Yeremi 14 - Jula NT of Côte d’Ivoire

Yeremi ka Ala daari sanji ko ra

¹ Matigi Ala ka kuma min lase Yeremi ma sanjinabariya ko ra, o le ye nin ye:

² «Zuda bɛ maɲumankokasi kɛra, o ta duguw benbenna; mɔgɔw jusu kasinin sigisiginin bɛ dugu ma; kasikan le bɛ bɔra Zeruzalɛmu dugu kɔnɔ.

³ Matigicɛw bɛ o ta baaradenw ci ka taga ji ɲini; olugu bɛ taga kɔlɔnda ra, nka o tɛ ji sɔrɔ. O bɛ sekɔ ni o ta minan lakolon ye, o kɔnɔnɔfirinin ni o jigi tigɛnin bɛ o kun datugu ka sekɔ ka na.

⁴ Dugukolo jara fɔ k’a pɛrɛnpɛrɛn, sabu sanji tɛ benna jamana kɔnɔ. Sɛnɛkɛbagaw jigi tigɛra, fɔ o bɛ o kun datugu.

⁵ Hali minanmuso bɛ den woro kongo kɔnɔ ka taga k’a to yi, sabu bin tɛ yi.

⁶ Kongofaliw bɛ lɔlɔ fara kongoriw kunna, ka to ka fɔɲɔ mina i ko kongowuruw; o ɲadenw baraka banna sabu bin tɛ yi.»

⁷ Mɔgɔw ko: «E, Matigi Ala, hali ni an ta terenbariya ka an jaraki, an dɛmɛ i tɔgɔ kosɔn! An ta lanabariya bonyara, an ka jurumun kɛ, ka i hakɛ ta.

⁸ Ele le ye Izirayɛli jigi ye, ele le ye a bɔsibaga ye a degu wagatiw ra. Mun kosɔn i bɛna kɛ jamana kɔnɔ i ko lonan, i ko dugutagabaga min bɛ na su kelen dɔrɔn si, ka taga?

⁹ Mun kosɔn i bɛ kɛ i ko mɔgɔ min dabari bɛɛ banna, i ko kɛrɛkɛcɛfari min tɛ se ka mɔgɔ kisi? O bɛɛ n’a ta, Matigi Ala, i bɛ an cɛ ra, ele tɔgɔ le bɛ an na; i kana ban an na!»

Ala ma sɔn ko Yeremi ye daariri kɛ mɔgɔw ye

¹⁰ Matigi Ala bɛ min fɔ nin mɔgɔw ma, o ye, ko: «Can ra, yaala ka di o ye. O sen tɛ to yɔrɔ kelen na; o kosɔn Matigi Ala tɛ o fɛ tuun. Sisan kɔni, a bɛna a hakiri to o ta terenbariyaw ra, ka o ta jurumunw hakɛ bɔ o ra.»

¹¹ Matigi Ala k’a fɔ ne ye tuun ko: «I kana daariri kɛ nin mɔgɔw ye ko ne ye koɲuman kɛ o ye.

¹² Hali ni o ka sun don ka ne daari, ne tɛna o kasikan lamɛn. Ni o ka saraka jɛnitaw* ni siman sarakaw* bɔ ne ye, ne tɛna sɔn o ra. Ne bɛna o halaki ni kɛrɛkɛmuru, ni kɔngɔ, ni banajuguw ye.»

¹³ Ne ko: «E, Dunuɲatigi Ala, a flɛ, ciraw b’a fɔra o ye ko: ‹Kɛrɛ tɛna ben aw kan, kɔngɔ fana tɛna ben aw kan, sabu Ala bɛna hɛra ɲanaman le di aw ma nin yɔrɔ ra yan.› »

¹⁴ Matigi Ala ka ne jaabi ko: «Ciraw bɛ faninya le fɔra ne tɔgɔ ra. Ne ma o ci, ne ma foyi fɔ o ye, ne ma kuma don o da ra; faninya sikow, ani kuma gbansanw, ani mɔgɔlafirikuma minw bɛ bɔ o yɛrɛ ta miiriya ra, o bɛ o cirayakumaw le fɔra aw ye.

¹⁵ O kosɔn nin cira minw bɛ kumana ne tɔgɔ ra k’a sɔrɔ ne ma o ci, k’a fɔ ko kɛrɛ tɛna kɛ nin jamana ra, walama kɔngɔ, Matigi Ala bɛ min fɔ o ciraw kama, o ye nin ye: Kɛrɛkɛmuru ni kɔngɔ le bɛna o ciraw halaki.

¹⁶ O bɛ o cirayakumaw fɔra mɔgɔ minw ye fana, kɔngɔ ni kɛrɛkɛmuru bɛna olugu faga ka o suw benben Zeruzalɛmu dugukɔnɔsiraw ra; olugu yɛrɛ o, o ta musow o, o dencɛw o, o denmusow o, mɔgɔ tɛna sɔrɔ ka o si su don. Ne bɛna o ta juguya ben o yɛrɛ kan.»

Yeremi ka yafamadaari kɛ

¹⁷ Nin kuma fɔ o ye, ko: «Ne ɲaji ye jigi su ni tere, a kana lɔ ka ye, sabu kojuguba benna ne ta dugumɔgɔw kan, banajuguba dɔ le benna o kan.

¹⁸ Ni ne ka taga kongo kɔnɔ, kɛrɛkɛmuru ka minw faga, olugu suw bɛ yi; ni ne ka don dugu kɔnɔ, kɔngɔ ka minw mina fɔ ka o halaki, olugu bɛ yi. Ciraw, ani sarakalasebagaw bɛ yaala jamana kɔnɔ, nka o tɛ foyi faamu nin kow ra.»

¹⁹ Mɔgɔw ko: «E, Ala, yala i banna Zuda jamana ra pewu le wa? Yala Siyɔn dugu lɔgɔ bɔra i ra le wa? Mun kosɔn i ka tɔɔrɔ ben an kan, k’a to fla tɛ sɔrɔra an ta tɔɔrɔ ra? An tun bɛ hɛra le makɔnɔna, nka a ma na ɲa; an tun bɛ an ta tɔɔrɔw nɔgɔyawagati le makɔnɔna, nka o nana kɛ jatigɛba le ye.

²⁰ E, Matigi Ala, an lɔra an ta juguya ra, ani an bɛmaw ta terenbariya; sabu an ka jurumun kɛ ka i hakɛ ta.

²¹ A kɛ i tɔgɔ kosɔn, i kana ban an na; i kana i ta masasiginan nɔɔrɔman mafiyɛnya! I hakiri to an na, i kana an ni i ta jɛnɲɔgɔnya cɛn.

²² Siya tɔw ta batofɛn gbansanw bɛɛ ra, o ra juman kelen le bɛ se ka sanji laben? Yala sankolo bɛ se ka sanji lana a yɛrɛ ma wa? Ele tɛ wa, ele Matigi Ala, an ta Ala? An jigi bɛ i kan, sabu ele le bɛ nin kow bɛɛ kɛbaga ye.»