤེས་མི་བཟུམ་སྦེ་ སྤྲོ་སྟོན་ནི་སྦེ་ཡར་ལོངས་ནུག་ཟེར་ དེ་སྦེ་བྲིས་ཏེ་འདུག་ ཁོང་བཟུམ་སྦེ་ སྐུ་ལུ་གསོལཝ་བཏབ་ནི་མི་འོང་།

⁸ ང་བཅས་འདོད་སྤྱོད་ཀྱི་ལཱ་འབད་ནི་མེད་ ཁོང་གི་གྲལ་ལས་ལ་ལུ་གིས་ འདོད་སྤྱོད་ཀྱི་ལཱ་འབད་དེ་ ཉིནམ་གཅིག་ལུ་རང་ མི་སྟོང་ཕྲག་ཉི་ཤུ་རྩ་གསུམ་ཤི་སོང་ནུག

⁹ ང་བཅས་ཀྱིས་ཁིརཱིས་ལུ་ཚོད་བལྟ་ནི་མི་འོང་ ཁོང་གི་གྲལ་ལས་ལ་ལུ་གིས་ གཙོ་བོ་ལུ་ཚོད་བལྟ་སྟེ་ སྦུལ་གྱིས་བསད་བཏང་ནུག

¹⁰ ང་བཅས་ཀྱིས་ཁ་སྡུག་འབར་ནི་མི་འོང་ ཁོང་གི་གྲལ་ལས་ལ་ལུ་གིས་ཁ་སྡུག་འབརཝ་ལས་ རྩ་མེད་གཏང་མི་ཕོ་ཉ་གིས་ཁོང་བསད་བཏང་ནུག

¹¹ དེའི་སྐབས་བྱུང་མི་དེ་ ད་རེས་ང་བཅས་ཀྱི་དོན་ལུ་དཔེ་གཅིག་ཨིན་ འདི་ཚུ་གི་སྐོར་ལས་བྲིས་བཞག་མི་དེ་ ང་བཅས་མཐའན་མཇུག་གི་དུས་ཚོད་ནང་སྡོད་མི་ཚུ་གི་དོན་ལུ་ བསླབ་བྱ་བཟུམ་ཅིག་སྦེ་ཨིན།

¹² ག་གིས་རང་འབད་རུང་ ང་སྒྲིང་སྒྲིང་སྦེ་ལོང་སྟེ་ཡོད་ཟེར་མནོ་བ་ཅིན་ མར་འགྱེལ་མ་འགྱོ་བའི་དོན་ལུ་ རིགཔ་བསྒྱིམ་སྟེ་སྡོད།

¹³ མི་གཞན་ལུ་བྱུང་མི་བར་ཆད་དང་ ཁྱེད་ལུ་བྱུང་མི་བར་ནང་ དབྱེ་བ་ག་ནི་ཡང་མེད་ དཀོན་མཆོག་ན་འཐན་ཏོག་ཏོ་ཨིན་ནི་དེ་གིས་ ཁྱེད་ལུ་བཟོད་མ་ཚུགས་པའི་བར་ཆད་ནང་རྩ་ལས་བཙུག་མི་གནང་ ཁྱེད་ལུ་བར་ཆད་རྐྱབ་འོངམ་ད་ ཁོ་གིས་བར་ཆད་སེལ་ཐབས་ལུ་ལམ་སྟོན་གནང་འོང་།

¹⁴ དེ་འབདཝ་ལས་ ངེའི་སྤུན་ཆ་ཚུ་ སྐུ་ལུ་གསོལཝ་བཏབ་ནི་སྤང་སྟེ་སྡོད།

¹⁵ ང་གིས་བློ་རིག་ཅན་ལུ་སླབ་དོ་ ང་གིས་སླབ་མིའི་བློ་དེ་ ཁྱེད་རང་གིས་བརྟག་དཔྱད་འབད།

¹⁶ ང་བཅས་ཀྱིས་གཙོ་བའི་ཏད་ཟས་ཟ་བའི་སྐབས་ བྱིན་རླབས་ཀྱི་བཞེས་ཆ་གི་དོན་ལུ་བཀའ་དྲིན་གཏང་རག་ཕུལ་ཏེ་འཐུངམ་ད་ ང་བཅས་ཀྱིས་ཁིརཱིས་ཀྱི་སྐུ་ཁྲག་ནང་ བཅའ་མར་གཏོགསཔ་ཨིན་མེན་ན་ དེ་ལས་ང་བཅས་ཀྱིས་ཏད་ཟས་དེ་ལུ་བཅགཔ་ད་ ང་བཅས་ཀྱིས་ཁིརཱིས་ཀྱི་སྐུ་གཟུགས་ནང་བཅའ་མར་གཏོགསཔ་ཨིན་མེན་ན།

