Zaburu 87 - Jula NT of Côte d’Ivoire

Ala ta dugu saninman

¹ Kore dencɛw ta Zaburu. Dɔnkiri. Matigi Ala ka Siyɔn dugu ju sigi kuru saninmanw le kunna.

² Siyɔn dugu donda ko ka di Matigi Ala ye ka tɛmɛ Yakuba ta dugu tɔw bɛɛ kan.

³ E, Ala ta dugu, koba caman fɔra ele ta ko ra!

⁴ Ne bɛna Misirankaw, ani Babilɔnikaw fana tɔgɔ fɔ ne lɔnbagaw ra; ne bɛna Filisikaw, ani Tirikaw, ani Etiyopikaw fana jate, ko olugu worora yan.

⁵ Nka Siyɔn kɔni, a fɔra ko bɛɛ le worora yi; Ala kɔrɔtaninba yɛrɛ le ka nin dugu ju sigi.

⁶ Ni Matigi Ala bɛ siyaw jateda sɛbɛ, a b’a fɔ bɛɛ kelen kelen ta ko ra, ko: «Nin worora yan le!»

⁷ Dɔnkirilabagaw, ani dɔnkɛbagaw bɛɛ b’a fɔ Siyɔn ma ko: «Ne ta ko bɛɛ bɛ bɔ ele le ra.»