Jateri 23 - Jula NT of Côte d’Ivoire

Balamu ka dugawu kɛ Izirayɛlimɔgɔw ye

¹ Balamu k’a fɔ Balaki ye ko: «Sarakabɔnan wolonfla lalaga ne ye yan, ka misitoran wolonfla ni sagajigi wolonfla fana labɛn ne ye.»

² Balamu ka min fɔ, Balaki ka o kɛ. Balaki ni Balamu ka misitoran kelen ni sagajigi kelen kɛ saraka ye sarakabɔnan bɛɛ kelen kelen kan.

³ Balamu k’a fɔ Balaki ye ko: «Lɔ i ta sarakaw kɔrɔ yan, ne bɛna taga ɲa fɛ dɔɔnin. A bɛ se ka kɛ ko Matigi Ala bɛna a yɛrɛ yira ne ra; o ra ni a ka min yira ne ra, ne bɛna o fɔ i ye.» Balamu tagara lɔ tintin dɔ kan.

⁴ Ala nana a yɛrɛ yira Balamu na. Balamu k’a fɔ a ye ko: «Ne ka sarakabɔnan wolonfla lalaga, ka misitoran kelen ni sagajigi kelen kɛ saraka ye sarakabɔnan bɛɛ kelen kelen kan.»

⁵ Matigi Ala ka kuma don Balamu da ra, k’a fɔ a ye ko: «Sekɔ ka taga Balaki fɛ; ne ka kuma min don i da ra, i bɛ taga o fɔ a ye.»

⁶ Balamu sekɔra ka taga Balaki fɛ; a tagara Balaki lɔnin sɔrɔ a ta saraka kɔrɔ, ale ni Mohabu kuntigiw bɛɛ.

⁷ Balamu k’a ta cirayakuma fɔ; a ko: «Balaki le ka ne lana ka bɔ Aramu, Mohabu masacɛ le ka ne lana ka bɔ terebɔyanfan kuruyɔrɔw ra. A ko: ‹Na Yakuba ta mɔgɔw danga ne ye, na kumajuguw fɔ Izirayɛlimɔgɔw ma.›

⁸ Ayiwa, Ala ma mɔgɔ min danga, ne bɛ se ka o danga cogo di? Matigi Ala ma kumajugu fɔ mɔgɔ min ma, ne bɛ se ka kumajugu fɔ o tigi ma cogo di?

⁹ Ne bɛ o yera faraw kunna, ne ɲa bɛ o ra kongoriw kunna. Siya dɔ lo, min siginin bɛ a danna; o tɛ o yɛrɛ jate ko o ni siya tɔw ye kelen ye.

¹⁰ Jɔn le bɛ se ka Yakuba ta mɔgɔw jate, minw ka ca i ko kɛnkɛnmugu? Jɔn le bɛ se ka hali o tarancɛ ta tarancɛ jate? Ala y’a to ne ye sa nin mɔgɔɲumanw sacogo ra, ka ne labancogo ni o labancogo kɛ kelen ye.»

¹¹ Balaki k’a fɔ Balamu ye ko: «Ele ka mun le kɛ ne ra tan? Ne ka ele wele ko i ye na ne juguw danga, ele nana kɛ dugawu camanba le kɛ ye o ye!»

¹² Balamu k’a jaabi ko: «O tuma ni Matigi Ala ka kuma min don ne da ra, ne man kan ka jija ka o le fɔ wa?»

Balamu ta dugawu flanan

¹³ Balaki k’a fɔ Balamu ye ko: «Na, an ye taga yɔrɔ wɛrɛ, i bɛna to yɔrɔ min na ka nin mɔgɔw ye. I bɛna dɔw ye, nka i tɛna o bɛɛ ye. I bɛ to o yɔrɔ ra ka o danga ne ye.»

¹⁴ A ka Balamu wele ka taga ni a ye Sofimu yɔrɔ ra, Pisiga kuru kunna. A ka sarakabɔnan wolonfla lalaga o yɔrɔ ra tuun, ka misitoran kelen ni sagajigi kelen kɛ saraka ye o sarakabɔnanw bɛɛ kelen kelen kan.

