फिलेमोन 1 - डोटेली नयाँ करार

सुभकामना

¹ म, पावल यो चिठ्ठी लेख्दाछु। म झेलमि छु क्याकि म येशू ख्रीष्टको बारेमि प्रचार अददाछु। म रे हा मरा बिश्वासि भाइ तिमोथी बठेइ तमलाइ अबिबादन। हामरा प्यारा साथी रे सहकर्मी फिलेमोन, म तमनलाइ यो लेख्दाछु।

² म हामरि प्यारि बिश्वासि बैनि अफ्फिया रे हामरा भाइ अर्खिप्पस, जइले सिपाहिकि जसेरि प्रभुको सेवा अरन्छ रे तमरा घरमि परमेश्वरको आराधना अददाइ जम्मा हुन्या बिश्वासिनलाइ लेख्दाछु।

³ म प्रार्थना अद्दउ कि हामरा पिता परमेश्वर रे प्रभु येशू ख्रीष्टले तमनलाइ अनुग्रह रे सान्ति दिउन।

धन्यबाद रे प्रार्थना

⁴ जबलगइ म तमरा निउति प्रार्थना अद्दउ, म तमरि निउति परमेश्वरलाइ सदाइ धन्यबाद दिनउ।

⁵ क्याकि मइले प्रभु येशूमि तमरो बिश्वासका बिसयमि रे परमेश्वरका पबित्र जन प्रति तमरो प्रेमको बिसयमि सुण्या।

⁶ म प्रार्थना अद्दउ कि बिश्वासिन सितको तेरो संगति बड्डसकउ, रे परमेश्वरले हामलाइ दिया सब असल चिज तमले बुज्ज सक। यो ख्रीष्टको महिमाकी निउति हुन सकउ।

⁷ मेरा बिश्वासिन हो, तमरो और प्रतिको प्रेम बठेइ मइले भौत आनन्द रे हौसला पाइराइछु, क्याकि तमन बठेइ पबित्र जनका हृदय आजी उत्साहित भया छन।

ओनेसिमसकि निउति बिन्ति

^8-9 म तमले कि अद्दु पड्डया हो तइ अद्दाइ आज्ञा दिनउ। म ख्रीष्टले दियाको अधिकारलाइ प्रयोग अरिबर यो अद्द्या आज्ञा दिन सकलो, तर म इसो अद्दइन। बरु, म तमलाइ सामान्य हिसाबले यो अर भण्न्ना छु क्याकि हाम एक-अर्खालाइ रे परमेश्वरका मान्सनलाइ प्रेम अद्दाउ। म पावल बुढो मान्सको रुपमि आब भण्न्ना छु, रे मलाइ कसइ मान्सले झेलमि हाल्या छ क्याकि म येशू ख्रीष्टको सेवा अद्दउ।

¹⁰ म ओनेसिमसको निउति बिन्ति अद्दउ जो मेरो चेलो जसोइ छ। म याँ झेलमि हुनज्या बिश्वासमि म उइको बा बन्या।

¹¹ त्यो पइल्ली तेरि निउति बेकम्माको थ्यो तर अइल तेरि निउति रे मेरा निउति लगइ काम लाग्द्या भया छ।

¹² म ओनेसिमसलाइ तेरा वाँ फर्काइ पठाउन्नाछु, जइलाइ म मेरा हृदय बठेइ प्रेम अद्दउ।

¹³ सुसमाचार प्रचार अर्या हुनाले म झेलमि भया बेला उइलाइ आफसित मलाइ सहयोग अद्दाइलाइ राख्द चाहानथ्या। उइले तमरा सट्टामी याँ मेरो सहयोग अद्द सकन्थ्यो, क्याकि मलाइ था छ कि तम मलाइ सहयोग अद्द चाहान्छौ।

¹⁴ तर म तेरो अनुमति बिना केइलगइ अद्द चाहानैन। म चाहनउ कि मेरा करकापले होइन तर आफ्ना इच्छाले मलाइ सहयोग अर।

¹⁵ सायद उ तमन बठेइ केइ समयका निउति परमेश्वरको अनुमतिले अलग भयाथ्यो, ताकि उ ख्रीष्टमी बिश्वास अद्द सकउ, रे परिणाम स्वरुप उ सदाइकि निउति तमसित बस्स सकउ।

¹⁶ आब उ तमरो दास मान्तरइ होइन, दास भण्ना बडता तमरो प्यारो बिश्वासि भाइ हो। म उइलाइ भौत प्रेम अद्दउ, तर तमनले उइलाइ तइ भण्ना बड्ता प्रेम अददु पणन्छ क्याकि उ एक मान्स, रे ख्रीष्टमी तमरो भाइ लगइ हो।

फिलेमोनको आज्ञाकारिता बठेइ उत्साहित

¹⁷ यदि तमले मलाइ आफनाइ साजेदार सम्जन्छौ भण्या जब ओनेसिमस तमरा वाँ फर्किबर आउनाहान तमले मलाइ स्वागत अर्या जसेइ तिनलाइ खुसीसित स्वागत अर।

¹⁸ यदि तिनले तमलाइ केइ खराबी अरया छन, अथवा तिन केइ कुरणीका रिणि छन भण्या त्यो म तमलाइ तिरि दिउलो।

¹⁹ म पावल आफ्नाइ हातले यो लेख्दाछु। त्यो ऋण म आफइ तिरि दिउलो। तमलाइ पइल्ली बठेइ था छ कि यदि मइले तमलाइ सहयोग नअर्या भया तम आफइ नयाँ जीवन पाउन्या थ्यानु, तबइकिलाइ तम मेरा लगइ रिणि छौ।

²⁰ मेरा प्यारा बिश्वासि भाइ, तु बठेइ प्रभुमि केइ फाइदा पाउ भण्न्या म चाहानउ। ख्रीष्टमी मेरा बिश्वासि भाइका रुपमि इसो अरिबर मलाइ उत्साह दिय।

²¹ म तुलाइ यो चिठ्ठी लेख्दाछु, क्याकि मइले तुलाइ बिन्ति अर्या कुरणी तुइले अद्दया हइ भणबर म पक्‍का छु। रे मलाइ था छ कि मइले बिन्ति अर्या भण्ना झिक बडता अद्द्या हइ।

²² रे मेरि निउति कोठा ठीक पाडी राख, क्याकि तेरा प्रार्थना बठेइ म लगइ तेरा वाँ आउन पाउनौ कि भण्न्या आसा अद्दउ।

अन्तिम सुभकामना

²³ इपाफ्रास जो मसित झेलमि छ क्याकि तिन येशू ख्रीष्टका बारेमि प्रचार अरन्थ्या। उनले अबिबादन भण्या छ।

²⁴ तसेरि मर्कुस, अरिस्तार्खस, डेमास रे लूका जो मसित प्रभुको काम अददाहान, उनरो तमलाइ अबिबादन छ।

²⁵ म प्रार्थना अद्दउ कि हामरा प्रभु येशू ख्रीष्टको अनुग्रह तमनसित होइरउ। आमेन।