Dɔnkiriw 8 - Jula NT of Côte d’Ivoire1 E, ni ele tun ye ne kɔrɔcɛ yɛrɛ le ye, ni ele ni ne tun ka sin kelen min, ne tun bɛna i kunbɛn kɛnɛ ma ka melege i ra, mɔgɔ si tun tɛna ne mafiyɛnya. 2 Ne tun bɛna taga ni i ye ka taga i ladon ne bamuso ta so; i tun bɛna ne karan. Ne tun bɛna duvɛndiman dɔ di i ma, i ye o min; ne tun bɛna ne ta gerenadisunw yiriden ji dɔ di i ma. 3 A numanboro ye to ne kun kɔrɔ, a y’a kininboro melege ne ra. (Kanbelen kumakan) 4 E, Zeruzalɛmu sunguruw, ne bɛ aw daari aw kana kanu lawuri, aw kana a lakunu k’a sɔrɔ a wagati ma se. Kanu ta fanga bɛ i ko saya fanga (Dugu sunguruw kumakan) 5 E, muso juman le bɛ nana ka bɔ kongokolon kɔnɔ, a dɛnnin bɛ a jarabi kan? Ne ka i lakunu pɔmusunw le kɔrɔ, i bamuso ka i kɔnɔ ta yɔrɔ min na, i woroba ka i kɔnɔ ta yɔrɔ min na. (Sunguru kumakan) 6 Ne sigi i jusukun kan i ko tagamasiyɛn, ne don i boro ra i ko tagamasiyɛn; sabu kanu fanga bɛ i ko saya fanga, celiya ka fari i ko kaburu. Kanu tasuma ye tasuma farimanba le ye, a bɛ i ko Matigi Ala ta tasuma. 7 Hali jiba caman tɛ se ta kanuya tasuma faga, ji si tɛ se k’a datugu. Ni mɔgɔ min ka hali a ta sokɔnɔfɛnw bɛɛ di ko a bɛ kanu san, o tigi tɛna foyi sɔrɔ ni lɔgɔbɔri tɛ. (Sunguru balemaw kumakan) 8 Dɔgɔmuso dɔ bɛ an fɛ, a kɔgɔ ma fa fɔlɔ. An bɛna mun le kɛ an dɔgɔmuso ye, ni a furukokuma nana wuri lon min na? 9 Ni an dɔgɔmuso ye dugu laminikogo le ye, an bɛna sansan warigbɛramanw lɔ a kunna. Ni an dɔgɔmuso ye donda le ye, an bɛna sɛdiriyiri barakamanw le kɛ a kon ye. (Sunguru kumakan) 10 Ne ye dugu laminikogo le ye, ne sinw ye a kogo sankasow ye. O ra, ne kɛra ne jarabi fɛ hɛra sababu le ye. (Kanbelen kumakan) 11 Yiriforo dɔ tun bɛ Sulemani fɛ Baali Hamɔn. A k’a karifa dɔw ma ko o y’a kɔrɔsi. Olugu bɛɛ kelen kelen tun bɛ to ka na warigbɛ waga kelen le di a ma yiridenw sɔngɔ ye. 12 Ne ta yiriforo bɛ ne yɛrɛ le ɲa kɔrɔ yan. Ele Sulemani ye to ni i ta warigbɛ waga kelen ye, warigbɛ kɛmɛ fla ye kɛ a kɔrɔsibagaw ta ye. 13 Ele min siginin bɛ nankɔ kɔnɔ, ne tɔɲɔgɔn dɔw ka o toro malɔ, ko o bɛ i ta kuma lamɛn. A to ne ye i kumakan mɛn! (Sunguru kumakan) 14 Bori, ne jarabi, i ko minan, walama mankalanin den, min bɛ panpan kuruw kan ka taga, yirikasadimanw bɛ kuru minw kan. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.