Yeremi 10 - Jula NT of Côte d’Ivoire

Batofɛn gbansanw ani Ala ɲanaman

¹ Matigi Ala bɛ min fɔra aw kama, aw ye o lamɛn, aw Izirayɛlimɔgɔw!

² Matigi Ala ko: «Aw kana siya wɛrɛw ta kokɛcogow ladegi; aw kana siran sankolo tagamasiyɛnw ɲa, hali ni siya tɔw bɛ siranna o ɲa.

³ Siyaw ta landakow tɛ foyi ye. O bɛ taga yiri tigɛ kongo kɔnɔ, yirilɛsɛbaga b’a lɛsɛ ni yirilɛsɛnan ye.

⁴ O bɛ warigbɛ ni sanin kɛ k’a cɛɲa, ka nɛgɛkuru dɔw kɛ k’a gbengben k’a lɔ, janko a kana ben.

⁵ O alaw bɛ i ko kɔnɔgbɛnnan minw bɛ fifa foro kɔnɔ, o tɛ se ka kuma. Mɔgɔ le bɛ o ta, ni o tɛ, o tɛ se ka tagama. Aw kana siran o ɲa, sabu o tɛ se ka kojugu kɛ, o fana tɛ se ka koɲuman kɛ.»

⁶ E, Matigi Ala, ele bɔɲɔgɔnko tɛ yi! I ka bon, i tɔgɔ baraka ka bon!

⁷ E, siyaw bɛɛ ta Masa, mɔgɔ juman le bɛ yi ko ele ɲasiran tɛ min na? Bɛɛ ka kan ka siran i ɲa. Siyaw ta mɔgɔ hakiritigiw bɛɛ ra, ani o ta maraw bɛɛ ra ele bɔɲɔgɔnko tɛ yi.

⁸ O bɛɛ ye nalomanw le ye, o bɛɛ ye hakirintanw le ye; o ta batofɛnw tɛ se ka mɔgɔ karan foyi ra, sabu yiri dama lo.

⁹ O bɛ na ni warigbɛ gbasinin ye ka bɔ Tarisisi, o bɛ bɔ ni sanin fana ye Ufazi. Yirilɛsɛbaga bɛ fɛn dɔ tagamasiyɛn kɛ, saninfagabaga boro b’a lalaga. O bɛ o jow masiri ni faniɲuman bulamanw, ani a wulenmanw ye, k’a sɔrɔ o bɛɛ ye adamaden dɔ ta hakiri nɔ le ye.

¹⁰ Matigi Ala le ye Ala yɛrɛ ye; ale le ye Ala ɲanaman ye, ani Masa wuribari. Ni a jusu bɔra, dugukolo bɛ yɛrɛyɛrɛ, siya si tɛ se ka lɔ k’a ta dimiba makɔnɔ.

¹¹ Aw y’a fɔ o ye ko ala minw ma sankolo dan, o ma dugukolo dan, ko lon dɔ o alaw bɛna tunu ka bɔ dugukolo kɔ kan, ka tunu ka bɔ sankolo jukɔrɔ.

¹² Matigi Ala ka dugukolo dan a ta sebagaya baraka ra, ka dunuɲa ju sigi a ta hakiritigiya baraka ra, ka sankolo dan a ta faamuri baraka ra.

¹³ Ni a k’a ta sankurukan bɔ, jibaw bɛ lajɛn sankolo kɔnɔ, a bɛ sankabaw lana ka bɔ fɔ dunuɲa danw na; a bɛ sanmanamanaw bɔ sanji cɛ ra, a bɛ fɔɲɔ labɔ a marayɔrɔw ra.

¹⁴ Adamadenw bɛɛ ye nalomanw le ye, o si tɛ ko lɔn; saninfagabaga bɛ jo min lalaga, o maroya bɛ laban ka ale yɛrɛ sɔrɔ; a bɛ o fɛnw lalaga ka mɔgɔw nɛgɛ le, sabu nɛnɛkiri tɛ o fɛnw na.

¹⁵ Fɛngbansanw lo, baarakunntanw lo; ni o ta kojugu saralon nana se, o bɛɛ bɛna halaki.

¹⁶ Nka Ala min bɛ Yakuba ta mɔgɔw fɛ, ale tɛ o cogo ra; ale le ka fɛn bɛɛ dan. Izirayɛli le ye a ta siya ye, Fangatigi Ala, o ye a tɔgɔ ye.

Cɛnriba wagati sera

¹⁷ Aw ye aw ta doniw cɛ ka bɔ dugu ma, aw juguw ka aw minw ta dugu lamini!

¹⁸ Sabu Matigi Ala ko: «A flɛ, sisan kɔni, ne bɛna nin jamana mɔgɔw firi fɔ yɔrɔjan; ne bɛna sɛgɛ ben o kan ka o degu, janko o juguw ye o mina.»

¹⁹ Zeruzalɛmu ko: «E, bɔnɔ ka ne sɔrɔ, ne banara; ne ta jori dimi ka bon kosɛbɛ! Ne tun b’a fɔra ko: Sɛgɛ sera ne ma, nka ne ka kan k’a sɔnmina le.

²⁰ Ne ta fanibon benna, a sirijuruw bɛɛ tigɛtigɛra. Ne dencɛw bɛɛ tagara ka ne to, o si tɛ yi tuun; mɔgɔ tɛ yi min bɛ se ka ne ta bon lɔ tuun, k’a datugufaniw lawuri.»

²¹ Sagagbɛnbagaw kɛra nalomanw ye, o ma Matigi Ala ta jɛnɲɔgɔnya ɲini; o kosɔn o ta baara ma ɲa, o ta bɛganw bɛɛ janjanna.

²² Aw ye mankan dɔ lamɛn! A bɛ surunyara ka na! Wɔyɔkanba dɔ le bɛ bɔra sahiliyanfan jamana fan na. O bɛna Zuda mara duguw ci ka o kɛ yɔrɔ lakolonba ye, ka o kɛ kongowuruw dogoyɔrɔ ye.

Cira Yeremi ka Ala daari a ta jamana mɔgɔw ye

²³ E, Matigi Ala, ne k’a lɔn ko adamaden ta dunuɲalatigɛ tɛ a yɛrɛ boro, ko mɔgɔ tagamatɔ tɛ se k’a tɛmɛyɔrɔw latigɛ.

²⁴ E, Matigi Ala, ne koro, nka i kana a dama tɛmɛ; i kana a kɛ ni dimi ye, ni o tɛ, i bɛna ne halaki ka ban pewu.

²⁵ Siya minw tɛ i lɔn o ta Ala ye, i ta dimi ben olugu kan, ani mɔgɔ minw tɛ i tɔgɔ bato! Sabu olugu le ka Yakuba ta mɔgɔw domu, o ka o domu ka o ban pewu; o k’a ta jamana cɛn, k’a kɛ yɔrɔ lakolon ye.