Zaburu 145 - Jula NT of Côte d’Ivoire

Ala ta bonya ni a ta ɲumanya

¹ Ala tandori dɔnkiri. Dawuda ta Zaburu. Ne bɛ i tɔgɔ kɔrɔta, ne ta Ala, ne ta Masa! Ne bɛ baraka la i tɔgɔ ye wagati bɛɛ, ani tuma bɛɛ.

² Lon o lon ne bɛna baraka la i ye, ne bɛna i tɔgɔ tando wagati bɛɛ, ani tuma bɛɛ.

³ Matigi Ala ka bon, a ka kan ni tandori ye kosɛbɛ, a ta bonya dan tɛ lɔn.

⁴ Durujaw bɛɛ ye i ta kɛwalew bonya ko fɔ ɲɔgɔn ye, o ye i ta kobaw lakari,

⁵ ka i ta bonyaba nɔɔrɔman ko fɔ. Ne bɛ miiri i ta kɛwale kabakomanw ra.

⁶ Mɔgɔw bɛna i ta baraka ko fɔ, sabu siranyafɛnba lo; ne fana bɛna i ta bonya lakari.

⁷ O bɛna o hakiri to i ta koɲumanbaw ra ka o lakari, ka ɲagari ni kanba ye ka i ta terenninya ko fɔ.

⁸ Matigi Ala bɛ makari, a bɛ hina, a tɛ dimi joona, a ta ɲumanya ka bon.

⁹ Matigi Ala ka ɲi mɔgɔ bɛɛ ma, a ta hina bɛ se a ta danfɛnw bɛɛ ma.

¹⁰ Matigi Ala, i ta danfɛnw bɛɛ bɛ i fo ka i waleɲumanlɔn, i ɲasiranbagaw bɛɛ bɛ baraka la i ye.

¹¹ O bɛ i ta masaya nɔɔrɔ ko fɔ, ka i ta sebagaya lakari,

¹² janko adamadenw ye i ta kobaw lɔn, ani i ta masaya ta bonya nɔɔrɔman.

¹³ I ta masaya ye masaya wuribari le ye, i ta fanga bɛ yi wagati bɛɛ, ani tuma bɛɛ. Matigi Ala bɛ a ta darakan bɛɛ dafa, a bɛ ɲumanya kɛ a ta danfɛnw bɛɛ ye.

¹⁴ Matigi Ala bɛ mɔgɔ benninw lawuri, a bɛ mɔgɔ dɛsɛninw bɛɛ lawuri.

¹⁵ Danfɛnw bɛɛ ɲa lɔnin bɛ ele le ra, ele le bɛ o ta domuni di o ma a wagati ra.

¹⁶ I bɛ i boro foni, ka ninmanfɛnw bɛɛ fa o sago ma.

¹⁷ Matigi Ala terennin lo a ta kow bɛɛ ra, a bɛ a ta kokɛtaw bɛɛ kɛ ni ɲumanya ye.

¹⁸ Matigi Ala bɛ to a welebagaw bɛɛ kɛrɛ fɛ, minw bɛɛ b’a wele ni can ye o jusukun na.

¹⁹ A b’a ɲasiranbagaw bɛɛ diyanyakow kɛ o ye, a bɛ o kulekan mɛn, ka o kisi.

²⁰ Matigi Ala bɛ a kanubagaw bɛɛ mara, nka a bɛna mɔgɔjuguw halaki.

²¹ Matigi Ala tandorikan le ye sɔrɔ ne da ra; danfɛn bɛɛ ye baraka la a tɔgɔ saninman kan wagati bɛɛ, ani tuma bɛɛ!