मर्कुस 15 - डोटेली नयाँ करार

पिलातसका अगाडी येशू

¹ परभातइ यहुदि मुख्य पुजारिनले यहुदि मान्सनका अगुवा, मोशाको कानुन सिकाउन्यावाला रे सब यहुदि महासभा सदस्य सित बसिबर येशूलाइ आरोप लाउन्या सल्लाह अर्यो। रे तिननले येशूलाइ यहुदिया राज्यको रोमिको पिलातस हाकिमको राजमहलमि न्याय अद्दाइलाइ लैयाथ्यो।

² पिलातस हाकिमले येशूलाइ सोध्यो, “कि तम यहुदिका राजा हउ?” येशूले जबाफ दियो, “जसो तम भण्नाछौ तसोइ हो।”

³ यहुदि मुख्य पुजारिनले येशूलाइ भौत कुरणिका बिसयमि दोस लाउन्थ्या।

⁴ आजी पिलातस हाकिमले सोध्यो, “कि तु जबाफ दिनइनि? हेर तेरो बिसयमि औरले इति आरोप लाइराइछ?”

⁵ पइ येशू सान्त बस्या, याँ सम्मकि पिलातस हाकिम लगइ छक्‍क पण्या।

येशूलाइ माद्द्या आज्ञा

⁶ हरेक बर्ष निस्तार काजबारका बेला पिलातसले सदाइ एक कैदीलाइ छाड्डया अरन्थ्या, जइलाइ मान्स चाहानथ्या।

⁷ ताँ तइ समयमि बरब्बा नाउँ भया एक मान्स थ्यो, जो और बिद्रोही सितइ झेलमि थ्यो, जइले रोमी सासकको बिरुद्द बिद्रोहोमि भौत मान्सलाइ मार्याको थ्यो।

⁸ भिड पिलातस हाकिमका वाँ आइबर उनलाइ एक कैदीलाइ छाड्डाइ निउति माग अद्द पस्या, जसो उन सदाइ अरन्थ्या।

⁹ पिलातस हाकिमले इसो भण्यो, “कि तम इसोइ चाहन्छ? कि म तमरि निउति यहुदि मान्सनका राजालाइ छाडि दिउ?”

¹⁰ क्याकि यहुदि मुख्य पुजारिनले येशूलाइ रिसले पकडया हुन भणि पिलातासलाइ थाथ्यो।

¹¹ पइ यहुदि मुख्य पुजारिनले भिडका मान्सनलाइ बरब्बालाइ हामरो निउति छाद्याइलाइ माग अर, येशूलाइ जन छाड्या भणि पिलातुसलाइ भण्न लायो।

¹² आजी पिलातस हाकिमले भिडलाइ सोध्यो, “आब जइलाइ तम यहुदि मान्सनका राजा भणन्छौ उइलाइ म क्या अरु?”

¹³ भिडले जोरले कला हालिबर भण्यो, “तइलाइ क्रुसमि मारीदिय।”

¹⁴ पिलातस हाकिमले तिननलाइ भण्यो, “क्याकि? यइले कि कुकर्म अरिराइछ?” भिडले झिक कला हालिबर भण्न पस्या, “तइलाइ क्रुसमि मारीदिय।”

¹⁵ पइ पिलातस हाकिमले भिडलाइ सन्तुष्ट पड्डया इच्छाले तिनरि निउति बरब्बालाइ छाडिदियो रे येशूलाइ कोर्रा लाइबर क्रुसमि माद्दालाइ रोमी सिपाइलाइ सुम्पिदियो।

येशूको अपमान

¹⁶ पइ पिलातुसको सिपाइनले येशूलाइ हाकिमको महलको आगनमी लैया (जइलाइ प्रेटोरियन भण्नान), रे सिपाइनको एक ठुलो पल्टन जम्मा अर्यो।

¹⁷ तिननले उनलाइ बैजनि रङका लत्ता नाटक अद्दाइलाइ लाइदियो जसो कि उन एक राजा हुन, रे उनरो हासो अददु पास्या। उनले काँडा भयको हाङ्गाको मुकुट बनाइबर खिसि काट्टाइ निउति उनरा मुन्टामि लाइदियो जसो कि उन एक राजा हुन, रे उनरो हासो अददु पास्या।

¹⁸ रे उनलाइ सम्मान धेकाउनाइलाइ मजाकमि जोरले भण्यो “यहुदि मान्सनका राजा अमर रया, सलाम!”

