प्रकाश 3 - डोटेली नयाँ करार

सार्डिस सहरको मण्डलि

¹ येशूले मलाइ इसो लगइ भण्यो, “सार्डिस सहरका मण्डलिका स्वर्गदुतलाइ यो सन्देश लेख: म उइ हुँ जइले मेरा हातमि सात तारा समाया छु रे जइले परमेश्वरका सात आत्मालाइ बाहिर पठाउनाहान। मलाइ था छ तम कसा काम अर्न्छौ। तमन ममि बिश्वासयोग्य बिश्वासिन जसो धेकिन्छ तर साच्ची तमन आब मलाइ पछ्याउन।

² तबइकिलाइ उठ, ममि तमरो बिश्वासलाइ बलियो पाण ताकि यो सब पुरा रुपमि जन जाउ, क्याकि तमरो केइ बिश्वास बाँकि छ। मलाइ थाहा छ कि तमन सिद्द आथिनु क्याकि तमनले जी अददाछौ तइ बठेइ परमेश्वर खुशी आथिन।

³ तमनले पइल्ली सुण्या रे बिश्वास अर्या शिक्षालाइ याद अर। तमनलाइ जी सिकाइया थ्यो तइलाइ पालन अर, तमरो लापरबाइ बठेइ पाप अद्द छाडिबर परमेश्वरतिर फर्क। यदि तमनले लापरबाइ अद्द छाड्यानु भण्या, मेरो आगमन एक चोरको आगमन जसोइ अचानक हुन्या हो, रे तमनलाइ त्यो बेला लगइ था हुनइन जब म तमनलाइ सजाय दिन आउनउ।

⁴ तर तमरा बिचमि सार्डिस सहरमि कोइ मान्सन छन जो पाप बठेइ असुद्द भया आथिन तिनन सुद्द सेता लत्ता लाइबर मसित जिउन्या हुन, क्याकि तिनन योग्य छन।

⁵ जइ मान्सनले दुष्ट सक्तिलाइ परास्त अरन्छ, तिननले सेता लत्ता लाउन्या हुन। म तइ मान्सको नाउ तइ किताब बठेइ मेटिदिन्या आथिन जइमि अनन्त जीवन पाया मान्सनको नाउ लेखिया छ। तर म मेरा बा रे उनरो सेवा अद्द्या दुतका सामने कल्लिनउ म घोषणा अद्द्या हु कि म यइ मान्सलाइ चन्नउ।

⁶ तम जो सुणनाछौ, तइ सुणा कुरणिका बारेमि ध्यानले सोच कि पबित्र आत्माले मण्डलिलाइ कि भण्नाहान।”

फिलाडेल्फिया सहरको मण्डलि

⁷ येशूले मलाइ इसो लगइ भण्यो, “फिलाडेल्फिया सहरका मण्डलिका स्वर्गदुतलाइ यो सन्देश लेख: म उइ हुँ जो पबित्र रे जो सत्य छ, जइसित राजा दाउदको चाबि छ, जब म तइ चाबिले ढोका खोल्लउ, कसइले लगइ तइलाइ बन्द अद्द सक्दइन रे जब मइले चाबिले बन्द अद्दउ कसइले खोल्ल सक्दइन। जी म तमनलाइ भणनउ उइलाइ सुण:

⁸ मलाइ था छ तम कसा काम अर्न्छौ। मलाइ था छ कि तमनसित थोक्काइ सक्ति छ, पइलगइ मइले तमनलाइ भण्या कुरणी तमनले पालन अर्या छौ। तमनले ममि लगातार बिश्वास अर्या छौ। तबइकिलाइ मइले तमरा निउति एक ढोका खोल्या छु जइलाइ कसइले बन्द अद्द सक्दइन।

⁹ तिन मान्सन जो सैतानको एक समुहका सदस्य हुन, तिनन दाबि अददाहान कि तिनन यहुदि हुन तर तिनन साँचो यहुदि होइन रे तिनन झुटि बोल्ला छन। म तिननलाइ आउन्या बनाइबर तमरा अगाडी ढोग्द्या बनाउन्या हु रे म तमनलाइ प्रेम अद्दउ भणन्या तिननले था पाउन्या हुन।

¹⁰ कष्ट भोगन्ज्या धिरज राख्द्या मेरो सन्देशकिलाइ तमनले पालन अर्या, तबइकिलाइ म तमनलाइ सुरक्षित राख्दउ। यो परिक्षणको समय यइ संसारका सब मान्सनमि आउन्या हो।

