Zaburu 30 - Jula NT of Côte d’Ivoire

Ala le ye kɛnɛyari kɛbaga ye

¹ Zaburu. Dɔnkiri min tun bɛ la ka Alabatosokura karifa Ala ma. Dawuda ta Zaburu.

² E, Matigi Ala, ne bɛ i tɔgɔ kɔrɔta, sabu i ka ne lawuri; i ma sɔn k’a to ne juguw ye yɛrɛko ne ma.

³ Matigi Ala, ne ta Ala, ne ka i wele ko i ye ne dɛmɛ, i fana ka ne kɛnɛya.

⁴ E, Matigi Ala, i ka ne nin tanga saya ma; o bɛ minw lajigi kaburu kɔnɔ, i ka ne kisi ka bɔ olugu cɛ ra.

⁵ Aw Alaɲasiranbagaw, aw ye dɔnkiri la ka Matigi Ala tando. Aw y’a fo k’a waleɲumanlɔn, ka aw hakiri to a tɔgɔ saninman na,

⁶ sabu a ta dimi bɛ wagati dɔɔnin dɔrɔn le kɛ, nka a ta nɛɛma bɛ to mɔgɔ kan a si bɛɛ ra. Ni wulada kɛra kasi ye, sɔgɔmada bɛ kɛ ɲagari ye.

⁷ Ne kɔni ɲasumaninba tun b’a fɔra ko: «Foyi le tɛna ne bɔ ne nɔ ra fiyewu!»

⁸ Matigi Ala, ne ko tun diyara i ye minkɛ, i tun ka ne sabati ka ne lɔ i ko kuru barakaman; nka i nana i ɲada dogo ne ra minkɛ, ne jigi tigɛra.

⁹ Matigi Ala, ne ka ele le wele; ne ka makarikanw fɔ Matigi ye.

¹⁰ Ele bɛna mun nafa le sɔrɔ ne ta saya ra? Ka ne su lajigi kaburu kɔnɔ, ele ta nafa juman le bɛ o ra? Yala dugukolo buguri bɛ se ka i fo ka i waleɲumanlɔn wa? A bɛ se ka i ta kankelentigiya lakari wa?

¹¹ Ne lamɛn, Matigi Ala, i ye makari ne ra! E, Matigi Ala, ne dɛmɛ!

¹² I ka ne ta jusukasi yɛlɛma k’a kɛ dɔn ye; i ka ne ta ɲanasisifaniw bɔ ne ra, ka ɲanagbɛfaniw don ne ra;

¹³ janko ne ye dɔnkiri la ka i tando ni ne jusukun bɛɛ ye, ne kana je. Matigi Ala, ne ta Ala, ne bɛna i fo ka i waleɲumanlɔn wagati bɛɛ.