¹⁹ तिननले बेर बेरि निङालोले उनरा मुन्टामि हाण्नथ्या, रे उनरो अपमान अद्दाइलाइ भौत बेर थुक्यो, रे खिसि काट्टाइलाइ घुणा टेकिबर दण्डबत अद्द पस्या।

²⁰ जब तिनन उनरो खिसि काटीबर थग्या, तिननले बैजनि रंगका लत्ता फुकाइ दियो रे उनराइ लत्ता लाइदियो, रे उनलाइ क्रुसमि माद्दाइलाइ सहर बठेइ बाइर लैया।

येशूलाइ क्रुसमि टाँग्यो

²¹ जब तिनन सहर बठेइ बाइर जन्नाथ्या, तब सिमोन नाउको एक मान्स गाउँ बठेइ यरुशलेम सहरमि आउन्नाथ्यो। सिमोन कुरेनि सहरको थ्यो, रे उ सिकिंदर रे रुफसको बा थ्यो। सिपाइले उइलाइ आदेस दियो कि क्रुस उठाइबर तइ ठाउ सम्म लइजाउ, जाँ उन येशूलाइ क्रुसमि मद्द्या हुन।

²² रे सिपाइले येशूलाइ गलगथा भण्न्या ठाउँमि लेया, जइको आरामी भाषाको अर्थ, खोपडिको ठाउ हो।

²³ पइ सिपाइले येशूलाइ गन्धरस नाउको औषधी मिसाया अंगुरको रस पिनाइलाइ दियो, ताकि उनलाइ नदु:खउ। पइ येशूले त्यो पिउन माणेइन

²⁴ रे तिननले उनलाइ क्रुसमि किला ठोक्यो, उनरा लत्ता कइले कि लैजान्या भणबर चिट्ठा हालिबर बाण्यो।

²⁵ ब्याहान नौ बजेइ उनले येशूलाइ क्रुसमि टाङयो।

²⁶ सिपाइले येशूका मुन्टाका मल्तिर दोषपत्र टाङयो, रे तइमि “यहुदिका राजा” लेखिरइथ्यो।

²⁷ उनसित दुइ जना डाँकुलाइ एकलाइ दाइन तिर रे अर्खालाइ बाँउतीर क्रुसमि टाङयो।

²⁸ तसेरि, पबित्र सास्त्रका बचन पुरा भया, जसो खीष्टका बारेमि भणीया छ, “उन अपराधी सित्तइ गणीया हुन।”

²⁹ ताँ बठेइ जो लगइ हिटिबर जान्नाथ्या उनले आफना मुन्टा हलाइबर इसो भण्नाइ खिसि काट्यो, “ओहो! तु मन्दिर भत्काउन्या रे तइलाइ तिन दिनमि बनाउन्या!

³⁰ आफलाइ बचा रे क्रुसमि हइ ओलीबर आस।”

³¹ इसेरि यहुदि मुख्य पुजारिन रे मोशाको कानुन सिकाउन्यावाला सित सङै खिसि काट्टाइ आपसमी भण्न लाग्या, “यइले औरलाइ बचायो तर आफलाइ बचाउन सकेन।

³² यो मान्स इस्राएल देशका ख्रीष्ट रे राजा हु भणन्छ, आब क्रुस बठेइ तलतिर ओल, रे हामले धेकु रे तममि बिश्वास अदद सकु कि यो हामरो राजा हो।” रे जो उनसित क्रुसमि टाङगीरइथ्या। तिननले लगइ येशूको बेइजत अद्दाथ्या।

येशू मर्या

³³ रे बार बजे बठेइ लगभग तीन बजे सम्म देस भरि अन्धकार भयो।

³⁴ लगभग तीन बजे येशूले जोरले इसो भणबर कला हाल्यो, “इलोइ-इलोइ लामा सबखथनी?” जइको अर्थ हुन्छ “हे मेरा परमेश्वर, हे मेरा परमेश्वर, तमले मलाइ क्याइ छाडया?”

