प्रकाश 7 - डोटेली नयाँ करार

एक लाख चवालिस हजारमि मोहोर

^1-2 तइ पछा, मइले संसारका चार कुनामि चार जाना स्वर्गदुत कल्लिया धेक्या। तिन स्वर्गदुतले परमेश्वर बठेइ संसारलाइ हानि हुन्या अधिकार प्राप्त अर्यो चाहे त्यो समुद्रमी होउ अथवा जमिनमी। तिननले हावालाइ संसारका चार कुना बठेइ रोक्यो, ताकि समुद्रमी रे भुमिमि रे बनमि हावा चल्लारया जन होउ। मइले अर्खो स्वर्गदुतलाइ पुर्वमि प्रकट भया धेक्या। उनसित परमेश्वर बठेइ छाप थ्यो जो सदाइ जिउना छन। त्यो स्वर्गदुतले तिन चार जाना स्वर्गदुतलाइ ठुलो स्वरमि बोलायो रे उनले भण्यो,

³ “हामले हामरा परमेश्वरका दासका चानामि मोहर नलाउन्ज्या धर्ति, समुद्र वाँ रुखलाइ केइ हानि जन अर।”

⁴ जब स्वर्गदुतले चिह्न लाउन सक्यो, कसइले मलाइ भण्यो कि तिन मान्सनको जइका चानामि स्वर्गदुतले परमेश्वरको छाप लगाइया थ्यो तिनरो संख्या एक लाख चौवालिस हजार थ्यो। यिन मान्सन इस्राएल देशका सब बाह्र कुल बठेइ आयाथ्या।

⁵ यहूदाका कुल बठेइ बार हजारलाइ छाप लाइयो, रुबेनका कुल बठेइ बार हजारलाइ, गादका कुल बठेइ बार हजारलाइ,

⁶ आशेरका कुल बठेइ बार हजारलाइ, नप्तालीका कुल बठेइ बार हजारलाइ, मनश्शेका कुल बठेइ बार हजारलाइ,

⁷ शिमियोनका कुल बठेइ बार हजारलाइ, लेविका कुल बठेइ बार हजारलाइ, इस्साखारका कुल बठेइ बार हजारलाइ,

⁸ जबुलूनका कुल बठेइ बार हजारलाइ, योसेफका कुल बठेइ बार हजारलाइ, बेन्यामीनका कुल बठेइ बार हजारलाइ, मोहोर लाइयो।

सेता लत्ता लाया ठुलो भिड

⁹ यइ पछा मइले ताँ इति ठुलो मान्सको भिड धेक्या कि कसइ मान्सले लगइ तिनरो गण्न सक्दइन थ्यो। तिनन संसारमी हरेक जाति, कुल, मान्सन रे भासा बठेइ आयाथ्या, तिनन सिंहासन रे थुमाका अगाडी कल्लिया। तिननले सेता लत्ता लायाथ्यो, रे हरेक मान्सले आफ्ना हातमि खजुरका हाँङा समाया थ्यो। त्यो सम्मानको चिन्ह थ्यो।

¹⁰ तिनन ठुला सोरले कराया: “सिंहासनमि विराजमान हुन्या हामरा परमेश्वरलाइ धन्यबाद होउ रे थुमालाइ प्रसंसा भया होउ! तम मान्तर छौ जइले मुक्ति दिन्छौ।”

¹¹ पइ सब स्वर्गदुत सिंहासनका वलतिर पलतिर रे अगुवानका वलतिर पलतिर रे चार जिउना प्राणिका वलतिर पलतिर कल्लिया थ्या। तिनन सब सिंहासनका अगाडी घोप्टो पडिबर दण्डबत अर्यो। रे इसो भणि परमेश्वरको आराधना अर्यो,

¹² “आमेन! हाम तमरो प्रसंसा अददाउ, धन्यबाद दिनाउ रे तमरो सम्मान अददाउ हामरा परमेश्वर सदासर्वदाकि निउति हाम स्वीकार अददाउ कि तम पूरारुपमी ज्ञानि छौ, सक्तिशाली छौ जइले सब चिज सदाइकि निउति अद्द सकन्छौ। आमेन!”

¹³ अगुवान मध्ये एक जनाले मलाइ सोध्यो, “यिन सेता लत्ता लाउन्या मान्सनको हुन, रे काँ बठेइ आया हुन?”

¹⁴ पइ मइले तिनलाइ भण्या, “मलाइ था आथिन तर तमलाइ था छ।” रे तिनले मलाइ भण्यो, “तिन मान्सन हुन जइले ठुलो कष्ट भोग्या छन। तिननले थुमाका रगतमि आफना लत्ता धोयो रे तिनन सेता भया, यइको मतलब यो हो कि तिनरो पाप हटाइया छ।”

¹⁵ तबइकिलाइ, तिनन परमेश्वरका सिंहासनका अगाडी कल्लिनाहान, रे तिनन पुरा समय परमेश्वरका घरमि उनरो सेवा अद्दाहान रे सिंहासनमि विराजमान हुनु हुन्याले उनरो हेरचाह अददाहान क्याकि उन तिननसित ताँ हुनाहान।

¹⁶ तिनन कभइ भोकाउन्या रे तिसाउन्या होइन, तिनन आब घाम अथवा तातो कसइ चिजले लगइ पोलिनाइन।

¹⁷ क्याकि सिंहासनका बिचमि भया थुमा तिननले ग्वालाका जसेरि तिनरो रेख देख अददाहान। रे तिननलाइ डोर्याइबर उनले तिननलाइ तिन ताजा पानी पिनाइ लैजान्या हुन जइले मान्सलाइ जीवन दिन्छ। रे परमेश्वरले तिनरा आँखा बठेइ सब आँउस पुछि दिन्या हुन।