प्रकाश 15 - डोटेली नयाँ करार

सात स्वर्गदुत रे सात बिपत्ति

¹ तइ पछा मइले स्वर्गमि फरक चिन्ह धेक्या जो अचम्मको रे भौत डर लाग्दो थ्यो। ताँ सात बिभिन्न किसिमका बिपत्ति बोक्या सात स्वर्गदुत थ्या तिन बिपत्ति छाड्डीबारका हुन, क्याकि जब तिनन सकिनाहान तब परमेश्वरको रिस सकियो।

² तब मइले समुद्र जसो धेकिन्या चिज धेक्या जो काँसा जसो चम्किन्नाथ्यो रे आगोसित लगइ मिसाया थ्यो। मइले तिन मान्सनलाइ लगइ धेक्या जइलाइ त्यो जनावरले परास्त अरेइन। तिननले तइ पसु रे तइको मुर्तिलाइ पुजा अर्या थेइन, रे पशुको नामको चिनह्न लाया थेइन। ताँ तिनन सिसाका समुद्रका किनारमी कल्लिया थ्या रे सबइले त्यो बीणालाइ समायो जो परमेश्वरले तिननलाइ दियाथ्यो।

³ तिनन परमेश्वरका दास मोशाको गीत गाउनाहान जो थुमाका बारेमि गीत हो, “हे परमप्रभु परमेश्वर सर्वसक्तिमान, तमले जी अर्या त्यो काम महान रे अचम्मका छन, तम जो सब देशका राजा हौ, तमले जी अर्न्छौ सब ठीक रे धर्मि छ।

⁴ हे परमप्रभु, तमलाइ सब मान्सनले आदर अददाहान, रे तिनन सबले तमरा नाउँको सम्मान अददाहान, क्याकि तमइ मान्तरइ पबित्र परमेश्वर छौ। हरेक जाति तमरा वाँ आउनाहान रे तिननले तमरो आराधना अददाहान, क्याकि भण्या तमरा धार्मिक काम निक्केरि धेकिरइछन।”

⁵ यिन कुरणी पछा मइले हेर्या, रे स्वर्गमि मन्दिर खुल्या थ्यो जो तइ पबित्र पाल जसो छ।

⁶ रे अन्तिम सात बिपत्ति बोक्द्या सात स्वर्गदुत तइ मन्दिर बठेइ बाहिर आया। तिननले चम्किलो सेतो लत्ता लायाथ्या रे तिननले छाति वलतिर पलतिर सुनका पेटी लगइ थ्या।

⁷ तिन चार जिउना प्राणिमि हइ एकले सदासर्वदा जिउना रन्या परमेश्वरको रिसले भरिया सुनका सात कटौरा तिन सात स्वर्गदुतलाइ दियो।

⁸ मन्दिर धुँकाले भरिया थ्यो जो परमेश्वरको महिमा रे सक्ति बठेइ आयाथ्यो। कोइलगइ मन्दिर भितर पस्सइ सकेइन जबसम्म तिन सात बिपत्ति सकेइन जो तिन सात स्वर्गदुतले लेयाथ्या।