मर्कुस 12 - डोटेली नयाँ करार

फाटाहा खेतालाकि काहानि

¹ तइ पछा येशूले तिनसित काहानि भणबर यहुदि मान्सनका अगुवानसित कुरणी अद्द सुरु अर्यो। उनले भयो: “एक मान्सले आफ्ना खेतमी अंगुर लाइबर तइका वलतिर पलतिर ढुङ्गाको बाड लायो, रे अंगुरको रस निकाल्लाइ जमिनमी खडडो खण्यो। जंगली जनाबर बठेइ खेति बचाउनाइ एक परो बनाइबर अदिया बनाउन्यावाला खेतालालाइ कमाउनाइ दियो, रे आफ लामो यात्रामि गयो।

² जब अंगुर बारिको फसल काटया बेलामि तइ खेतको मालिकले आफ्नो नौकर मध्य एक जनालाइ अंगुरको फाइदाको हिसा ल्यास भणबर अदिया बनाउन्यावाला खेतालाका वाँ पठायो।

³ पइ अदिया बनाउन्यावाला खेतालाले नौकरलाइ समाइबर हाण्यो, रे केइलगइ नदिबर फिर्ता पठायो।

⁴ आजी खेतको मालिकले अर्खा नौकरलाइ अदिया बनाउन्यावाला खेतालाका वाँ पठायो, पइ तिननले तइका मुन्टामि हाण्यो रे तइको बेइजत अर्यो।

⁵ खेतको मालिकले आजि अर्खा नौकरलाइ पठायो, रे तइलाइ अदिया बनाउन्यावाला खेतालाले मार्यो, रे उइले और भौत नौकरलाइ पठायो, तिननले कसइलाइ चुट्यो रे कसइलाइ मार्यो।

⁶ छाड्डीबेर मालिकसित एक जानो मान्तर थ्यो रे जो उइको चेलो थ्यो, मालिकले उइलाइ भौत प्रेम अरन्थ्या। अन्तमी तिनले आफना चेलालाइ लगइ अदिया बनाउन्यावालाका वाँ यो सोचिबर पठायो कि तिननले मेरा चेलाको आदर अद्या हुन।

⁷ रे जब अदिया बनाउन्यावाला खेतालाले मालिकको चेलालाइ आउनार्या धेक्यो रे अदिया बनाउन्यावाला खेतालाले आपसमी भण्यो, ‘यो त जाइजातको हकवालो हो। आस, हाम यइलाइ माद्दाउ, रे जाइजात हामरोइ हुन्या हो।’

⁸ तिननले उइलाइ समाइबर मार्यो रे लासलाइ अंगुरका खेत बाइर खिद्दियो।”

⁹ तम कि सोचन्छौ कि अंगुरका खेतका मालिक क्यारन्ना? त्यो मालिक आउन्या हो, तिन अदिया बनाउन्यावाला खेतालालाइ माद्द्या हो, रे अंगुरका खेत औरलाइ दिन्या हो।

¹⁰ कि तमले पबित्र सास्त्रमि यो पढयानु खीष्टको तुलना महत्वपूर्ण ढुङा सित अरिराइछ? परमेश्वरको बचनले इसो भणन्छ, “जइ ढुङा घर बनाउन्याले खितदिय, तेइ ढुङा घरको भौत महत्वपूर्ण ढुङा बन्यो।

¹¹ यो परमप्रभु बठेइ भया हो, रे हामरा निउति यो अचम्मको छ।”

¹² यहुदि मुख्य पुजारिले जाणी हालथ्यो कि येशूले यो काहानि उनारा बिरोधमी भणिराइथ्यो। तबइकिलाइ तिननले येशूलाइ पकड खोजाथ्या। तर तिनन मान्सनले बिरोध अददाहान भणि डरायाथ्या। तबइकिलाइ तिनन येशूलाइ छाडिबर गया।

महाराजलाइ कर दिन्या बारेमि प्रश्न

¹³ केइ समय पछा, ननिका कुरणीमि येशूलाइ फसाउनाइलाइ यहुदि अगुवानले फरिसि मान्सन मध्य कोइ मान्सन, रे हेरोद राजालाइ साथ दिन्या कोइ मान्सनलाइ येशूका वाँ पठायो।

¹⁴ तिननले आइबर उनलाइ भण्यो, “गुरुज्यू, हाम जाण्नाउ, तम सदाइ इमानदार हौ, रे और तमलाइ कि सोच्चाहान भणबर कसइकि डर माणनानु। क्याकि तम सबसित एकनासको ब्यबहार अरन्छौ रे तम परमेश्वरको बाटो ठिक रितिले सिकाउछौ। आब तम हामलाइ भण, कि मोशाको कानुनले सम्राट लाइ कर तिद्दाइ अनुमति दिन्छ कि दिनइन?

