प्रकाश 13 - डोटेली नयाँ करार

समुद्र बठेइ निकल्याको पसु

¹ समुद्र बठेइ निकल्याको राक्षस मइले धेक्या। जइका दस सिङ् रे सात मुन्टा थ्या। तइका हरेक सिङ्मिमी एक मुकुट थ्यो, रे तइका हरेक मुन्टामि परमेश्वर बिरुद्दमि निन्दाको नाउँ लेख्याथ्यो।

² मइले धेक्याको त्यो राक्षस चितुवा जसोथ्यो। तइका खुट्टा भालुका जसा थ्या रे तइको मुख सिंहको जसोथ्यो। तइ अजिङ्गरले आफ्नो सक्ति तइ राक्षसलाइ दियो रे उइलाइ सासन अद्द्या अधिकार दियो।

³ तइ राक्षसका एक मुन्टामि बड्ताइ चोट लाग्या जसो चिन्ह धेकिन्थ्यो जइले उइलाइ मृत्यु ल्याउन सकनथ्यो, तर तइको चोट निको भयो, तबइकिलाइ धर्तिका मान्सन अचम्म माणिबर तइ राक्षसका पछा लाग्या।

⁴ सब मान्सनले अजिङ्गरको आराधना अरन्थ्या क्याकि तइले आफ्नो अधिकार राक्षसलाइ दियाथ्यो। तिननले तइ राक्षसको लगइ आराधना अर्यो, तिननले भण्यो “तइ राक्षस जतिको सक्तिशाली और कोइ आथिन। उइसित लड्ड कसइले लगइ सक्दइन।”

⁵ तइ राक्षसलाइ उइका अधिकारका बारेमि घमण्ड अद्द्या रे परमेश्वरको बिरुद्दमि निन्दा अद्द्या अनुमति दियो। परमेश्वरले तइलाइ बयालिस महिना सम्म यो अधिकार चलाउन्या अनुमति दियो।

⁶ राक्षसले परमेश्वरलाइ सराप दिन लाग्यो, उनरो नाउँको बिरुद्दमि निन्दा अर्यो, रे उनरा बासस्थान रे स्वर्गमि बस्स्या सबको मान्सनका बिरुद्दमि बोल्यो।

⁷ राक्षसलाइ परमेश्वरका पबित्र मान्ससित लडाइ अद्दाइ रे जित्ताइ अनुमति दियो। संसारमी हरेक कुल, मान्सन, भासा रे जातिमी तइलाइ अधिकार दिइयो।

⁸ रे यइ धर्तीमि बास अद्द्या सब मान्सनले उनलाइ आराधना अर्यो। उनरो आराधना नअद्द्या केवल तिनन मान्सन थ्या जइका नाउ यइ संसारको सृष्टि हुनाहइ पइल्ली तइ किताबमी लेखिया आथिन, जइमि अनन्त जीवन पाया मान्सनको नाउ लेखिया छ। त्यो किताब थुमाको किताब हो जइलाइ बलिदानका रुपमि मारिया थ्यो।

⁹ परमेश्वरको आत्माले मण्डलिलाइ भण्या कुरा ध्यान दिबर सुणनु पणन्छ।

¹⁰ जो झेलमि जानु पड्ड्या नियतका छन, तिनन साच्ची झेलमि पड्ड्या हुन, रे जो पक्‍का छन कि तिनन तरबारले मद्द्या हुन तिनन साच्ची तरबारले मरिन्या हुन। तबइकिलाइ परमेश्वरका मान्सनले कठिनाइ सनु पणन्छ, जो उनले अनुभव अददाहान रे बिश्वासमि पक्‍का रनु पणन्छ, तिननले धैर्य हुनु पणन्छ रे उनमी भरोसा राख्दु पणन्छ।

पृथ्बी बठेइ आया पसु

¹¹ पइ धर्ति बठेइ निकल्याको अर्खो एक राक्षस मइले धेक्या। तइका लगइ थुमाका जसाइ दुइ सिङ् थ्या रे त्यो अजिङ्गरकि जसेरि बोल्यो।

¹² यइ दोसरा राक्षसले पइलो राक्षसको सब अधिकार प्रयोग अरन्छ। दोसरा राक्षसले धर्ति रे तइमि बस्सयालाइ पइलो राक्षसको आराधना अद्द लाउनथ्यो, जइको मृत्यु ल्याउन सक्द्या जसो बड्ताइ चोट लाग्या चिन्ह थ्यो त्यो चोट निको भयो।

¹³ रे पठाया जानबरले ठुला रे अचम्मका चिन्ह धेकायो, रे मान्सनले हेर्या बेला अग्गास बठेइ पृथ्बीमि आगो लगइ झड्या बनायो।

¹⁴ पइला राक्षसको सक्ति बठेइ अचम्मका कामका लाग्दा भौत मान्सनले दोसरा राक्षस बठेइ धोका पायो रे प्रभाबित भया। दोसरा राक्षसले मान्सनलाइ तरबारले घाइते भया तर निको भया पइलो जनावरको आराधना अददाइ मुर्ति बनाउनाइ भण्यो।

¹⁵ दोसरा राक्षसलाइ पइलो राक्षसको मुर्तिलाइ जिउनो बनाउन्या अनुमति दिइयो ताकि तइ राक्षसको मुर्ति बोल्ल सकौ, रे तइ राक्षसकि मुर्तिले तइको आराधना नअद्द्यालाइ माद्द आदेस दियो।

¹⁶ दोसरा राक्षसले सब मान्सनलाइ महत्त्वपुर्ण रे महत्त्व नभया, धनि रे गरिब, दास वाँ स्वतन्त्र मान्स सबइलाइ पइलो राक्षसको नाउ दाइन हात अथवा तिनरा चानामि चिन्ह लाउनाइ बाद्य अरायो।

¹⁷ त्यो छाप नभया कसइले लगइ किनमेल अद्द नपाउन्या भयो। त्यो छाप तइ राक्षसका नाउँ वाँ तइका नाउँको संख्या हो।

¹⁸ यो बुज्जाइ बुद्दिको आवश्यक छ, तर जइसित बुद्दि छ उइले यो राक्षसको संख्याको अर्थ कि हो भणबर पत्ता लाइ सकन्छ। क्याकि यो मान्सको नाउ हो। यो संख्या छ सय छयसट्ठी हो।