¹⁷ ང་བཅས་ལེ་ཤ་ཡོད་རུང་ ཏད་ཟས་གཅིག་ཨིན་ སྐུ་གཟུགས་ཡང་གཅིག་ཨིན་ ག་ཅི་སྨོ་ཟེར་བ་ཅིན་ ང་བཅས་ག་ར་གིས་ ཏད་ཟས་གཅིག་ནང་ལུ་བཅའ་མར་གཏོགསཔ་ཨིན།

¹⁸ ད་ ཨཱིས་ར་ཨཱེལ་པ་ཚུ་ལུ་བལྟ་ཞིག་ མཆོདཔ་སྦེ་ཕུལ་མི་ཚོགས་ཟ་མི་ཆ་ཁྱབ་ མཆོད་ཁྲི་གུ་བཅའ་མར་གཏོགསཔ་ཨིན་མས་མེན་ན།

¹⁹ ང་གིས་ག་ཅི་སླབ་སྨོ་ ང་གིས་སླབ་མི་དེ་ སྐུ་ལུ་མཆོད་མི་ཚོགས་དེ་ཕན་ཐོགས་ཡོད་ག་ ཡང་ན་སྐུ་དེ་ཚུ་ངོ་མ་ཨིན་ཟེར་ང་གིས་སླབ་ཅི་ག།

²⁰ དེ་རྩ་ལས་རང་མེན་ ང་གིས་སླབ་མིའི་དོན་དག་དེ་ སྐུ་ལུ་མཆོད་མི་དེ་ དཀོན་མཆོག་ལུ་མེན་པར་ འདྲེ་ལུ་མཆོདཔ་ཨིན་མས་ དེ་འབདཝ་ལས་ ཁྱེད་ག་གིས་རང་འབད་རུང་ འདྲེ་དང་གཅིག་ཁར་བཅའ་མར་གཏོགས་མ་བཅུག་ནི་གི་འདོད་པ་ང་ལུ་ཡོད།

²¹ ཁྱེད་ཆ་ཁྱབ་གཙོ་བོ་གི་བཞེས་ཆ་དང་ འདྲེ་དང་བདུད་ཀྱི་ཕོརཔ་ གཉིས་ཆ་རང་ནང་ལས་འཐུང་མི་ཚུགས་ ཁྱེད་ཀྱིས་གཙོ་བོ་གི་བཞེས་ཁྲི་དང་ འདྲེ་དང་བདུད་ཀྱི་ཅོག་ཙེ་ གཉིས་ཆ་ར་ལས་བཟའ་མི་ཚུགས།

²² ཡང་ན་ང་བཅས་ཀྱིས་གཙོ་བོ་ལུ་ ཐུགས་ཁྲོ་ལང་བཅུག་ནི་ཨིན་ན་ ང་བཅས་ཁོ་ལས་ཤུགས་ཆེ་ཤོས་ཨིན་ན།།

ག་ཅི་རང་འབད་རུང་དཀོན་མཆོག་གི་གཟི་བརྗིད་ཀྱི་དོན་ལུ་འབད་དགོ་པའི་སྐོར།

²³ ལ་ལུ་གིས་ ང་བཅས་ཀྱིས་ག་ར་འབད་ཆོག་པས་ཟེར་སླབ་མས་ ཨིན་རུང་ ང་བཅས་ཀྱི་དོན་ལུ་ ག་ར་ལེགས་ཤོམ་ཅིག་མེན་པས་ དེ་ལས་ཕར་ ག་ར་ཕན་ཐོགས་ཅན་ཅིག་མིན་འདུག་ཟེར་ང་གིས་ཞུཝ་ཨིན།

