प्रकाश 4 - डोटेली नयाँ करार

स्वर्गीय सिंहासनको दर्सन

¹ यिन सब घटना भइ सक्या पछा म, यूहन्नाले धेक्या कि स्वर्गमि एक ढोका खुल्या थ्यो। तब मइले आजी तेइ आवाज सुण्या जो तुरहिको आवाज जसो मसित बोल्लाथ्यो। तइले मलाइ भण्यो: “याँ मल्तिर आ, रे आब यइ पछा जो कुरणी हुनु पणन्छ त्यो म तुलाइ धेकाउन्या हु।”

² पबित्र आत्मा ममि आया। हेर, स्वर्गमि एक सिंहासन थ्यो रे एक जाना तइ सिंहासनमि बस्याथ्या

³ उन जो सिंहासनमि विराजमान भयाथ्या उन एक बहुमुल्य ढुंगा जसाइ धेकीन्नाथ्या, जइलाइ यास्पर ढुंगा रे कार्नेलियन ढुंगा भणिन्छ। त्यो सिंहासन वलतिर पलतिर इन्नाराइन थ्यो, रे यो हरियो बहुमुल्य पत्थर जसो धेकिन्थ्या।

⁴ चौबिस सिहासनले तइ सिहासनलाइ घेरया थ्यो रे मुन्टामि सुनका मुकुट रे सेता लत्ता लाया चौबिस जाना अगुवान तिन सिंहासनमि बस्या मइले धेक्या।

स्वर्गमि आराधना

⁵ तइ सिंहासन बठेइ बिजुलि, आवाज रे गर्जन निकलाथ्या रे तइ सिंहासनका सामने सात बत्ति बल्लाथ्या। यिन परमेश्वरका सात आत्मा हुन।

⁶ तइ सिंहासनका अगाडी समुद्र जसो फराकिलो केइलगइ थ्यो। जो सिसा जसो स्पष्ट थ्यो। सिंहासनका चारइ किनारमी जिउना प्राणि थ्या, जइका शरीर आँखाले पुराइ ढोकिया थ्या।

⁷ पइलो जिउनो प्राणि सिंह जसोथ्यो, दोसरो बहर जसो, तेसरा जिउना प्राणिको अनार मान्सका जसो रे चौथो जिउनो प्राणि उण्या गरुण जसोथ्यो।

⁸ तिन चारै जिउना प्राणिका छ-छ पख्यार थ्या रे चारै तिर रे भित्तर बाइर तिर आँखाले भरियका थ्या। दिन रात तिनन नथामिबर इसो भंणि गाइ राख्दाहान, “पबित्र, पबित्र, पबित्र परमप्रभु सर्वसक्तिमान परमेश्वर, जो छन जो थ्या रे जो आउन्याहुन।”

^9-10 जो सिंहासनमि विराजमान छन उनइ हुन जो सदासर्वदा जिउना रनाहान रे जबलगइ जिउना प्राणिले उनलाइ महिमा, आदर, धन्यबाद चडाउनाहान, तब तिन चौबिस जाना अगुवा उनरा सामने घोप्टो पडिबर उनरो उपासना अददाहान, रे दण्डबत अद्दाहान, आ-आफना मुकुट सिंहासनका अगाडी राखिबर इसेरि गाउनाहान:

¹¹ “हे प्रभु हामरा परमेश्वर, तमले सब थोक सृष्टि अर्या। तमराइ इच्छा अनसार तिन सृष्टि भया रे तिन अस्तित्वमि छन। तबइकिलाइ तम महिमा, आदर रे सक्ति ग्रहण अद्द्या योग्यका छौ।”