Zaburu 52 - Jula NT of Côte d’Ivoire

Naforo kanubagajugu labancogo

¹ Dɔnkirilabagaw kuntigi. Dawuda ta dɔnkiri.

² A ka nin dɔnkiri la wagati min na Edɔmukacɛ Dɔgi tagara a fɔ Sawuli ye ko Dawuda tagara Ayimelɛki ta so.

³ Ele cɛfari, mun kosɔn i bɛ i yɛrɛ tando i ta kojugu kosɔn, k’a sɔrɔ Ala ta ɲumanya tɛ ban ka ye?

⁴ I nɛnkun bɛ cɛnri kɛ i ko muru dadiman; i bɛ janfaw siri.

⁵ Kojugu ka di i ye ka tɛmɛ koɲuman kan, faninya ka di i ye ka tɛmɛ can kan.

⁶ Mɔgɔ halakikumaw dama le ka di i ye, ele mɔgɔ nɛnkun nanbaratɔ!

⁷ O kosɔn Ala bɛna ele halaki pewu; a bɛna i mina, ka i sama ka bɔ i ta bon kɔnɔ, ka i lilinw bɔn, ka i bɔ dunuɲa ra mɔgɔ ɲanamanw cɛ ra pewu.

⁸ Mɔgɔ terenninw bɛna o ye ka siran; o bɛna yɛrɛko i ma, k’a fɔ ko:

⁹ «Mɔgɔ min tun ma sɔn ka Ala kɛ a dogoyɔrɔ ye, ale le ye nin ye; a tun k’a jigi la a ta naforoba le kan, ka baraka sɔrɔ a ta kɛwalejugu baraka ra.»

¹⁰ Nka ne kɔni, ne bɛ Ala ta so kɔnɔ i ko oliviyesun nugunin; ne jigi bɛ Ala ta ɲumanya kan wagati bɛɛ, ani tuma bɛɛ.

¹¹ Ne bɛ i fo ka i waleɲumanlɔn wagati bɛɛ, i ta kokɛninw kosɔn; ne jigi bɛ i tɔgɔ kan, sabu i ka ɲi i ɲasiranbagaw ma.