²⁴ མི་ག་ར་འབད་རུང་ རང་གི་དོན་ལུ་མེན་པར་ གཞན་གྱི་དོན་ལུ་ལེགས་སེམས་མནོ་དགོ།

²⁵ ཤ་ཁང་ནང་ལས་ཤ་ཉོ་ཟཝ་ད་ དཀོན་མཆོག་གི་བཀའ་ལས་འགལ་ནི་ཨིན་ན་མེན་ན་ཟེར་ཐེ་ཚོམ་མ་བསྐྱེད་པར་ཉོ་ཟ།

²⁶ ག་ཅི་སྨོ་ཟེར་བ་ཅིན། འཛམ་བུ་གླིང་དང་འདི་ནང་ཡོད་མི་ ག་ར་དཀོན་མཆོག་ཁོ་རང་གི་ཨིན།

²⁷ དད་པ་མ་སྐྱེད་མི་གཅིག་གིས་ཁྱེད་ལུ་ ཁོ་གི་ཁྱིམ་ནང་མགྱོནམ་སྦེ་འབོ་པ་ཅིན་ ཁྱེད་ཀྱི་གདོང་ཁར་བཀལ་མི་བཞེས་སྒོ་ག་ཅི་རང་ཨིན་རུང་ ཁྱེད་ཀྱིས་ དེ་ཟཝ་ད་ དཀོན་མཆོག་གི་བཀའ་ལས་འགལ་ནི་ཨིན་ན་མེན་ན་ཟེར་ཐེ་ཚོམ་མ་བསྐྱེད་པར་ཟ།

²⁸ དེ་འབདཝ་ད་ མི་ལ་ལུ་ཅིག་གིས་ཁྱེད་ལུ་ དེ་མཆོདཔ་ཕུལ་ཕུལཝ་གི་ཚོགས་ཨིན་ཟེར་སླབ་པ་ཅིན་ སླབ་མི་ཁོ་རའི་དོན་ལུ་དང་ བཀའ་ཁྲིམས་ལས་འགལ་ནི་ཨིན་ན་མེན་ན་ཟེར་ གཞན་ལུ་ཐེ་ཚོམ་བསྐྱེད་མ་བཅུག་ནི་གི་དོན་ལུ་ ཁྱེད་ཀྱིས་མ་ཟ།

²⁹ ཁྱེད་མེན་པར་ མི་གཞན་ལུ་ཐེ་ཚོམ་བསྐྱེད་མ་བཅུག་ནི་གི་དོན་ལུ་ ང་གིས་སླབ་ཨིན་ ཁྱེད་ཀྱིས་ ངེ་གི་རང་དབང་ལུ་ ག་ཅི་འབད་མི་གཞན་གྱི་རྣམ་རིག་གིས་ཐག་གཅད་ནི་སྨོ་ཟེར་སླབ་འོང་།

³⁰ བཞེས་སྒོ་གི་དོན་ལུ་ང་གིས་དཀོན་མཆོག་ལུ་བཀའ་དྲིན་ཕུལ་སྦེ་ཟཝ་ད་ ག་ཅི་འབད་ང་ལུ་ཁ་གཏངམ་སྨོ།

³¹ དེ་འབདཝ་ལས་ ཁྱེད་བཟའ་རུང་འཐུང་རུང་ ཡང་ན་ག་ཅི་རང་འབད་རུང་ དཀོན་མཆོག་གི་གཟི་བརྗིད་ཀྱི་དོན་ལུ་འབད་དགོ།

³² ཡ་ཧུ་ད་པ་ཨིན་རུང་ ཕྱིའི་མི་རིགས་ཨིན་རུང་ དཀོན་མཆོག་གི་ཆོས་ཚོགས་ཨིན་རུང་ མི་ག་ལུ་ཡང་སེམས་ཁར་ཕོག་པའི་ལཱ་མ་འབད།

³³ ང་རའི་ཁེ་ཕན་ལུ་མ་བལྟ་བར་ ང་གིས་ག་ཅི་རང་འབད་རུང་ མི་ལུ་དགའ་བཅུག་ནིའི་དོན་ལུ་འབདཝ་ཨིན་ ག་ཅི་སྨོ་ཟེར་བ་ཅིན་ གཞན་གྱི་ཁེ་ཕན་ལུ་བལྟཝ་ད་ ཁོང་ལེ་ཤ་རང་ཐར་པ་ཐོབ་ནིའི་མཐའ་དོན་ལུ་ཨིན།།