Zaburu 82 - Jula NT of Côte d’Ivoire

Ala bɛ kiti tigɛ can kan

¹ Asafu ta Zaburu. Ala bɛ a ta kititigɛjama cɛ ra, a bɛ kiti tigɛ ala tɔw cɛ ra.

² «Aw bɛ kiti minw tigɛ terenbariya kan, ka jo di mɔgɔjuguw ma, aw bɛna o ko dabla tuma juman?

³ Aw ye dɛsɛbagatɔw, ani feritaw ta jo di o ma, aw ye ɲanibagatɔw, ani fagantanw ta kiti tigɛ ni terenninya ye.

⁴ Aw ye dɛsɛbagatɔw ni fagantanw kisi, aw ye o bɔsi ka bɔ mɔgɔjuguw boro.

⁵ «O tɛ foyi lɔn, o tɛ foyi faamu, o bɛ tagama dibi le ra; sabu dunuɲa kɔnɔ, terenninya jusiginanw bɛɛ jɛngɛra ka bɔ o nɔ ra.

⁶ Ne tun k’a fɔ aw ma ko aw ye alaw ye, ko aw bɛɛ ye Ala kɔrɔtaninba dencɛw le ye.

⁷ Nka aw fana bɛna sa i ko adamadenw, aw bɛna ben i ko dunuɲa kuntigi tɔw.»

⁸ E, Ala, i wuri ka dunuɲa ta kiti tigɛ, sabu siyaw bɛɛ ye ele ta le ye!