Zaburu 10 - Jula NT of Côte d’Ivoire

Ala le bɛ ɲanibagatɔw bɔsi

¹ E, Matigi Ala, mun kosɔn i k’a i yɛrɛ mabɔ ne ra? Mun kosɔn i bɛ dogo ne ra ne ta degu wagatiw ra?

² Mɔgɔjugu ni a ta yɛrɛbonya bɛ ɲanibagatɔw tɔɔrɔra; a ka dabarijugu minw siri, a bɛna o mina ni o le ye.

³ Mɔgɔjugu b’a yɛrɛ tando, sabu ko min miiriya tun b’a jusukun na, a ka o sɔrɔ; ale mɔgɔ nataba bɛ Matigi Ala nɛni, k’a mafiyɛnya.

⁴ Mɔgɔjugu bɛ yada, fɔ k’a fɔ ko: «Ala tɛ yi!» A ta miiriya bɛɛ bɛ o le ye.

⁵ A ta kow bɛ ɲa a boro tuma bɛɛ; i ta kolatigɛninw si tɛ se a ma, a b’a juguw bɛɛ fiyɛ ka bɔ yi.

⁶ A b’a fɔ a yɛrɛ kɔnɔ ko: «Foyi tɛ se ka ne bɔ ne nɔ ra! Kojugu si tɛna ne sɔrɔ ka ye fiyewu!»

⁷ Mɔgɔdangakanw dɔrɔn le bɛ a da ra, ani nanbara ni tɔɲɔri; kumajuguw, ani terenbariyakumaw le b’a nɛnkun kan.

⁸ A bɛ dogo dugu kɔ fɛ ka mɔgɔw kɔnɔ, a bɛ to yɔrɔ dogoninw na ka baga mɔgɔ jarakibari ma k’a faga; a bɛ dogo ka dɛsɛbagatɔw kɔnɔ.

⁹ A bɛ dogo ka mɔgɔw kɔnɔ, i ko jara bɛ dogo a ta dinga kɔnɔ cogo min na, a bɛ dogo ka ɲanibagatɔ kɔnɔ, a bɛ ɲanibagatɔ sama k’a don a ta jɔ ra, k’a mina.

¹⁰ A bɛ biri, ka sonzori, ka dɛsɛbagatɔ dɛndɛn fɔ k’a mina.

¹¹ Ni o kɛra, a b’a fɔ a yɛrɛ kɔnɔ ko: «E, Ala ɲinana! Ala k’a ɲa datugu, a tɛ foyi yera!»

¹² E, Matigi Ala, i wuri! E, Ala, i boro kɔrɔta! I kana ɲina ɲanibagatɔw kɔ.

¹³ Mun na mɔgɔjugu bɛ Ala mafiyɛnyara tan? Mun kosɔn a b’a fɔra a yɛrɛ kɔnɔ ko: «Ala tɛna foyi kɛ ne ra!»

¹⁴ Nka ele Ala le bɛ fɛn bɛɛ yera! Minw bɛ sɛgɛ ra, ani dimi bɛ minw kan, i ɲa bɛ olugu ra. Ko bɛɛ bɛ ele le boro. Dɛsɛbagatɔ b’a yɛrɛ karifa ele le ma, ele le ye ferita dɛmɛbaga ye.

¹⁵ Mɔgɔjugu kojugukɛbaga boro kari! A ta kojuguw hakɛ bɔ a ra fɔ ka taga a halaki ka ban pewu!

¹⁶ Matigi Ala le ye Masa ye tuma bɛɛ, ani wagati bɛɛ, a bɛna Alaɲasiranbariw bɛɛ halaki ka bɔ a ta dugukolo kan.

¹⁷ E, Matigi Ala, ɲanibagatɔw bɛ min fɛ, ele le bɛ o kɛ o ye, i bɛ o ja gbɛlɛya, ka i toro malɔ ka o lamɛn,

¹⁸ ka feritaw, ani sɛgɛbagatɔw ta jo di o ma, janko adamadenw kana to ka o ta jagboyafanga sigi mɔgɔw kan tuun ka o degu.