प्रकाश 6 - डोटेली नयाँ करार

मोहोरका रहस्य

¹ जब थुमाले तिन सात मध्ये एक मोहोर तोड्या मइले धेक्या, रे मइले चार जिउना प्राणि मध्ये एकलाइ जोरले बोल्लार्या सुण्या। उइको आवाज गर्जन जसो ठुलो थ्यो उइले भण्यो, “आब आस अगाडी बड।”

² तइ पछा मइले एक सेतो घोडा धेक्या, तइमि सवार हुन्या सित एक धनु थ्यो रे तइलाइ एक मुकुट दिइयो, उन स्वर्ग बठेइ पृथ्बीका मल्तिर गया उनरा जसेरि जो पइल्ली बिजय भइ सक्या छ रे आजी बिजयी हुन्या छ।

³ जब थुमाले दोसरो मोहोर तोड्यो, तब दोसरो जिउना प्राणिले, “आब आस अगाडी बड” भण्या मइले सुण्या।

⁴ तुरुन्तइ एक भौत रातो घोडा आयो। घोड सवारलाइ तरबार दिइयो रे उइलाइ संसार बठेइ सान्ति हटाउन्या रे मान्सनलाइ आपतमी पड्डया अधिकार दिइयो ताकि तिननले एक अर्खालाइ मारुन।

⁵ जब थुमाले तेसरो मोहोर तोड्यो, तेसरा जिउना प्राणिले “आब आस अगाडी बड” भण्या मइले सुण्या रे मइले एक कालो घोडो बाइर आया धेक्या। घोडा सवारका हातमि एक तराजु थ्यो।

⁶ कि एक मान्सले तिन चार जिउना प्राणि बिच बठेइ बोल्या जसो मइले सुण्या, “एक दिनको द्याणी मान्तर एक किलो धान किन्नाइ ठिक्‍क छ, रे तीन किलो गउँ लगइ एक दिनको द्याणी हुन्छ, तर तेल रे अंगुरको रसको मोल बदलिन्या होइन।”

⁷ जब थुमाले चौथो मोहोर तोड्यो, तब चौथो जिउना प्राणिले “आब आस अगाडी बड” भण्या मइले सुण्या,

⁸ तइ पछा मइले पेलो घोडा धेक्या रे घोडसवारको नाउँ मृत्यु थ्यो, रे पाताल तइका पछा लाग्याथ्यो। तिननले पृथ्बीमि बसोबास अद्द्या मान्सनको संख्याको चौथो भाग माद्द्या अधिकार पाए। तिननले उनलाइ तरबारले मार्यो, तिननले उनलाइ भोकले मार्यो रे तिननले उनलाइ खराब रोगले मार्यो रे तिननले जंगली राक्षसलाइ लगइ तिननलाइ माद्द लायो।

⁹ जब थुमाले पाँचौ मोहोर तोड्यो, मइले बेदिका तल्तिर तिनरा आत्मालाइ धेक्या जो मरिया थ्या क्याकि तिनन परमेश्वरका बचन रे तिननले पाया सन्देश सित बिश्वासयोग्य थ्या।

¹⁰ पइ तिनन इसो भणबर जोरले परमेश्वरलाइ पुकार्यो, “हे पबित्र रे सत्य प्रभु, क्याकि तम पृथ्बीमि बस्सया तिन दुष्ट मान्सनलाइ सजाय दिनाइ इति लामो समय सम्म पर्खन्छौ? हाम तमलाइ बिन्ति अददाउ कि तमले हामलाइ हत्या अद्द्या मान्सको ब्यवहारको बदला लिया।”

¹¹ तब तिनन सबइलाइ सेतो लत्ता दिइयो, रे थोकाइ समयकी निउति आजी पख भणियो जबसम्म तिनरा सहकर्मी नौकर रे भाइन ख्रीष्टको सेवामि आजी लगइ बाँच्या थ्या जइलाइ उनरी जसेरि माददु पणन्छ। तिननले यो सब कुरणी नभया सम्म पख्दु पण्यो।

¹² रे मइले थुमालाइ छैठौं मोहोर तोड्यो धेक्या, ताँ एक ठुलो भुइँचालो आयो। सुर्य भाङरा जसो कालो भयो, रे पन्युकि जुन रगत जसि रात भइ।

¹³ तारा अग्गास बठेइ पृथ्बीमि झण्या, जसेरि हिंसात्मक बतासले अन्जिरको रुखलाइ हलाउन्ज्या नपाक्या फल झड्डाहान।

¹⁴ अग्गास किताब बेडिएइ जसेरि अदृष्य भयो रे सबइ समुद्रका टापु रे पाहाड तिनरा आ-आफना ठाउँ बठेइ परिबर्तन भया।

¹⁵ नतिजाको रुपमि पृथ्बीका राजा, राजकुमार, जर्नेल, धनि, बलिया, हरेक दास रे स्वतन्त्र मान्स पाहाडका गुफा रे पखान तल्तिर लुक्या।

¹⁶ तिननले पाहाड रे पखानलाइ भण्यो, “हाममि झड रे सिंहासनमि विराजमान भया बठेइ रे थुमाका क्रोध बठेइ हामलाइ लूका रे सिंहासनमि बस्या मान्सले हामलाइ धेक्द जन सकुन।

¹⁷ क्याकि त्यो भयानक दिन आइ सक्या छ जब परमेश्वर रे थुमाले सबलाइ सजाय दिन्या हुन रे कोइलगइ यइ दण्ड बठेइ बच्च सक्द्या होइन।”