रोमी 5 - डोटेली नयाँ करार

सान्ति रे आनन्द

¹ तबइकिलाइ हाम बिश्वास बठेइ धर्मि ठहरिरइछु, रे प्रभु येशू ख्रीष्टले हामरा निउति अर्याको काम बठेइ परमेश्वरसित हामरो मिलाप होइरइछ।

² हमरा बिश्वासका लाग्दा ख्रीष्टले हामलाइ उनरा अनुग्रहमी लेइराइछ, जाँ हाम अइल कल्लिया छु रे हाम निरधक्‍क रे खुशी भइबर परमेश्वरका महिमामि सहभागी हुन्या आसामि छु।

³ इति मान्तर होइन तर जब हाम समस्यामि हुनाउ तब हाम रमाउन सक्दाउ, क्याकि हामलाइ था छ कि समस्यामि हुनज्या हाम सहनशील हुन सीक्दाउ,

⁴ क्याकि हाम सहनशिलतामि निको भया हुनाले परमेश्वरले हामलाइ ग्रहण अददाहान रे उनले ग्रहण अर्या हुनाले हामसित आसा छ।

⁵ आसाले हामलाइ निरास अराउनइन, क्याकि परमेश्वरले हामलाइ दिया पबित्र आत्मा बठेइ परमेश्वरको प्रेम हामरा हृदय भरिया छ।

⁶ क्याकि हाम निर्बल हुनज्या ख्रीष्ट दुष्ट मान्सनकिलाइ तोकिया समयमि मर्या।

⁷ कसइलाइ धर्मि मान्सनकि निउति मद्दु असजि छ। सायद, कोइ साच्ची असल मान्सनकि निउति मद्दाइ तयार हुन्सकन्छ।

⁸ तर परमेश्वरले हामरि निउति उनरो प्रेम इसइमि धेकाउनाहान, कि हाम पापी छनाइ ख्रीष्ट हामरा निउति मर्या।

⁹ कि हाम परमेश्वरसित धर्मि ठहरिया छु क्याकि ख्रीष्ट हामरि निउति मर्या रे हामरा पापकिलाइ आफ्नो रगत बगायो, तबइकिलाइ ख्रीष्टले पक्‍कालगइ परमेश्वरका क्रोध बठेइ हामलाइ बचाउन्या हुन।

¹⁰ क्याकि हाम परमेश्वरका सत्तुर छनाइ उनरा चेलोको मृत्यु बठेइ परमेश्वरसित हामरो मिलाप भयाथ्यो, तबइकिलाइ हाम पक्‍का जाण्न सक्दाउ कि आब हाम उनसित मिलापमी छौ, उनले हामलाइ बचाउन्या हुन क्याकि ख्रीष्ट जिउना छन।

¹¹ इति मान्तर होइन, तर आब हामरा प्रभु येशू ख्रीष्ट बठेइ परमेश्वरसित हामरो मिलाप भइ सक्या छ तबइकिलाइ हाम परमेश्वरमि रमाउनाउ।

आदम बठेइ मृत्यु रे परमेश्वर बठेइ जीवन

¹² परमेश्वरले सृष्टि अर्या पइलो मान्स आदम बठेइ संसारमी पाप आयो, रे आदमले पाप अर्या हुनाले उन मर्या। यिसेरी आदमको पापले सब मान्सन पापी भया रे सब मान्सनमि मृत्यु आयो।

¹³ परमेश्वरले मोशालाइ कानुन दिनाहइ पइल्ली संसारमी पाप थ्यो तर त्यो पाप गणीया थेइन क्याकि तइ बेला सम्म ताँ तोड्डाइ केइ कानुन थेइन।

¹⁴ आदम बठेइ मोशा सम्मका सब मान्सनले पाप अर्यो, रे तिनन सब मर्या जबकि तिननले आदमकी जसेरि कानुन तोडीबर पाप अरेइन। आदम एक जाना आउन्यावालाको प्रतिरुप थ्या।

¹⁵ तर आदमको पाप परमेश्वरले आफ्ना अनुग्रहमी हामलाइ दिन्या उपहार जसो होइन। क्याकि भण्या एक जाना मान्सको पापले भौत मान्सनमि मृत्यु ल्यायो। तर परमेश्वरको अनुग्रह रे धार्मिकताको उपहार जो उनले हामलाइ दिया छ, त्यो बड्ता मुल्यको छ रे भौत मान्सन यइको अनुभव अर्या छन। रे येशू ख्रीष्टले उनरा अनुग्रहमी मान्सका रुपमि अर्या कुरणीले त्यो सम्भब भयो।

¹⁶ परमेश्वरले हामलाइ दिन्या उपहार आदमका पाप जसो होइन। क्याकि एक पापले दण्ड लेयो तर हामले भौत पाप अरिबर लगइ परमेश्वरले हामलाइ त्यो उपहार दियो जइ बठेइ हाम उनसित धर्मि ठहरिया।

¹⁷ क्याकि एक जाना मान्सका पापका लाग्दा सब मान्सनमि मृत्यु आयो, तर जइले अनुग्रह रे धार्मिकताको उपहार पायो, तिननले अनन्त जीवन पाउन्या हुन रे येशू ख्रीष्टसित सासन अद्दया हुन क्याकि तिननले उनमी बिश्वास अर्या छन।

¹⁸ तबइकिलाइ जसेरि एक मान्सका पापले सब मान्सन दण्डका भागिदार बन्या, तसेरि एकइ मान्सको धार्मिकताका कामले सब मान्सका निउति परमेश्वरका नजरमि धर्मि ठहराइबर जीवन ल्याउछ।

¹⁹ क्याकि जसेरि एकइ मान्सको अनाज्ञाकारिताले भौत जाना पापी बनाइया, तसेरि एकइ जनाको आज्ञाकारिता बठेइ भौत जाना धर्मि बनाइया।

²⁰ मोशाको कानुन दिइयो ताकि सब मान्सनले था पाउन सकुन कि तिनन कति पापी थ्या, तर जब मान्सनले भौत पाप अददाइ गया तब परमेश्वरले धेकाया अनुग्रह लगइ बडडोइ गयो।

²¹ जसेरि सब मान्सनले पाप अर्यो रे सब मर्या तसेरि हामरा प्रभु येशू ख्रीष्ट बठेइ परमेश्वरका अनुग्रहले तिननलाइ धर्मि ठहराउन्या हुन रे अनन्त जीवन दिन्या हुन।