¹⁵ O kɔ, Balamu k’a fɔ Balaki ye tuun ko: «Lɔ i ta sarakaw kɔrɔ yan, ne bɛ taga Ala ta kuma lamɛn.»

¹⁶ Matigi Ala nana a yɛrɛ yira Balamu na. A ka kuma don Balamu da ra; a k’a fɔ a ye ko: «Sekɔ Balaki fɛ, ne ka kuma min don i da ra, i ye taga o fɔ a ye.»

¹⁷ Balamu sekɔra ka taga Balaki fɛ; a tagara Balaki lɔnin sɔrɔ a ta saraka kɔrɔ, ani Mohabu kuntigiw. Balaki k’a ɲininka ko: «Matigi Ala ka mun le fɔ?»

¹⁸ Balamu k’a ta cirayakuma fɔ; a ko: «Balaki, wuri ka ne lamɛn! E, Sipɔri dencɛ, i toro malɔ ne ye!

¹⁹ Ala tɛ i ko mɔgɔw, k’a fɔ ko a bɛ faninya tigɛ. A tɛ i ko adamaden, k’a fɔ ko a bɛ ko kɛ, ka nimisa. Yala Ala bɛ ko dɔ fɔ, ni a tɛ a kɛ wa? A bɛ ko layiri ta, ni a tɛ a dafa wa?

²⁰ A flɛ, Ala ko ne ye dugawu le kɛ o ye. A ka dugawu mina, ne fana tɛ se k’a yɛlɛma.

²¹ Ala ma terenbariya si ye Yakuba ta mɔgɔw ra; a ma kojugu si kɔrɔsi Izirayɛlimɔgɔw ra. Matigi Ala, o ta Ala bɛ ni o ye. O ɲagaritɔ b’a fo ni masaya fori ye.

²² Ala le ka o labɔ Misiran. A bɛ baraka don o ra i ko sigin ta baraka.

²³ Subagaya tɛ se ka foyi kɛ Yakuba ta mɔgɔw ra; lagbɛri tɛ se ka foyi kɛ Izirayɛlimɔgɔw ra. Ni wagati latigɛnin sera, Ala bɛ min kɛ, o bɛ fɔ Yakuba ta mɔgɔw ye, Izirayɛlimɔgɔw.

²⁴ Siya dɔ lo, min bɛ wuri i ko jaraba, ka wuri ka pan i ko jaracɛ. A tɛ la, fɔ a ye a ta sogo minaninw domu, fɔ a ye a ta sogo faganinw jori min.»

²⁵ Balaki k’a fɔ Balamu ye ko: «Ni i tɛ se ka o danga, o to yi; nka i fana kana dugawu kɛ o ye!»

²⁶ Balamu ka Balaki jaabi ko: «Ne m’a fɔ i ye wa, ko: ‹Ni Matigi Ala ka fɛn o fɛn fɔ ne ye, ko ne bɛ o le kɛ?› »

Balamu ta dugawu sabanan

²⁷ Balaki ko Balamu ma ko: «Na, ne bɛ taga ni i ye yɔrɔ wɛrɛ tuun. A bɛ se ka kɛ ko Ala bɛna sɔn k’a to i ye nin mɔgɔw danga ne ye o yɔrɔ ra.»

²⁸ Balaki tagara ni Balamu ye Pehɔri kuru kunna, yɔrɔ min ɲasinna kongokolon ma.

²⁹ Balamu k’a fɔ Balaki ye ko: «Sarakabɔnan wolonfla lalaga ne ye yan, ka misitoran wolonfla ni sagajigi wolonfla fana labɛn ne ye.»

³⁰ Balamu ka min fɔ, Balaki ka o kɛ. O kɔ, a ka misitoran kelen ni sagajigi kelen kɛ saraka ye sarakabɔnan bɛɛ kelen kelen kan.