Zaburu 126 - Jula NT of Côte d’Ivoire

Ala bɛ hɛra lasekɔ a ta mɔgɔw ma

¹ Ala ta batoso yɛlɛnsira ta dɔnkiri. Wagati min Matigi Ala tun ka Siyɔn dugu ta bonya lasekɔ a ma tuun, a tun kɛra anw ɲa na i ko siko.

² An yɛrɛkora kosɛbɛ, an ɲagarira fɔ ka pɛrɛn. O tuma o tun b’a fɔra siyaw cɛ ra ko: «Matigi Ala ka kobaw kɛ o ye dɛ!»

³ Matigi Ala ka koba kɛ anw ye, o kosɔn an bɛ ninsɔndiya.

⁴ Matigi Ala, an ta bonya lasekɔ an ma, i ko kɔji min bɛ woyo woroduguyanfan kongokolon kɔnɔ.

⁵ Minw ɲajibɔtɔ bɛ danni kɛ, olugu ɲagarininba le bɛna siman tigɛ.

⁶ Minw kasitɔ bɛ bɔ ni siman ye o boro ka taga a dan, olugu ɲagarininba bɛ sekɔ ni siman tigɛnin ye o boro.