Zaburu 141 - Jula NT of Côte d’Ivoire

Mɔgɔjugu bɛ mina a yɛrɛ ta jɔ ra

¹ Dawuda ta Zaburu. Matigi Ala, ne bɛ i wele, i teliya ka na ne fɛ! Ni ne bɛ i wele, i ye i toro malɔ ka ne kan lamɛn!

² A to ne ta daariri ye diya i ye i ko wusunan saraka; ni ne ka ne boro kɔrɔta i nɔ fɛ, o ye diya i ye i ko wulafɛsaraka!

³ Matigi Ala, ne da kɔrɔsi kumajugu ma, ne dagbolow tanga kumajugu ma!

⁴ I kana a to ne jusukun ye sama kojugu nɔ fɛ, ne kana ne sen don kɛwalejuguw ra, ne kana kori ni mɔgɔ terenbariw ye, ne kana o ta ɲanagbɛ domuni dɔ domu!

⁵ Mɔgɔ terennin ye ne bugɔ, o ye koɲuman le ye; ni a ka ne jaraki, o bɛ i n’a fɔ a ka turu le kɛ ne kun na. Ne tɛ ban o turu ma; nka tuma bɛɛ ne ta Aladaari ye ko mɔgɔjuguw ta kow kana ɲa.

⁶ Ala y’a to o ye o ta kititigɛbagaw mina ka o firi farakuruw kan! Ni o kɛra, o bɛna ne kumakan lamɛn k’a lɔn ko ne ta kumaw ka di.

⁷ Mɔgɔ sɛnɛkɛtɔ bɛ dugukolo ci k’a yɛrɛgɛ cogo min na, o kolow bɛna yɛrɛgɛ o cogo le ra kaburu da ra.

⁸ Nka ne ɲa lɔnin bɛ ele le ra, Matigi Ala, ne Matigi; ne bɛ ne yɛrɛ karifa ele le ma, i kana ne nin labla saya ye!

⁹ O ka jan min la ne ye, ne tanga o ma; ne tanga mɔgɔ terenbariw ta minarijanw ma!

¹⁰ Mɔgɔjuguw ye mina o yɛrɛ ta jɔw ra, nka ne ye tɛmɛ, foyi kana ne sɔrɔ.