Luuqaasa 21 - Ooratha Caaquwaa

ኣምዓቲ ኢሞታ

¹ ዬሱሲ ቁ ጊዴ ፄሊያ ዎዴ፥ ዱሬ ኣሳይ ጌሻ ጎሊያን ኢሞታ ሺሺያ ሚሻ ጊዶን ባሬንቶ ዴዒያዋፔ ኡንቱንቱ ዬጊያ ዎዴ ቤዔዳ።

² ቃሲካ ኢቲ ሂዬሳ ኣምዔ ሚሺራታ ላዑ ሴምቤሪያ ሄዋን ዬጊያ ዎዴ ቤዒዴ፥

³ «ታ ሂንቴው ቱሙዋ ጋይ፥ ሃ ሂዬሳ ኣምዔ ሚሺራታ፥ ኦፔኔ ዳሩዋ ኢማዱ።

⁴ ሃ ኣሳይ ኡባይ ባሬንቶ ፓላሆዋፔ ኢሜዲኖ፤ ሺን ኢዛ ባሬ ሂዬሳቴ ዎልቃን ባሬው ዴዒያዋ ኡባ ኢማዱ» ያጌዳ።

ጌሻ ጎሊ ኮሌታናዋ ዬሱሲ ካሴቲዴ ኦዴዳ

⁵ ኣ ካሊያዋንቱፔ ኢቱ ኢቱ፥ «ጌሻ ጎሊ ሎዖ ሹቻኒኔ ባላ ሺቁዋ ኢሞታን ሎዔዳዋ» ያጊ ሃሳዪያ ዎዴ ዬሱሲ፥

⁶ «ሃዌ ሂንቴንቱ ቤዒያዌ ኡባይ ኮሌቴናን፥ ሹቻይ ሹቻ ቦላን ኬሌቲዴ ኣቴና ዎዲ ያናዋ» ያጌዳ።

⁷ ኡንቱንቱካ፥ «ታማሪሲያዎ፥ ሲሚ ሃዌ ሃናናዌ ኣዉዴ? ቃሲካ ሃዌ ሃናናው ማላይ ኣዬ?» ያጊዲ ኦቼዲኖ።

ዬሱሲ ሜቱዋ ዎዲኔ ናሼቻ ዎዲ ያናዋ ኦዴዳ

⁸ ኢካ፥ «ኦኒኔ ባሌናዳን ናጌቲቴ፤ ጮራ ኣሳይ፥ ‹ታኒ ኪሪስቶሳ› ያጊዴ ቃሲካ፥ ‹ዎዲ ማቴዳ› ያጊዴ ታ ሱንን ያናዋንታ፤ ሂንቴንቱ ቃሲ ኡንቱንታ ካሎፒቴ።

⁹ ኦላ ዬዉዋኔ ኣሳ ማካላባ ሲሲያ ዎዴ ዳጋሞፒቴ፤ ሃዌ ኮይሮ ሃናናው ቤሲያዋ ጊዶ ዲራፔ ኣቲን ዉርሴይ ቢራ» ያጌዳ።

¹⁰ ሄዋፔ ካሊዴ ኣሳው፥ «ኣሳይ ኣሳ ቦላ፥ ካዉቴይካ ካዉቴ ቦላ፥ ዴንዳናዋ፤

¹¹ ዎልቃማ ቢታ ቃይ ሃናናዋ፤ ኮሻይኔ ሃርጊ፥ ዱማ ዱማሳን ሜታናዋ፤ ያሺያ ዬዉኔ ኡባካ ዎልቃማ ማላታይ ሳሉዋፔ ሃናናዋ።

¹² «ሃዌ ኡባይ ሃናናፔ ካሲያን ቃሲ ኣሳይ ሂንቴንታ ኦይቃናዋንታ፥ ሜቶናዋንታ፤ ሂኒ ኣዪሁዳቱዋ ዎሳ ጎሌ ኣሳው ኣ ኢማናዋንታ፤ ቃሾ ጎሌካ ጌሊሳናዋንታ፤ ካታቱዋ ሲንኒኔ ሞዲያዋንቱ ሲንን ሺሻናዋንታ፤ ሃዌ ኡባይ ታ ሱን ጋሱዋን ሂንቴንታ ጋካናዋ።

¹³ ሃዌካ ማርካታናው ሂንቴው ሎዖ ቃዳ ጊዳናዋ።

¹⁴ ሃዋ ጊዲያ ዲራው፥ ኣይ ዛሩዋ ኢማኔ ጊዴ ኮይሮቲዴ ሂንቴንቱ ኡንዔቴና ማላ ሃዋ ዎዛና ኣቴ።

¹⁵ ኤቄቲያዋንቱ ኡባይ፥ ኤቄታናዉኔ ላካናው ዳንዳዬና ቃላኔ ኣ ጪንጫቴ ታኒ ሂንቴንቶ ኢማና።

¹⁶ ሂንቴንታ ዬሌዳዋንቱኔ ሂንቴንቱ ኢሻቱ፥ ሂንቴንቱ ዳባቱኔ ሂንቴንቱ ላጌቱካ ኣቴናን ሂንቴንታ ኣ ኢማናዋንታ፤ ሂንቴንቱፔካ ኢቱዋ ኢቱዋ ዎናዋንታ።

