प्रकाश 20 - डोटेली नयाँ करार

एक हजार बर्ष

¹ तइ पछा अतल कुण्डको साँचो रे एक ठुलो साङलो हात समाया एक स्वर्गदुत स्वर्ग बठेइ ओरल्या मइले धेक्या।

² तिनले तइ अजिङ्गर, त्यो पइलिको पुरानो स्याप, जो सैतान हो, तइलाइ पोकड्यो, पइ एक हजार वर्षका निउति बादिबर राख्यो।

³ तिनले तइलाइ अतल कुण्डमी फाल्दियो, रे तइ कुण्ड बन्द अरिबर मोहर लाइदियो, कि एक हजार बर्ष पुरा नहुइय्याँ सम्म जाति-जातिलाइ तइले भडकाउन जन पाउ। तइ पछा केइ समयका निउति तइलाइ फुकाइ दिनु पणन्छ।

⁴ रे तइ पछा मइले केइ सिंहासन धेक्या, जइमि तिनन बसिरइथ्या जइको मुन्टो काटिया थ्यो क्याकि तिननले येशूका सन्देश रे परमेश्वरको बचनको घोषणा अर्याथ्या। यिन मान्सनले तइ राक्षसको रे तइका मुर्तिको आराधना अर्या थेइन, रे तिननले आफ्ना चानामि अथवा हातमि तइ राक्षसको छाप स्वीकार अरेइन। तिनन आजी जिउना भया रे सिंहासनमि बस्या। परमेश्वरले तिननलाइ सासन अद्द्या अधिकार दियो रे तिननले ख्रीष्टसित एक हजार बर्षकि निउति सासन अर्यो।

^5-6 यिन मान्सन पइला हुन जो मर्या बठेइ जिउना भया छन, रे तिनन बिसेस अरिबर धन्य रे पबित्र छन। तिननमि दोसरो मृत्युको केइ सक्ति आथिन। तिनन परमेश्वर रे ख्रीष्टकी निउति पुजारि हुन्या हुन रे तिननसित एक हजार बर्ष सासन अद्द्या हुन। एक हजार बर्ष सम्म कसइ अन्य मर्या मान्सलाइ मर्या बठेइ जिउना बनाया थेइन।

सैतानको अन्तिम बिनास

⁷ एक हजार बर्ष भया पछा सैतान तइका कैद बठेइ छुटन्छ,

⁸ रे धर्तिका चारै तिर भया गोग रे मागोग जातिलाइ लडाइका निउति जमा अराउनाइ निकलिबर आउन्या हो। तइका संख्या समुद्रका बालुवा जति भौत हुन्या हुन।

⁹ तिननले सारा धर्ति जाँसक्‍कइ बाइर निकल्या। तिननले परमेश्वरले प्रेम अद्द्या सहरलाइ घेर्यो, जाँ उनरा मान्सन बस्नथ्या। तर स्वर्ग बठेइ आगो बर्सिबर तिननलाइ भस्म पाड्दियो।

¹⁰ तइ पछा तिननले सैतानलाइ गन्धकले बल्ल्या ठाउँमि खित्यो जइले तिन सबइ मान्सनलाइ धोका दियो। तसइ ठाउँमि हुन्या हो जाँ तिननले पइल्ली राक्षस रे झुटो अगमबक्तालाइ खित्याथ्यो। आगोले दिन रे रात तिन सबइलाइ सदासर्वदा यातना दिन्या हुन।

¹¹ रे मइले एक ठुलो सेतो सिंहासन, रे तइमि बसिर्यालाइ धेक्या। धर्ति रे अग्गास उनरा उपस्थिति बठेइ भागिबर गया, रे कसइले धर्ति रे अग्गासलाइ आजी धेकेइन।

^12-13 रे मइले मर्या मान्सन धेक्या, जो महत्वपूर्ण रे महत्वहिन छन, तइ सिंहासनका अगाडी कल्लिया धेक्या। मान्सन जो समुद्रमी डुबिबर मर्याथ्या, चिहानमि भया सबइ मर्या लगइ, सबइ मान्सन जो पातालमि थ्या, तिनन सब सिंहासनका सामने कल्लिया। त्यो किताब खोलियो जइमि अनन्त जीवन पाया मान्सनको नाउ लेखिया आथिन। तिन किताब लगइ खोलिया जइमि मान्सनले कि अर्याछ सब लेखियाथ्यो, रे प्रत्येकलाइ उइले अर्या काम अनसार न्याय गरियो, जो तइ किताबमी लेखियाथ्यो।

^14-15 सबइ मान्सन जइको नाउ तइ किताबमी लेखिया थेइन जइमि अनन्त जीवन पाया मान्सनको नाउ लेखिया छ। तिनन आगाका समुद्रमी खितिया। तइ पछा, आब मृत्यु हुनइन, न त पाताल हुन्छ जाँ मर्या मान्सन जानाहान। क्याकि सब मान्सन जइको नाउ तइ किताबमी लेखिया आथिन, तिनन आगामी खितिया थ्या, यइलाइ दोसरो मृत्यु भणिन्छ।