¹¹ म छटाइ आउन्ना छु। तमनले ममि दृढ़ भइबर बिश्वास अरि राख ताकि तमरो मुकुट कसइले लइजान जन सकउ।

¹² जइ मान्सनले दुष्ट सक्तिलाइ परास्त अरन्छ, तिनन परमेश्वरका तिन मन्दिरका खामा जसाइ हुन्या हुन जइको म सेवा अद्दउ रे तिननले यइलाइ कभइ छाड्या आथिन। म ताँ उनरा सरीरमि मेरा परमेश्वरको नाउ म लेख्दया हु। रे परमेश्वरको सहरको नाम, जइलाइ नयाँ यरुशलेम भणिन्छ। यो त्यो सहर हो, जो मेरो परमेश्वर बठेइ स्वर्ग बठेइ तलतिर आउन्छ। म ताँ उनरो सरीरमि मेरो नयाँ नाउँ लगइ लेख्दया हु।

¹³ तम जो सुणनाछौ, तइ सुणा कुरणिका बारेमि ध्यानले सोच कि पबित्र आत्माले मण्डलिलाइ कि भण्नाहान।”

लाउडिकिया सहरको मण्डलि

¹⁴ येशूले मलाइ इसो लगइ भण्यो, “लाउडिकिया सहरका मण्डलिका स्वर्गदुतलाइ यो सन्देश लेख: म उइ हुँ जइलाइ आमिन भणिन्छ, क्याकि म भरोसायोग्य छु रे मइले परमेश्वरका बारेमि भण्या सब सत्य छ। म लगइ सबइको स्रोत हुँ जी उनले सृष्टि अर्यो। जी म तमनलाइ भणनउ उइलाइ सुण:

¹⁵ मलाइ था छ तम कसा काम अर्न्छौ तमरा लक्षण पानी जसो छ जो न त तातो छ न ठण्न। म चाहनउ कि यदि तमन मलाइ पछ्याउन्छौ भण्या, साच्ची पछ्या, यदि होइन भण्या जन पछ्या।

¹⁶ तर, क्याकि तमरा लक्षण पानी जसो छ जो न त तातो छ न ठण्न छ, तबइकिलाइ म तमनलाइ इन्कार अद्द तयार छु।

¹⁷ तमन भणन्छौ, ‘म धनि छु रे मसित भौत सम्पति छ। मलाइ चाइन्या सब चिज मसित छ।’ तर सत्य यो हो कि तमन अन्धा जसा छौ, तमन साच्ची कसा छौ भणन्या कुरणी तमलाइ था आथिन। तमलाइ दयाको आबश्यकता छ, क्याकि तम गरिब छौ, यइको मतलब तमरो बिश्वासको अभाब छ। तम लगइ तसा मान्सन जसा छौ जइसित लत्ता आथिन।

¹⁸ तबइकिलाइ, म तमलाइ सल्लाह दिनउ कि आगो बठेइ सुद्द भया सुण म बठेइ कीन ताकि तम साँच्चि धनि बन्न सक। तमले आफइले लाउनाइ निउति सेता लत्ता लगइ किन्नु पण्यो जइका लाग्दा मान्सनले तमलाइ बिना लत्ता धेकिन्या त्यो लाज बठेइ बाच्च सक। तमरा आँखामी लाउनाइ निउति तमले केइ मलम लगइ किन्नु पणन्छ, ताकि तम धेक्द सक्द्या हौ।

¹⁹ जइलाइ म प्रेम अद्दउ तिननलाइ म हप्काउनउ रे सुधार अद्दउ। तबइकिलाइ सहि अददाइलाइ उत्सुक होउ, रे पाप अद्द छाडिबर परमेश्वरतिर फर्क।

²⁰ सुण, तमरा हृदयमि पस्साइलाइ, म घरको बाइर कल्लिर्या रे ढोका ढकढक अददार्या मान्स जसो हुँ। यदि तमले मेरो आवाज सुण्या रे मेरी निउति आफ्नो हृदय खोल्या भण्या, म भितर आउनउ रे हाम एक अर्खासित संङइ संगति अद्दया हौ।

²¹ जइ मान्सनले दुष्ट सक्तिलाइ परास्त अरन्छ, तिनन मसित मेरा सिंहासनमि बस्या हुन जसेरि मइले जित्या रे मेरा पितासित उनरा सिंहासनमि बस्या।

²² तम जो सुणनाछौ, तइ सुणा कुरणिका बारेमि ध्यानले सोच कि पबित्र आत्माले मण्डलिलाइ कि भण्नाहान।”