¹⁷ ታ ሱን ዲራው ኣሳ ኡባ ማታን ኢፄቴዳዋንታ ጊዳኒታ።

¹⁸ ዬዉዋን ቃሲ ሂንቴንቱ ሁጲያ ቢናናፔካ ኢቲናኔ ባዩኩ።

¹⁹ ሚኒ ኤቂዴ ሂንቴንቱ ሼምፑዋ ኣሺታ።

ዬሱሲ ዬሩሳላሜ ባዬባ ኦዴዳ

²⁰ «ዬሩሳላሜ ኦላ ኣሳን ዶዴቴዳ ዎዴ፥ ኢዚ ባዬይ ማቴዳዋ ኤሪቴ።

²¹ ሄ ዎዴ ዪሁዳን ዴዒያዋንቱ ዴሪያኮ ባቃቲኖ፤ ካታማን ዴዒያዋንቱ ቃይ ሄዋፔ ኬሲኖ፤ ባላጋሪያን ዴዒያዋንቱካ ያ ካታማኮ ጌሎፒኖ፤

²² ፆሳ ቃላን ፃፌቴዳዌ ኡባይ ፖሌታናዳን ሃዌ ሃሉዋ ኬሲያ ዎዲያ።

²³ ቢታ ቦላን ዎልቃማ ሜቱ ሃናናዋ፤ ሃዒ ዴዒያ ኣሳ ቦላን ሃንቁ ያናዋ፤ ሄዋ ዲራው ሄዎዲያን ሻሃሮዋንቶኔ ንያዋንቶ ኣዬ!

²⁴ ኣሳይ ኡባይ ማሻን ሃይቃናዋንታ፤ ፆሳ ኤሬና ጋዲያ ኡባቱካ ኦሞዱዋን ባናዋንታ፤ ዬሩሳላሜካ ኣዪሁዳ ጊዴናዋንቱ ዎዲ ፖሌታና ጋካናው፥ ኡንቱንቱን ዬቴዳዉኖ ጊዳናዉኑ።

ኪሪስቶሳ ላዔ ዩሳ

²⁵ «ኣዋ፥ ኣጌናኒኔ ፆሊንቲያ ቦላ ማላታይ ሃናናዋ፤ ኣባፔኔ ቤታ ኮሻፔ ዴንዶ ጋሱዋን ቢታ ቦላን ዴዒያ ኣሳይ ኡባይ ኡንዔታናዋንታ፤ ሂርጋናዋንታ።

²⁶ ሳሉዋ ዎልቃይ ኡባይ ቃፂያ ዲራው ኣሳይ ያሻኒኔ ኣላሚያ ቦላ ኣዬ ያናዌሻ ያጊዴ ናጉዋን ዳቡራናዋንታ።

²⁷ ሄ ዎዴ ኣሳ ናዓይ ዎልቃኒኔ ዎልቃማ ቦንቹዋን ሻሪያን ዪያ ዎዴ ቤዓናዋንታ።

²⁸ ሂንቴንቱካ፥ ሃ ዬዉ ፖሌቱሳ ዶሚያ ዎዴ፥ ዎዙ ማቶ ዲራው ሲቲ ጊዴ ኤቂቴ፤ ፑዴ ቁ ጊዴ ፄሊቴ» ጌዳ።

ባላሲያ ጌቴቲያ ሚ ሌሚሱዋ

²⁹ ካሊዴካ፥ ሃዋ ያጊ ሌሚሱዋ ኦዴዳ፥ «ዎዴንፔኔ ሃራ ሚ ኡባፔ ፄሊቴ፤

³⁰ ሃይይ ኣጪና ቤዒያ ዎዴ፥ ሄ ዎዴ ቦኒ ማቴዳዋ ሂንቴንቱ ኤሪታ።

³¹ ሄዋዳንካ ቃሲ ዬዋቱ ፖሌቲያዋ ቤዒያ ዎዴ፥ ፆሳ ካዉቴታ ማቴዳዉኖ ኤሪቴ።

³² «ታኒ ሂንቴው ቱሙዋ ጋይ፤ ሃዌ ኡባይ ፖሌታና ጋካናው ሃ ዬሌታይ ኣና።

³³ ሳሉኔ ሳዓይ ኣና፤ ሺን ታ ቃላይ ኣና።

³⁴ ሲሚ ዛዋይ ባይና ዴዑዋን፥ ኡሻ ዳሩዋኔ ዴዑዋባን ኡንዔቲሺን ሂንቴንቱ ዎዛናይ ሌፔናዳኒኔ ሄ ጋላሳይ ጲሪያዳን ቆፔናን ሂንቴና ጋኬናዳን ናጌቲቴ፤

³⁵ ሃዌ ቢታ ኡባን ዴዒያዋንቱ ኡባቱዋ ቦላን ጋካናዋ።

³⁶ ሲሚ ዪያ ኢታባ ኡባፔ ሂንቴንቱ ኣታናዳኒኔ ኣሳ ናዓ ሲንንካ ኤቃናው ዳንዳያና ማላ፥ ኡባ ዎዴ ሚኒ ዎሲቴ» ያጌዳ።

³⁷ ዬሱሲ ጋላሲ ጋላሲ ጌሻ ጎሊያን ታማሪሲዴ፥ ቃማ ቃማ ዴብሬ ዛይቴ ያጌቲያ ዴሪያኮ ኬሲዴ ኣቄ።

³⁸ ኣሳይ ኡባይ ኣ ሲሳናው ጉራን ያ ጌሻ ጎሊያ ኣኮ ዪኖ።