Ayuba 14 - Jula NT of Côte d’Ivoire

Ayuba ta jaabi tɔ: Dunuɲalatigɛ ye sɛgɛ le ye

¹ Adamaden o adamaden, ni muso le k’a woro, a si man jan, a ta dunuɲalatigɛ bɛɛ ye ɲagban le ye fana.

² A bɛ wuri i ko yirifiyeren, nka a bɛ ja; a bɛ tɛmɛ i ko yirisuma, a tɛ mɛɛn.

³ Ala, ele ɲa lɔnin bɛ o le ra ka to k’a kɔrɔsi wa! Ele bɛ ne le minana ka taga ni ne ye kiti ra wa?

⁴ Jɔn le bɛ se ka fɛn saninyanin sɔrɔ fɛn saninyabari ra? Mɔgɔ si!

⁵ I n’a fɔ i ka adamaden si teredaw latigɛ ka ban, ani a karodaw, ka dan sigi a si ra, a tɛ se ka tɛmɛ min kan,

⁶ o tuma i ɲa bɔ a ra k’a to a ye nɛnɛkiri dɔɔnin, janko a ye a ta wagati laban diyabɔ, i ko baaraden bɛ a ta tere baara sara diyabɔ cogo min na.

⁷ Jigi belen bɛ yiri fɛ, sabu ni o k’a tigɛ, a bɛ nugu tuun, ka to ka yiriborokuraw bɔ tuma bɛɛ.

⁸ Hali ni a lilinw ka kɔrɔ dugukolo jukɔrɔ, hali ni a kunkurun ka to dugukolo ra ka faga,

⁹ ni sumaya ka se a ma dɔrɔn, a bɛ nugu, ka yiriborow bɔ i ko yirisunkura.

¹⁰ Nka ni mɔgɔ sara, a baraka bɛɛ le bɛ ban pewu; ni adamaden nɛnɛkiri ka mina a ra, a bɛ taga min?

¹¹ Ayiwa, kɔgɔji ta ji bɛ jigi, ba ta ji bɛ ban, a bɛ ja.

¹² O cogo ra ni mɔgɔ ka la saya sunɔgɔ ra, a tɛ wuri tuun; fɔ ka taga sankolo tunu, a tɛ wuri, a tɛ wuri ka bɔ a ta sunɔgɔ ra.

¹³ E, Ala, ni i tun bɛ sɔn ka ne dogo saya dibi ra, ka ne dogonin to yi fɔ ka taga i ta jusugban mala, ka wagati dɔ latigɛ ne ye, i bɛna i hakiri to ne ra wagati min na!

¹⁴ Ni mɔgɔ sara, yala a bɛ se ka ɲanamanya tuun wa? Ni o tun bɛ se ka kɛ, ne tun bɛna ne ta sɛgɛ muɲu ka Ala makɔnɔ, fɔ ne ta wagati ye na se, o ye na ne labi.

¹⁵ O ra i tun bɛna ne wele, ne tun bɛna i jaabi; ne min ye i yɛrɛ boro ta danfɛn ye, ne lɔgɔ tun bɛna i sɔrɔ.

¹⁶ O ra, i tun tɛna ne ta sentako kelen kelen bɛɛ jate, i tun tɛna to ka ne ta jurumunw si kɔrɔsi tuun.

¹⁷ I tun bɛna ne ta hakɛkow don bɔrɔ dɔ kɔnɔ k’a dasiri, ka ne ta terenbariyakow datugu.

¹⁸ Nka kuruw bɛ ben ka yɛrɛgɛ, faraw bɛ kari ka bɔ o nɔ ra.

¹⁹ Ji bɛ woyo kabakuru kan ka to ka dɔ bɔ a ra cogo min na, a bɛ woyo ka bɔgɔ fana cɛ ka taga ni a ye cogo min na, ele fana bɛ adamaden jigi cɛn o cogo le ra.

²⁰ I bɛ ben a kan k’a kɛrɛ siɲaga kelen dɔrɔn ka se a ra, a bɛ tɛmɛ; i b’a ɲada cogoya bɛɛ yɛlɛma, k’a bla ka taga.

²¹ Yala mɔgɔw bɛna a denw bonya a kɔ yan wa? A tɛ se ka o lɔn. Yala o bɛna o dɔgɔya le wa? A tɛ se ka bɔ o kala ma.

²² Sɛgɛ min b’a yɛrɛ farisogo kan, a bɛ o dɔrɔn le lɔn, saya dimi min sera a yɛrɛ nin ma, a bɛ o le lɔn.