प्रकाश 17 - डोटेली नयाँ करार

आइमाइ रे पसु

¹ तिनन सात कटौरा लइन्या सात स्वर्गदुतमि हइ एक जनाले मेरा वाँ आइबर मलाइ भण्यो, “म तमलाइ धेकाउन्या हु कि कसेरी परमेश्वरले तइ ठुला बेश्यालाइ सजाय दिन्या हुन जो ताँ भौत नदी भया ठाउँमि बस्छिन।

² तइसित धर्तिका राजानले व्यभिचार अरिराइछन, रे अंगुरको रसले मात्तिएकि जसेरि पृथ्बीका मान्सन तइका पापी काममी सहभागी भया।

³ आत्माले मलाइ नियन्त्रण अर्यो, रे स्वर्गदुतले मलाइ उजाड ठाउँमि लइय्या। ताँ सात मुन्टा रे दस सिङ भया परमेश्वरको बिरुद्दमि निन्दाका नाउले भरिया चम्कन्या राता रङका राक्षसमि बसेइ एक आइमाइ मइले धेक्या।

⁴ तइ आइमाइले बैजनि रे रातो लत्ता लाइराइथि, उइले आफ्ना शरीरलाइ सुण, रत्न रे मोतिले सिङारिएइ थी, तइका दाइन हातमि सुनको कटउरा थी जो दाखमद्यले भरियइ थी जइले घिनलाग्दो काम रे फोहोर यौन ब्यबहार जणाउन्छ।

⁵ तइका चानाइनि एक नाउँ लेखिरइथ्यो: जइमि गोप्य अर्थ छ म सबइ बेश्याकि इजा हु रे संसारका सबइ घिनलाग्दो चीजकी इजा। म बेबिलोन ठुलो सहर हु

⁶ पइ मइले धेक्या कि त्यो आइमाइ परमेश्वरका पबित्र मान्सनका रगतले मातिरइ थी जइलाइ मान्सनले येशूका निउति तिनरा बिश्वासयोग्यताका लाग्दा मर्याथ्या। त्यो धेकिबर म भौत अचम्म पर्या।”

⁷ तब तिन स्वर्गदुतले मलाइ भण्यो, “अचम्म जन माणइ, म तइ आइमाइ रे तइ राक्षस जइमि त्यो आइमाइका बारेमि गोप्य कुरणी भणन्या हु। रे तइ राक्षसका सात मुन्टा रे दस सिङ थ्या।

⁸ तुइले धेक्या तइ राक्षस एक समय जिउनो थ्यो, तर आब जिउनो आथिन, यो अतल कुण्ड बठेइ त्यो बाइर आउन्यावालो छ, रे परमेश्वरले तइलाइ पूरारुपमी नास अद्द्या हुन। संसारमी बस्स्या तिन मान्सन जइका नाउँ परमेश्वरले संसारको सृष्टि हुनाहइ पइल्ली तइ किताबमी लेख्या आथिन जइमि अनन्त जीवन पाया मान्सनको नाउ लेखिया छ। तिनन सब तइ राक्षसलाइ धेकिबर अचम्म पड्डया हुन। यो एक बेर जिउनो थ्यो आब यो बच्या आथिन, तर आजी यो फिर्ता आउन्या हो।”

⁹ यो बुज्जाइ बुद्दिको आवश्यक छ। तइ राक्षसका सात मुन्टाले सहरका सात पर्बत जणाउन्छ, जाँ यइ आइमाइले सासन अरन्छे। तिननले सात राजाको प्रतिनिधित्व लगइ अददाहान।

¹⁰ तिनन सात राजा लगइ हुन तिननमि हइ पाँच जाना पइल्ली मरिसक्या छन, एक जाना आब राजा छन, रे अर्खो आँजइ आया आथिन। तर जब उ आउछ, उइले थोकाइ समयकी निउति मान्तर सासन अद्द्या हुन।

¹¹ त्यो राक्षस जो भौत पइल्ली जिउनो थ्यो रे अइल यइ समयमि आथिन, उन आठौं राजा हुन। तर त्यो आठौं राजा सुरुका सात मध्ये एक हो। छाड्डीबार तइ राजालाइ पक्‍कालगइ सदाइकि निउति सजाय दिइन्या हो।

¹² तमले धेक्या तिन दस सिङले दस राजालाइ प्रतिनिधित्व अरन्छ जइले सासन अद्द सुरु अर्या आथिन। तिन दस राजालाइ राक्षस सित मिलिबर सासन अद्द्या अनुमति छ, तर तिनरो सासन एक घन्टाकि निउति मान्तर हुन्या हो।

¹³ तिनन सबइ राजाको एकइ उद्देश्य छ, रे तिननले आफ्नो सक्ति रे अधिकार तइ राक्षसलाइ दिन्या हुन।

¹⁴ तिननले थुमा बिरुद्दमि लडाइ अद्दया हुन, तर थुमाले तिननलाइ हाराउन्या हुन, क्याकि उन प्रभुका प्रभु रे राजाका राजा हुन। उनले आफ्ना बोलाइया, छानिया रे बिश्वासयोग्य अनुयायि सित तिननलाइ हाराउन्या हुन।

¹⁵ तिन स्वर्गदुतले मलाइ भण्यो, पानी जो तुइले अइल बठेइ जइमि त्यो बेश्या बस्न्छे तिनन मान्सन, भिड, जाति, देस, रे भासा हुन।

¹⁶ समय आउन्या हो जब तइ राक्षस रे उइसित बस्सया दस जाना राजाले बेश्यालाइ घृणा अद्द्या हुन। तिननले उइलाइ आक्रमण अद्द्या हुन रे नांगो बनाउन्या हुन, तिननले उइका सरिरको भागको मासु खान्या हुन रे तिननले और भागलाइ पोल्लया हुन।

^17-18 त्यो आइमाइ जइलाइ तमले धेक्या, यो भण्याको ठुलो सहर हो जो पृथ्बीका सबइ राजामि सासन अरन्छ। यिन सबइ चिज उइ आइमाइलाइ भयाथ्यो क्याकि परमेश्वरइ परमेश्वर हुन जइले आफ्ना उद्देश्य पुरा अददाइ निउति दस राजनको हृदयमि अगुवाइ अर्यो। तबइकिलाइ तिननले परमेश्वरले भण्या कुरणी पुरा नभया सम्म राक्षसलाइ सासन अद्द्या अधिकार दियो।