Yeremi 12 - Jula NT of Côte d’Ivoire

Yeremi ta ɲininkari

¹ «E. Matigi Ala, ele terennin lo tuma bɛɛ; ne bɛ se ka sɔsɔri kɛ ni ele ye cogo di? O bɛɛ n’a ta, ne bɛna i ɲininka i ta terenninya ko ra: Mun le kosɔn mɔgɔjuguw ta kow bɛ ɲa o boro dɛ? Mun le kosɔn janfamɔgɔw siginin bɛ to ɲasuma ra?

² I ka o lalaga ka o turu, fɔ o ka lilinw don; o bɛ wuri ka ɲa fɔ ka den. I tɔgɔ bɛ o da ra tuma bɛɛ, k’a sɔrɔ o ta miiriya yɔrɔ ka jan i ra.

³ Matigi Ala, ele kɔni ka ne lɔn, i ɲa bɛ ne ra; i ka ne sɛgɛsɛgɛ, k’a lɔn ko ne jusukun ta miiriyaw bɛɛ bɛ ele le kan. Mɔgɔjuguw mina i ko sagaw, i ye taga ni o ye fagariyɔrɔ ra; o bla danna fagarilon kama!

⁴ «Jamanadenw ta sukasi bɛna ban tuma juman le sa? Kongobinw bɛɛ bɛna nugu tuma juman le tuun? O bɛɛ kɛra jamana mɔgɔw yɛrɛ ta juguya le kosɔn. Bɛganw, ani kɔnɔw bɛɛ bɛ halakira, sabu mɔgɔw b’a fɔra ko: ‹An laban bɛna kɛ min ye, Ala tɛ o lɔn.› »

Ala ta jaabiri

⁵ «Ni sennamanw ta bori ka ele sɛgɛ, o tuma i bɛna se ka bori ni sotigiw ye cogo di? Ni ele hakiri tɛ sigi fɔ i ye kɛ yɔrɔ laganfiyanin le ra, o tuma ni i nana taga sigi Zuridɛn baji ta mankanw cɛ ra don?

⁶ Sabu hali i yɛrɛ balemaw, ani i ta somɔgɔw, olugu fana bɛ i janfara; o bɛ o kan kɔrɔta ka i kɔrɔfɔ. O kosɔn i kana la o ra, hali ni o bɛ kumadimanw fɔra i ye.»

Ala k’a kɔ don a ta batoso ni a ta mɔgɔw ra

⁷ «Ne ka ne kɔ don ne ta batoso ma, ne banna ne ta mɔgɔw ra; ne tun bɛ minw kanu ni ne jusukun bɛɛ ye, ne ka olugu le labla o juguw ye.

⁸ Ne ta mɔgɔw kɛra ne fɛ i ko jara bɛ cogo min na kongo kɔnɔ. O bɛ pɛrɛnna ne kunna, o le kosɔn ne ka o kɔninya.

⁹ Yala ne ta mɔgɔw kɛra ne fɛ i ko jori nɔw bɛ duga min na, fɔ duga tɔw bɛna a lamini fan bɛ ra wa? Aw ye taga kongosogow bɛɛ lajɛn, o ye na domuniba kɛ!

¹⁰ Bɛganmarabaga caman ka ne ta rɛzɛnforo cɛn, o ka ne ta foro dɔndɔn; o ka ne diyanyaforo yɛlɛma k’a kɛ yɔrɔ lakolonba ye.

¹¹ O k’a cɛn k’a kɛ yɔrɔ lakolon ye; o kasibagatɔ le bɛ ne ɲa kɔrɔ, sabu o ta yɔrɔ kɛra yɔrɔ lakolon ye. Jamana bɛɛ cɛnna, sabu mɔgɔ tɛ yi min b’a janto a ra.

¹² «Cɛnrikɛbagaw bɛ nana ka bɔ kongokolon kuruw bɛɛ kunna; sabu Matigi Ala ta kɛrɛkɛmuru bɛna cɛnri kɛ, k’a ta jamana fan kelen na ka taga a bla a fan dɔ ra. Danfɛn si tɛna ɲasuma sɔrɔ.

¹³ O ka siman dan, ka na ŋani kan siman nɔ ra; o ma tɔnɔ sɔrɔ o ta sɛgɛ ra. Aw ta simantigɛ bɛna maroya bla aw ra, sabu Matigi Ala dimina aw kɔrɔ kosɛbɛ!»

Ala bɛna min kɛ Izirayɛli sigiɲɔgɔnw na

¹⁴ Matigi Ala ko: «Ne ka jamana min di Izirayɛlimɔgɔw ma, ne ta mɔgɔw, k’a kɛ o ta ye, ne sigiɲɔgɔnjugu minw bɛɛ sera o jamana ma, ne bɛna olugu bɛɛ lawuri ka bɔ o ta jamanaw ra, ka Zuda mara mɔgɔw fana labɔ o cɛ ra.

¹⁵ Nka o lawurinin kɔ, ne belen bɛna hina o ra tuun, ka o bɛɛ kelen kelen lasekɔ o sigiyɔrɔ ra, ka o bɛɛ kelen kelen lasekɔ o ta jamana ra.

¹⁶ Ni o ka ne ta mɔgɔw ta tagamacogo ladegi ka ɲa, ka kari ni ne tɔgɔ ye k’a fɔ ko: ‹An bɛ kari Matigi Ala ɲanaman tɔgɔ ra›, i n’a fɔ o tun ka ne ta mɔgɔw karan ko o ye kari Baali* ta jo tɔgɔ ra cogo min na, o tuma o bɛna sigiyɔrɔ sɔrɔ ne ta mɔgɔw cɛ ra.

¹⁷ Nka ni siya min ma ne lamɛn, ne bɛna o siya gbɛn ka bɔ a ta jamana ra, ka o gbɛn, ka o halaki. Matigi Ala ko ten.»