1 Timoteo 3 - I bowon a pagpakikasungdu

I Ugeli Ni Pinakamatande Ide De Kapolongan

¹ Wiyo i pigsabiin a kamatoden a, “I te buot a nappa ni pinakamatande ay migbuot de piyon a tungkolin.”

² Kanya depat a i pinakamatande ay an na pepintasan, isin la i bebi na, an gepadeog de malot a buot ni lawes na, naketingges, pegelang, getanggep a piyon de beloy na, piyon a getodu,

³ an migbuot de kuwarta, an migbugnang, an matapang, an migpakitalo ta mabeit.

⁴ Depat pala a eya ay naketingges a getodu a piyon de mittanak na, a getalinga pati gegelang diya i mangának na de pesan a buot na.

⁵ Ta be an naketingges i pinakamatande a getodu a piyon de mittanak na ay namas a am pala naketingges a getodu de kapolongan ni Makedepat.

⁶ Nano ay depat pala a eya ay náloy di a gepanulusun ta be eyen ay makati eya ay magmayabeng a tuloy, a tatanggep na i paghatol a magi paghatol de Satanas.

⁷ Pati depat a dehil de piyon a ugeli na ay pegelang eya ni kaagtaan a am pa gepanulusun tangani wet eya pesabian de ni malot, a wet nadedeya ni Satanas.

I Depat A Ugeli Ni Katabeng Ide De Kapolongan

⁸ Nano ay tungkul pan de te tungkolin ide a katabeng de kapolongan ay depat a ide ay te piyon a ugeli, an migsurut ni naalis-alis, an migbugnang pati an migbuot de kuwarta.

⁹ Pinatingges dide i kamatoden kanya depat a te innawa ide a an malungkut gepo de pag-abut de de inon.

¹⁰ Kaelangan ngona a subukan ide ta be nagkaddepat ay dingan la yediin a getabeng de kapolongan.

¹¹ Nano ay tungkul de katabeng a mahunain ay depat pala a te piyon a ugeli, wet migpintas, an gepadeog ide de malot a buot ni lawes de ta depat a naponulusonan ide de pesan.

¹² Misan pan ay tungkul de katabeng ide a manga lalaki ay depat a isin la i bebi de, naketingges ide a getodu a piyon de mittanak de.

¹³ Ta be i katabeng ay masépag de tungkolin de ay pegelang ni pesan pati talage ay matibong i innawa de a getodu tungkul de pagpanulusun a napa dikitam dehil de pagpakikaisin tam de Hisu Kristo.

Matud A Mahalage I Kamatoden Ni Pagpanulusun Tam

¹⁴ Hanga i pag-asa ko a geketakita de mandeli a panahon misan ay pesolat ko pa i tutugun a oyo dikaw tangani

¹⁵ anok man makadetong a tambing ay matinggesan yu dena i ugeli a matud be gepolong kamo a mangának ni Makedepat a needup, a i kapolongan na a magi arigi pati pakisa ni pagtodu a kamatoden.

¹⁶ Matud a mahalage i kamatoden ni pagpanulusun tam a pinatingges di. Napa ni agta eya a pinamatoden ni Ispiritu. Kinta eya ni manga anghel de langot. Ta sinabi dio de putok i i bereta a tungkul diya. Ta pinanulusonan eya ni kamakmokan. Pati tinanggep eya de langot a te kapangyediahan.