³⁵ जो मान्सन नजिक कल्लिय्या थ्या, तिननले यो सुण्यो रे नबुजिबर एक अर्खालाइ भण्न लाग्या, “सुण, यो त एलिया अगमबक्तालाइ आफ्ना मदत अद्दाइलाइ बोलाउन्नाछ!”

³⁶ तिन मान्सनमि हइ एक जनो दौडिबर गयो, रे एक स्पन्ज लेयो, रे तइलाइ एक सिर्कामि डूबायो। तइलाइ उइले निङालोमि राखिबर येशूका मुख सम्म पुगायो रे रस सोस्साइलाइ दियो। तइले भण्यो, “रोक रे केइ जन अर। हाम हेद्दाउ कि एलिया अगमबक्ता आउनाहान कि नइ रे यइलाइ क्रुस बठेइ छुटाउन्या हो कि नइ।”

³⁷ पइ येशूले कला हालिबर रोया रे मरिया।

³⁸ रे मोटो पर्दा जो मन्दिरमि झुणिरइथ्यो, जो सबलाइ परमेश्वरको उपस्थितिमि जानाइ रोकंथ्यो, टुप्पा बठेइ ठेक सम्म दुइ भाग होइबर चिरियो।

³⁹ जो सुबेदार येशूका सामने कल्लिरइथ्यो जब येशूले जोरसित कल्ला हाल्या सुण्यो रे मर्या धेक्यो, उइले भण्यो, “साँच्चि यिन मान्स परमेश्वरका चेला रइछन!”

⁴⁰ भौत स्वानी मान्सन टाडा बठेइ हेद्दा थिन, तिन स्वानिनमि मरियम लगइ थिन जो मग्दला गाउँकी थी, रे सलोमी रे मरियम जो नानो याकुब योसेफकि इजा थी।

⁴¹ पइल्ली, जब येशूले गालील जिल्लाको वलतिर पलतिर यात्रा अर्याथ्यो, तइ बेला यिन तीन स्वानिनले येशूको शिष्या बनिबर अनुसरण अर्याथ्यो, रे उनलाइ जी खाचो पडन्थ्यो तइलाइ पुरा अरन्थीन। और स्वानिन गालील जिल्ला बठेइ संगइ यरुशलेम सहर आइरइन्थिन। तिनन लगइ येशूलाइ दुर बठेइ हेद्दा थिन।

येशूलाइ चिहानमि राख्यो

^42-43 बसाइतक योसेफ अरिमाथिया सहरको मान्स आयो। त्यो मान्स यहुदि सभाको इज्जतदार सदस्य थ्यो, जो परमेश्वरको राज्यको परखाइमी थ्यो। त्यो तयारीको दिन थ्यो, तइले, साहससित पिलातस हाकिमका वाँ गइबर येशूको मर्या शरीर माग्यो ताकि तिनले येशूको मर्या शरीर गाडड सकुन।

⁴⁴ जब पिलातस हाकिमले योसेफ बठेइ सुण्यो कि येशू मरिया तब उ छक्‍क पण्यो, रे पइ उइले सुबेदारलाइ बोलाइबर सोध्यो, “कि यो सत्य हो कि येशू पइल्ली मर्या हो?”

⁴⁵ पइ तिनले सुबेदार बठेइ येशू मर्या था पाया, रे तिनले येशूको मर्या शरीर लइजान्या योसेफलाइ अनुमति दियो।

⁴⁶ पइ योसेफले मलमलको लत्ता किन्यो, रे येशूको मर्या शरीरलाइ क्रुस बठेइ तल्तिर ओलाइबर, तइ मलमलका लत्तामि लपेटिबर, उनलाइ ओडारमी राख्यो। ओडारका मुख बन्द अदाइलाइ एक ठुलो गोलो ढुङा घोचिबर राखिदियो।

⁴⁷ रे मरियम जो मग्दला गाउँकी थी, रे मरियम जो योसेफकि इजा थिन, येशूको मर्या शरीरलाइ काँ गाड्ड लाग्या छन भणि हेद्दाथ्या।