प्रकाश 9 - डोटेली नयाँ करार

पाँचौ तुरहि

¹ पइ पाँचौ स्वर्गदुतले आफनी तुरहि बजायो, रे मइले एक तारा धेक्या, जो अग्गास बठेइ धर्तीमि झड्या थ्यो। तइ तारालाइ अतल कुण्डको साँचो दिइयो जइको गइराइको अन्त आथिन।

² तइले अतल कुण्ड खोल्यो रे तइ अतल कुण्ड बठेइ आगाका ठुला भट्टि बठेइ निकल्याको धुकाँ जसो आयो रे कुण्डका धुकाँले सुर्य रे बायुमण्डल अनारो पाड्यो।

³ तइ धुकाँ बठेइ धर्तीमि सलह निकल्या रे तिननले बिच्छिका जसेरि मान्सनलाइ काट्ट्या सक्ति पायो।

^4-5 जसेरि कसइलाइ बिच्छिले कट्या बठेइ दुःख पाउनाहान, तसेरि पाँच महिना सम्म तसा फटयाइग्रालाइ तिनन मान्सनलाइ दुःख दिन्या अनुमति दिइयो, जइका चानामि परमेश्वरको छाप थेइन। तर परमेश्वरले तिननलाइ आज्ञा दियो कि तिननले घाँस अथवा केइलगइ रुखलाइ नोक्सानी पुर्याउनु हुनइन रे मान्सनलाइ माद्दु हुनइन।

⁶ यिन पाँच महिनामि मान्सनले मद्दाइलाइ बाटो खोज्ज्या हुन, तर तिनन मद्द सक्द्या होइन तिनन मद्द्या इच्छा अद्द्या हुन तर तिनन मद्द सक्द्या होइन।

⁷ यिन सलह लडाइका निउति तयार अर्या घोडाको जसोथ्यो। तिननले आफ्ना मुन्टामि तसो केइ लायो जो सुनको मुकुट जसो धेकिन्थ्या। तिनरि अनार मान्सनकि जसि धेकिन्थी।

⁸ तिनरा रौ स्वानिका रौ जसा लामा थ्या, रे तिनरा दाँत सिंहका दाँत जसा बलिया थ्या।

⁹ पइ तिनरा छातिमि फलामका कवज लायाथ्या, जब तिनन उड्डा थ्या तिननले यिसो आवाज अर्यो जसोकि भौत घोडा रे रथ लडाइ अददाइ दकुडाथ्या।

¹⁰ तिनरि पुछडी रे खिल बिच्छिका जसा थ्या। तिनरि पुछडिमि भया खिलले पाँच महिना सम्म मान्सलाइ कष्ट दिन्या सक्ति छ।

¹¹ तिनरो एक राजा छ जइले तिननमि सासन अददाछ, जो अतल कुण्डको दुत हो। हिब्रु भासामि तइको नाउँ एबाड्डोन रे ग्रीक भासामि तइको नाउँ अपोल्लियोन हो, जइको अर्थ उ जसले नष्ट पणन्छ।

¹² पाँच महिना पछा यो आपत सकिन्छ, तर यइ पछा आजी दुइ बिपत्ति आउन बाँकि छन।

¹³ पइ छयाँउ स्वर्गदुतले आफनी तुरहि बजायो। जब उनले त्यो तुरहि बजायो, तब परमेश्वरका अगाड़ी धुप बाल्लाइ बेदिको चार कुना बठेइ मइले एक आवाज सुण्या।

¹⁴ रे आवाजले छयाँउ दुतलाइ इसो भण्यो, “युफ्रेटिस भणिन्या ठुलो नदिका किनारमी बादिराख्या चार दुतलाइ खोल दिय।”

¹⁵ तइ बेला चार दुत खोल्या थ्या, तिनन पइल्ली तयार भयाथ्या रे तिननलाइ यो समय, यइ दिन, यइ महिना रे यइ बर्षकि निउति तयार पाड्या थ्या। त्यो आब आइ सक्या थ्यो, तिननले संसारमी भया एक तिहाइ मान्सनलाइ माद्दु पणन्छ।

¹⁶ तिननले ठुलो संख्यामि लडाइ अददाइ घोडसवार जम्मा अर्यो जइको संख्या मइले बीस करोड सुण्या।

¹⁷ मइले दर्सनमि धेकिया घोडा रे घोड सवार इसा धेकिनथ्या: तिननसित छातिको रक्षा अद्द्या थ्या जो आगा राता, गाढा निलो रे गन्धकजसो पेलो थ्यो। घोडाका मुन्टा सिंहका मुन्टा जसा धेकिनथ्या रे तिनरा मुख बठेइ आगा, धुका रे गन्धक निक्‍कलाथ्या।

¹⁸ तिन तीन बिपत्ति आगो, धुकाँ रे गन्धक जो घोडा मुख बठेइ निक्‍कलाथ्यो। तइले एक तिहाइ मान्सलाइ मार्यो।

¹⁹ क्याकि तिन घोडासित मान्सनलाइ माद्दाइ दुइ फरक चिज थ्या, पइलो तिनरा मुख बठेइ निकल्या कुरणी, दोसरो तिनरा पुछडी, क्याकि तिनरि पुछडि स्यापइ जसि थिन। मान्सनलाइ काटटाइ तिनरा मुन्टा थ्या।

²⁰ रे और मान्सन जो बिपत्ति बठेइ मरेइन, तिननले आफना सुनका मुर्ति, चाँदी, काँसा रे ढुङा रे काठका मुर्तिलाइ आराधना अद्द छाडेइन जो तिननले बनाया थ्या। तिन मुर्ति धेक्द सक्दाइन, बोल्ल सक्दाइन रे हिट्ट लगइ सक्दाइन, तिननले भूतलाइ पुज्ज लगइ छाडेइन।

²¹ तिननले आफले अर्या हत्या, जादुगरी, व्यभिचार रे चोरिको काम अद्द छाडिबर परमेश्वरतिर फर्केइन।