Ayuba 13 - Jula NT of Côte d’Ivoire

Ayuba ta jaabi tɔ: Ne ni Ala ka kan ka kuma

¹ Can lo, ne ɲa ka nin kow bɛɛ ye, ne toro fana k’a mɛn, ne k’a faamu.

² Aw ka min lɔn, ne fana ka o lɔn; sabu ne hakiri man dɔgɔ ni aw ta ye!

³ Nka ne bɛna kuma Sebɛɛtigi Ala le fɛ, ne bɛna kuma k’a yira Ala yɛrɛ le ra, ko ne ma jaraki.

⁴ Aw kɔni ka ne datugu ni faninya ye; aw bɛɛ ye flakɛbaga ɲacintanw le ye!

⁵ Hali aw tun ye je, aw kana foyi fɔ! O belen tun bɛna kɛ hakiritigiya sira ye aw fɛ.

⁶ Ayiwa, ne bɛna min fɔ, ka ne ta jo yira, aw ye o lamɛn! Ne da bɛna kuma min fɔ, ka can yira, aw ye aw janto o ra!

⁷ Yala aw bɛ sɔn ka kumajugu fɔ Ala nɔ ra wa? Aw bɛ sɔn ka janfakuma fɔ a tɔgɔ ra wa?

⁸ Aw b’a fɛ ka fara Ala kan ka kuma ka jo di a ma le wa?

⁹ Ni Ala ka aw sɛgɛsɛgɛ, yala o bɛna diya aw ra wa, walama aw b’a janfara le i ko mɔgɔ b’a mɔgɔɲɔgɔn janfa cogo min na wa?

¹⁰ Sigiya t’a ra, a bɛna aw jaraki, ni a kɛra ko aw bɛ mɔgɔ dɔw fisaya dɔw ye dogo ra.

¹¹ Yala a ta masaya nɔɔrɔ tɛ jatigɛ blara aw ra wa? Yala a ɲasiran tɛna kɛ aw ra wa?

¹² Aw ka fɛn o fɛn fɔ, o bɛɛ bɛ i ko buguri; aw ka ne jaabi ni kuma o kuma ye, o bɛɛ bɛ i ko bɔgɔ.

¹³ Aw ye je k’a to ne fana ye kuma! Ni min bɛ kɛ ne ra o ye kɛ!

¹⁴ Ne kɔni bɛna ne yɛrɛ bla farati ra, ka ne nin fiyeere.

¹⁵ Hali ni Ala bɛna ne faga le, ne jigi belen b’a kan. Nka ne bɛna kuma a ɲa kɔrɔ k’a yira ko jaraki tɛ ne tagamacogo ra.

¹⁶ O le fana bɛna kɛ ne kisisababu ye; sabu Alaɲasiranbari si tɛ sɔn ka lɔ Ala ɲa kɔrɔ.

¹⁷ Aw ye ne ta kumaw lamɛn kosɛbɛ! Aw ye aw toro malɔ ne ta kumaɲafɔri ra!

¹⁸ A flɛ, ne bɛna kuma k’a yira ko ne bɛ can le kan; sabu ne k’a lɔn ko jo bɛ ne fɛ.

¹⁹ Jɔntigi le bɛ se ka ne sɔsɔ? Ni mɔgɔ sera ka ne jaraki, o tuma ne bɛ je, ka sa.

²⁰ Nka, Ala, sabari ka nin fɛn fla kɛ ne ye, ni o kɛra, ne tɛna dogo i ra tuun:

²¹ I boro bɔ ne kan, i kana ne ja tigɛ tuun ni i ta siranyafɛnbaw ye.

²² O kɔ, ele ye i ta fɔ, ne bɛ i jaabi, walama ne le bɛ kuma ta, ele bɛ ne jaabi.

²³ Ayiwa, ne ka terenbariyako ni jurumun jori le kɛ? Ne ka hakɛkow ni jurumun minw kɛ, o fɔ ne ye kɛ!

²⁴ Mun kosɔn i bɛ i ɲada dogora ne ra, ka ne kɛ i jugu ye?

²⁵ Yala i bɛ sɔn ka kɛrɛ ni flaburu gbansan ye wa, fɔɲɔ bɛ taga ni min ye? I bɛ sɔn ka tugu binjalan dama kɔ k’a gbɛn wa?

²⁶ I bɛ kogbɛlɛnw le sɛbɛ k’a bla ne kama; i bɛ ne ta denmisɛnya wagati ta terenbariyaw kunko fana ben ne kan.

²⁷ I bɛ ne sen don nɛgɛjɔrɔkɔ ra, i bɛ ne tɛmɛyɔrɔw bɛɛ kɔrɔsi, ka dan sigi ne tagayɔrɔw ra;

²⁸ k’a sɔrɔ mɔgɔ farisogo bɛ torira ka cɛn, i ko cɛnrifɛnw bɛ don fani na k’a cɛn cogo min na.