Zaburu 132 - Jula NT of Côte d’Ivoire

Ala bɛ baraka don a ta masacɛ ra

¹ Ala ta batoso yɛlɛnsira ta dɔnkiri. E, Matigi Ala, i hakiri to Dawuda ra; i hakiri to a ta sɛgɛ bɛɛ ra.

² A karira Matigi Ala ye, ka nin dajuru ta Yakuba ta Ala fangatigi ye, ko:

³ «Ne tɛna don ne ta bon kɔnɔ, ne tɛna la ne ta lanan kan,

⁴ ne tɛna a to sunɔgɔ ye don ne ɲa ra, ne tɛna ne ɲa tugu ka jingɔ,

⁵ fɔ ne ye yɔrɔ dɔ sɔrɔ Matigi Ala ye, fɔ ne ye sigiyɔrɔ sɔrɔ Yakuba ta Ala fangatigi ye.»

⁶ A flɛ, an ka jɛnɲɔgɔnya kɛsu ko mɛn Efirata; an tagara a sɔrɔ Yahari kongokɔnɔyɔrɔw ra.

⁷ «An ye taga a ta so! An y’an kinbiri gban a sen kɔrɔ k’a bato!»

⁸ E, Matigi Ala, i wuri, i ye na i ta laganfiyayɔrɔ ra, i ni i ta jɛnɲɔgɔnya kɛsu barakaman!

⁹ I ta sarakalasebagaw ye terenninya kɛ o kannaderege ye, i ɲasiranbagaw ye ɲagari fɔ ka pɛrɛn!

¹⁰ I ta jɔncɛ Dawuda kosɔn, i kana i kɔ di i ta mɔgɔ ɲanawolomanin ma.

¹¹ Matigi Ala karira Dawuda ye can kan, a fana tɛna a ta kuma yɛlɛma; a ko: «I yɛrɛ woroden dɔ, ne bɛna o le sigi i ta masasiginan kan i nɔ ra.

¹² Ni i denw ka ne ta jɛnɲɔgɔnya sira tagama, ani ne ka ci minw yira o ra, ni o ka o kɛ, o tuma olugu yɛrɛ fana ta denw bɛna sigi i ta masasiginan kan tuma bɛɛ.»

¹³ Sabu Matigi Ala ka Siyɔn dugu le ɲanawoloma; o yɔrɔ ko le diyara a ye, a ko a bɛ o kɛ a sigiyɔrɔ ye.

¹⁴ A ko: «Nin le ye ne ta laganfiyayɔrɔ ye tuma bɛɛ; ne bɛna sigi nin yɔrɔ le ra, sabu a ko diyara ne ye.

¹⁵ Ne bɛna baraka don o ta simanw na kosɛbɛ, ne bɛna domuni di o ta fagantanw ma ka o fa.

¹⁶ Ne bɛna kisiri kɛ o ta sarakalasebagaw kannaderege ye; o ta Alaɲasiranbagaw bɛna ɲagari fɔ ka pɛrɛn.

¹⁷ O yɔrɔ le ra, ne bɛna Dawuda ta fanga lawuri; ne ta mɔgɔ ɲanawolomanin ta fitina mananin bɛna to.

¹⁸ Ne bɛna maroya kɛ a juguw kannaderege ye, nka ale ta masafugula bɛna manamana!»