तितस 1 - डोटेली नयाँ करार

अबिबादन

¹ म, पावल यो चिठ्ठी तमनलाइ लेख्दाछु। म परमेश्वरको दास रे येशू ख्रीष्टको छान्या शिष्य हु। म परमेश्वरका चुनिया मान्सनको बिश्वासलाइ बलियो बनाउनाइ रे सत्य शिक्षालाइ जाण्नाइ सहयोग अददाइ नियुक्त भया हु, ताकि तिनन परमेश्वरलाइ खुशी बनाउन्या जीवन बिताउन सकुन।

² परिणाम स्वरुप तिनन परमेश्वरसित अनन्त जीवनको आसा अददाहान क्याकि परमेश्वर, जइले कभइ झुटि बोल्लाइन्न, उनले संसारको सृष्टि अददाहइ पइल्ली बाचा अर्याछ कि उनरा मान्सन सदाइकिलाइ बाच्या हुन।

³ रे आब ठीक बेलामि, परमेश्वरले मान्सनलाइ मेरा प्रचार बठेइ यो सुसमाचार प्रकट अर्याछ। परमेश्वर हामरा मुक्तिदाताले यो जिम्मा मलाइ दियो, यो काम उनकिलाइ अददाइलाइ आज्ञा दिया छन।

⁴ म यो चिठ्ठी तीतसलाइ लेख्दाछु। तु मेरो आफ्नोइ चेला जसोइ हइ क्याकि तुइले लगइ ख्रीष्टमी बिश्वास अरन्छइ। म प्रार्थना अद्दउ कि पिता परमेश्वर रे हामरा मुक्तिदाता येशू ख्रीष्ट तु प्रति अनुग्रही होउन रे तुलाइ सान्ति देउन।

तितसको सेवा

⁵ तबइकिलाइ मइले तुलाइ क्रेट टापुमि छाडिबर आया, ताकि तुइले ताँ हामरो काम पुरा अद्द सक रे मइले आदेस दिया जसेरि तुइले क्रेट टापुका हरेक सहरमि मण्डलिका अगुवान नियुक्त अर।

⁶ अगुवाकी एक मान्तर स्वानी हुनु पणन्छ, उ दोस रहित हुनु पणन्छ, तइका चेलाचेली बिश्वासि हुनु पणन्छ रे तिनन चरित्रहिन रे अनाज्ञाकारी हुनु पड्डइन।

⁷ क्याकि परमेश्वरको काम अद्द्या अगुवा भया हुनाले उ दोस रहित हुनु पणन्छ। उ हटि, छिट्टाइ रिसाउन्या, दराहा, सदाइ झगडा अद्द्या, पैसाको लोप अद्द्या हुनु पड्डइन।

⁸ तर अतिथि सत्कार अद्दया, औरको भलाइ अद्दया, संयमि, ठीक काम अद्द्या, पबित्र, रे आत्मानियंत्रण अद्द्या हुनु पणन्छ।

⁹ उइले येशू ख्रीष्टका बारेमि बिश्वासयोग्य सन्देसमि पक्‍का बिश्वास अददु पणन्छ जो हामले तइलाइ सिकाया थ्या। ताकि उइले औरलाइ सत्य शिक्षा माणनाइलाइ उत्साह दिन सकउ रे सत्य शिक्षाका बिरोधमी भयालाइ सुधार अद्द सकउ।

झुटा शिक्षक

¹⁰ म यो भणनउ क्याकि भौत मान्सनले सत्य शिक्षाका बिरुद्द बिद्रोह अद्द्या हुन, जइले बिना अर्थका कुरणी सिकाउनाहान रे औरलाइ धोका दिनाहान। यिन मान्सन त्यो समुहका हुन जइले चाहानाहान कि सब बिश्वासीले यहुदि मान्सनको कानुन पालन अरुन, बिसेस अरिबर खतनाको कानुन।

¹¹ यिन मान्सनलाइ सिकाउन्या अनुमति जन दिय, क्याकि जब तिनन झुटा शिक्षा सिकाउनाहान जो सिकाउनु पड्डइन, तिननले पुराइ परिबारको बिश्वासलाइ नास अददाहान। तिनन पैसा पाउनाइलाइ यिसो झुटा शिक्षा दिनाहान।

¹² क्रेट टापुका बासिन्दा एक जानो जो बुद्दिमान थ्यो, तइले भण्यो, “क्रेट टापुका मान्सन सदाइ झुटि बोल्लाहान। तिनन जंगली जनावरका जसोइ ब्यबहार अददाहान। तिनन अल्छी छन रे खद्दवा छन।”

¹³ क्रेट टापुका मान्सनका बारेमि यिन सब्द अइल लगइ सत्य छन, तबइकिलाइ तिननलाइ कडा सित हकार, ताकि तिननले येशू ख्रीष्टका बारेमि सत्य शिक्षामि बिश्वास अरुन।

¹⁴ रे सत्यतालाइ इन्कार अद्द्या मान्सका आज्ञा रे यहुदि मान्सनका दन्त्य काहानिमि ध्यान जनलाउन।

¹⁵ क्याकि जइ मान्सनका हृदय परमेश्वरका अगाडी सुद्द छन, तिननकिलाइ सब कुरणी रिति अन्सार सुद्द छन, तर तिन मान्सन जो दुष्ट रे येशूमि बिश्वास अद्दाइन्न तिननले अद्दया सब कुरणी असुद्द हुनाहान। क्याकि तिनरा हृदय रे बिबेक दुएइ पुरा रुपमि असुद्द भया छन।

¹⁶ यिन झुटा शिक्षकले भण्नाहान कि हाम परमेश्वरलाइ पछयाण्नाउ तर तिननले आफ्ना ब्यबहार बठेइ निक्केरि धेकाउनाहान कि तिननले परमेश्वरलाइ पछेणनाइन्न क्याकि परमेश्वरले यिन मान्सनलाइ घृणा अददाहान रे यिन मान्सन आज्ञापालन अद्दाइन्न रे तिननले केइ निका काम अद्द सक्दाइन्न।