प्रकाश 12 - डोटेली नयाँ करार

¹ पइ अग्गासमी एक अचम्मको चिन्ह धेकियो सुर्य पहिरेकी एक आइमाइ, जइका खुट्टाका तलमणी चन्द्रमी थ्यो, रे तइले बार ताराले बन्या मुकुट मुन्टामि लाइराइथ्यो।

² त्यो बाच्चा पाउनेइ थी रे जन्माउने बेला पीडामी सुत्केरि ब्यथामि सुत्केरि ब्यथाले कला हाल्ला थिन।

³ पइ अग्गासमी एक अर्खों चिन्ह धेकियो, एक ठुलो रातो अजिङ्गर धेकियो, जो सैतान हो। यइका सात मुन्टा थ्या रे हरेक मुन्टामि मुकुट थ्यो, रे तइका दस सिङ थ्या।

⁴ तइका पुछडले अग्गास एक तिहाइ तारालाइ सोइरिबर पृथ्बीमि खिद्दियो। बालक जन्मन्जेइ तइका बालकलाइ निल्दिउ भणि त्यो अजिङ्गर बालक जन्माउन लागेइ आइमाइका अगाडी कलियो।

⁵ तइ आइमाइले जम्माइ जातिलाइ ल्वाखरका डन्डाले सासन अद्द्या एक चेलो जन्माइ। तइको बालक अजिङ्गर बठेइ खोसियो रे परमेश्वरका वाँ उठाइबर उनरा सिंहासनका वाँ लैइया।

⁶ त्यो आइमाइ चाइ उजाड ठाउँमि भागि जाँ परमेश्वरले तइकि निउति ठाउँ राख्याथ्यो, ताकि ताँ तइको स्याहार एक हजार दुइ सय साठी दिन सम्म होउ।

⁷ पइ स्वर्गमि लडाइ भयो। प्रधान स्वर्गदुत मिखाएल रे तइका दुतनले तइ अजिङ्गरलाइ आक्रमण अर्यो, रे अजिङ्गर रे तइका दुतले लगइ प्रतिकार अर्यो।

⁸ तर अजिङ्गर युद्दमि हार्या रे तइकका दुतनलाइ स्वर्ग बठेइ निकालियो।

⁹ त्यो ठुलो अजिङ्गर तइका सबइ दुतसित धर्तीतिर खितियो। त्यो अजिङ्गर त्यो स्याप हो जो पइल्ली बठेइ छ जइलाइ सैतान भणिन्छ। यइ संसारका मान्सनलाइ भणकाउन्या यइ हो।

¹⁰ तइ पछा मइले स्वर्गमि भणिया एक ठुलो आवाज सुण्या, “आब हामरा परमेश्वरको मुक्ति, सक्ति, राज्य रे उनरा ख्रीष्टको अधिकार आया छ। क्याकि हामरा भाइनलाइ दोस लाउन्या, जइले हामरा परमेश्वरका अगाडी तिननलाइ रातदिन दोस लाउन्छ, त्यो तल्तिर खितिया छ।

¹¹ तिननले थुमाको रगत रे आफना साक्षिका बचनका कारणले तइलाइ जित्या हुन, रे तिननले आफना ज्यानको बरता प्रेम राखेइन रे तिनन मद्द डरायन बरु तिननले येशूलाइ इन्कार अर्यो।

¹² तबइकिलाइ तमन याँ स्वर्गमि रन्या सब रमाउ। तर धर्ति रे समुद्रमी रन्या तमन भयानक समस्यामि छौ! आफ्नो समय छोटो छ भणि था पाइबर सैतान ठुलो क्रोध सित तमरा वाँ तलतिर आउन्ना छ।”

¹³ जब तइ अजिङ्गरले आफ पृथ्बीमि खितिया धेक्यो तब तइले चेलो जन्माउनेइ तइ आइमाइलाइ खेद्यो।

¹⁴ तर तइ आइमाइलाइ तइ स्यापका वाँ बठेइ उजाड ठाउँमि उडिबर जानाइ ठुला बाजका दुइ पख्यार दिइया। त्यो उजाड़ स्थानमि साडे तीन बर्ष सम्म तइ आइमाइको स्याहार सुसार अद्दाइ तयार अरियाथ्यो।

¹⁵ तइ पछा आजी स्यापले आफ्नो मुख बठेइ आइमाइका तिर नदिकी जसेरि पानी निकाल्यो ताकि तइ बाढिले तइ आइमाइलाइ बगाइबर लइजाउ।

¹⁶ तर पृथ्बीले तइ आइमाइलाइ सहयोग अर्यो। रे अजिङ्गरले आफना मुख बठेइ निकाल्या नदी धर्तिले आफ्नो मुख उगाडिबर निलिहाल्यो।

¹⁷ जइका लाग्दा, त्यो अजिङ्गर आइमाइसित भौत रिसायो। तबइकिलाइ उनले तइ आइमाइका बंशका बिरुद्द युद्द घोषणा अर्यो। यिन बंस तिन मान्सन हुन जइले परमेश्वरका आज्ञापालन अददाहान रे येशूले सिकाया सत्य शिक्षालाइ साच्ची लगनशिल भइबर पछ्याउन्ना छन।

¹⁸ पइ त्यो अजिङ्गर समुद्रका किनारमी गइबर कल्लियो।