Zaburu 138 - Jula NT of Côte d’Ivoire

Bɛɛ ye Ala fo k’a waleɲumanlɔn

¹ Dawuda ta Zaburu. Ala, ne bɛ i fo ka i waleɲumanlɔn ni ne jusukun bɛɛ ye, ne bɛ dɔnkiri la ka i tando i ta danfɛn saninmanw ɲa kɔrɔ.

² Ne bɛ ne kinbiri gban i ta batoso saninman kɔnɔ, ka i tɔgɔ fɔ ka i fo ka i waleɲumanlɔn i ta ɲumanya ni i ta kankelentigiya kosɔn; sabu i ka i tɔgɔ bonya ka tɛmɛ fɛn bɛɛ kan, ka i darakumaw bɛɛ dafa.

³ Lon min ne ka i wele, i ka ne jaabi; i ka ne ja gbɛlɛya, ka baraka don ne ra.

⁴ Matigi Ala, ni dunuɲa masaw nana i ta kumaw mɛn ka bɔ i yɛrɛ da ra, o bɛɛ ye i fo ka i waleɲumanlɔn!

⁵ O ye dɔnkiri la ka Matigi Ala ta kow lakari, sabu Matigi Ala ta nɔɔrɔ ka bon.

⁶ Matigi Ala kɔrɔtanin lo, nka a ɲa bɛ mɔgɔ majigininw na; a bɛ mɔgɔ yadaninw fana ye fɔ yɔrɔjan, ka o lɔn.

⁷ Hali ni ne degura kosɛbɛ, i bɛ ne nin tanga; i bɛ i boro bɔ ka ne bɔsi ne juguw ta dimi ma, ka ne kisi ni i boro barakaman ye.

⁸ Matigi Ala bɛ ko bɛɛ kɛ ne ye k’a dafa. E, Matigi Ala, i ta ɲumanya tɛ ban ka ye! I yɛrɛ boro ka baara min kɛ, i kana i kɔ don o ra.