प्रकाश 11 - डोटेली नयाँ करार

दुइ साक्षि

¹ तब मलाइ नाप्द्याइ एक निङालो दियो रे परमेश्वरले मलाइ भण्यो, “जा रे मेरो मन्दिर रे बेदिको नाप ला, रे मन्दिरमि मलाइ आराधना अद्द्या मान्सनको गन्ती अर।

² तर मन्दिर बाइर रया आँगनलाइ छाड क्याकि त्यो गैर-यहुदिलाइ दिया छ, रे तिननले बयालिस महिना सम्म मेरा पबित्र सहरमि सासन अद्दया हुन।

³ म मेरा दुइ जाना साक्षि पठाउन्या हु जो मेरो सत्य सन्देश घोषणा अददाहान। तिननले भाङराका लत्ता लाउन्या हुन रे मेरो सत्य सन्देश तिनन एक हजार दुइ सय साठी दिनमि प्रचार अद्दया हुन।”

⁴ यिन दुइ साक्षिको तुलना दुइ जैतुनका रुख रे दुइ सामदानसित अरिया छ, जो परमेश्वरका अगाडी छ, जो संसारका सब मान्सनका प्रभु हुन।

⁵ यदि कसइ दुसमनले तिननलाइ हानि अद्द्या प्रयास अर्यो भण्या, तिनरा मुख बठेइ निकल्या आगोले तिनन नास पाडिन्या हुन। रे यदि कसइले तिननलाइ नोक्सान अद्द खोजन्छ भण्या तिनन पक्‍कालगइ तसेरि मारिन्या हुन।

⁶ तिननले उनरो सन्देश घोषणा अद्द्या बर्ष अग्गास बठेइ पानी पड्डा बठेइ रोक्दाइ निउति परमेश्वरले तिननलाइ अधिकार दिया छ। तिननले पानीलाइ रगत जसो रातो बनाउन्या रे पृथ्बीलाइ सब किसिमका भयानक दुःख दिन्या अधिकार लगइ पाया छन। यो प्राय जसो तिननले चाया जसो अद्द सक्दाहान।

⁷ दुइ साक्षिले परमेश्वरको सन्देश प्रचार अरिसक्या पछा अतल कुण्ड बठेइ निकल्या यो राक्षस तिनन दुइ मान्ससित लड्डया हो, तिननलाइ जितिबर माद्द्या हो।

⁸ तिनन दुइ साक्षिलाइ मार्या पछा, तिनरा लास ताँको ठुलो यरुशलेम सहरको सडकमि राखिया अवस्थामी छाडिन्या हो, जइ सहरको सांकेतिक रुपमि सदोम सहर रे मिश्र देस भणिन्छ। जाँ तिनरा प्रभु क्रुसमि टाङिया हुन।

⁹ साडे तीन दिन सम्म तिनन साक्षिका लासलाइ संसारमी हरेक मान्सन, कुल, भासा, रे जातिले तक्द्या हुन तर तिननले कसइलाइ लगइ तिनरा लास खड्ड्याउनाइ अनुमति दिनाइन।

¹⁰ तिनन दुइ साक्षिको मृत्युको कारण संसारमी बस्या मान्सन खुशी छन, तिननले भोज खायो रे एक अर्खालाइ उपहार दिनाहान क्याकि तिनन दुइ अगमबक्ता जइले तिननलाइ लगातार यातना दियाथ्यो तिनन मर्या छन।

¹¹ साडे तीन दिन पछा परमेश्वरले तिननमि जीवन दियो। रे तिनन कल्लिया रे तिनन सब जइले तिननलाइ आजी जिउना भया धेक्यो, तिनन डराया।

¹² तइ पछा तिनन दुइ मान्सले स्वर्ग बठेइ एक बक्तालाइ सुण्यो जइले तिननलाइ ठुलो आवाजमी बोलाइबर भण्यो, “याँ मल्तिर आस।” तिनरा सत्तुरले तक्दा तक्दाइ तिन बादलमि स्वर्गतिर गया।

¹³ तसइ बेला एक ठुलो भुइँचालो यरुशलेम सहरमि गयो रे सहरको दस हिस्सा ढल्यो। भुइँचालामि सात हजार मान्स मर्या। और बाँच्या मान्स डराया रे स्वर्गका परमेश्वरलाइ महिमा दियो।

¹⁴ यो दोसरो बिपत्तिको अन्त्य आजी ताँ एक बिपत्ति छ जो छिट्टाइ आउन्ना छ।

सातौ तुरहि

¹⁵ पइ सातौ स्वर्गदुतले आफ्नो तुरहि बजायो। मइले स्वर्ग बठेइ इसो भण्नार्या ठुलो आवाज सुण्या, “संसारमी राज अद्द्या आब कोइलगइ छइन। केवल हामरा प्रभु, परमेश्वर रे उनरा चुनिया, ख्रीष्ट। रे उन सदासर्वदा राज्य अद्द्या हुन।”

¹⁶ पइ परमेश्वरका अगाडी आफना-आफना सिंहासनमि बस्या तिन चौबिसइ अगुवानले घोप्टो पडिबर परमेश्वरलाइ आराधना अर्यो।

¹⁷ रे भण्न लाग्या, “हे परमप्रभु परमेश्वर सर्वसक्तिमान, हाम तमलाइ साच्ची धन्यबाद दिनाउ जो छन, जो थ्या, क्याकि तमले आब आफ्नो महान सक्ति धेकायाछौ रे आब तमले संसारमी आफ्नो सासन सुरु अर्या।

¹⁸ जाति-जाति तमसित रिसाया छन, आब तमरो क्रोध तिननमि आउन्या समय आया छ मर्या मान्सको न्यायको समय आयो आब यो समय लगइ हो जब तमले अगमबक्तालाइ इनाम दिन्या हौ जइले तमरो सेवा अददाहान तमरा सब मान्सन जइले तमलाइ आदर अददाहान, जो कमजोर छन रे जो सक्तिशाली छन जइलाइ महत्वपूर्ण माणिन्छ रे महत्वपूर्ण माणिनइन जब तसइ समयमि तमले संसारमी बिनास अद्द्यालाइ नास अददा हौ।”

¹⁹ स्वर्गमि परमेश्वरको मन्दिर खोलियो रे उनरा मन्दिर भितर उनरा करारको सन्दुक धेकियो। बिजुलिका चमक धेकिया। मेग गर्जनको आवाज सुणियो। भुइँचालो गयो रे ठुला-ठुला अठ्ठा पड्या।