¹⁵ कि हामले कर तिद्दु पण्न्छ कि नइ?” येशूले तिनरो कपटिपन था पाइबर तिननलाइ भण्यो, “तमन मलाइ गलत कुरणी भणबर क्याइ फसाउन्या कोशिस अद्दाछौ? एक चाँदिको सिक्‍कालेइबर मलाइ धेका।”

¹⁶ तिननले एक चाँदिको सिक्‍का लेया। रे उनले तिननलाइ भण्यो, “मलाइ भण यइ सिक्‍कामि कइको चित्र रे नाउ छ?” तिननले उनलाइ भण्यो, “सम्राटको।”

¹⁷ तब येशूले तिननलाइ भण्यो, “सम्राटका चिज सम्राटलाइ दिय, रे परमेश्वरका चिज परमेश्वरलाइ।” रे तिननले त्यो कुरणी सुणिबर अचम्म माण्यो।

मर्या बठेइ जिउना हुन्या रे ब्या

¹⁸ रे यहुदि धार्मिक समुहका केइ सदस्य जइलाइ सदुकि भणिन्छ, तिनन येशू वाँ आया। सदुकीको समुहका मान्सले मर्या बठेइ जिउना हुनाहान भणि बिश्वास अद्दाइन्न। उन येशूका वाँ आइबर सोद्द लाग्या,

¹⁹ “हे गुरुज्यू, मोशाले पबित्र सास्त्रमि हामकिलाइ कानुन लेख्दिराइछ, कि यदि ब्या अर्या मान्स मर्यो रे सन्तान आथिन भण्या, पइ उइका भाइले तइ बिधवा सित ब्या अददु पणन्छ रे सन्तान जन्माउनु पणन्छ, जो दाइको हकवाला हुन्या हो।”

²⁰ एक परिबारमि सात भाइ थ्या। जेठाले ब्या अर्या, रे त्यो मान्स सन्तानइ नहोइबर मर्यो।

^21-22 आब माइलो भाइले तइ बिधवासित ब्या अर्यो, रे त्यो लगइ सन्तानइ नहोइबर मर्यो। पइ साइला रे सातइ भाइनसित तसोइ भयो। रे सातइ भाइका सन्तानइ भएइनन। छाड्डीबार त्यो स्वानी लगइ मरि।

²³ तइ बेला जब मर्या बठेइ जिउना हुनाहान, तइ बेला उ कइकि स्वानी हुनेइ हो? हाम यो सोद्दाउ क्याकि उइले सातइ भाइनसित ब्या अरिराइथ्यो!

²⁴ येशूले भण्यो, “तमन गलत छौ क्याकि तमन पबित्र सास्त्रले कि भण्या छ जाणनानु, रे परमेश्वरको सक्तिको बारेमि जाणनानु।

²⁵ जब मर्या मान्सन जिउना हुनाहान, न त बैकान मान्सनले न त स्वानिले ब्या अद्दाहान, तिन स्वर्गमि भया स्वर्गदुत जसा हुनाहान जइले ब्या अद्दाइन्न।

²⁶ आगो लाग्या झुलकि काहानिमि कि भयो, परमेश्वरले मोशासित कुरणी अरिबर भण्यो, ‘म अब्राहाम, इसहाक रे याकुबले आराधना अद्दया परमेश्वर हु’ भौत समय पछा तिनन मर्या।

²⁷ तबइकिलाइ उन मर्या मान्सनका परमेश्वर होइन, रे उन तिन मान्सनका परमेश्वर हुन जो जिउना छन! तमन गलत छौ!”

सबहइ ठुलो आज्ञा

²⁸ रे मोशाको कानुन सिकाउन्यावलामि हइ एक जानो आयो, रे येशू रे सदुकिन आपसमी बिबाद अद्दार्या सुण्यो। येशूले तिननलाइ ठीक जबाफ दिया था पाइबर तइले उनलाइ सोध्यो, “परमेश्वरले दियाको सब आज्ञामी हइ मुख्य आज्ञा कि हो?”

²⁹ येशूले जबाफ दियो, “सब आज्ञामी मुख्य आज्ञा यो हो, ए इस्राएल देशका मान्सन सुण, परमप्रभु हामरा परमेश्वर एक मान्तर प्रभु हुन।

³⁰ तुइले परमप्रभु आफना परमेश्वरलाइ तेरो सारा हृदयले, तेरो सारा प्राणले, तेरो सारा समजले, रे तेरो सारा सक्तिले प्रेम अर,

³¹ रे दोस्रो महत्वपूर्ण आज्ञा यो हो, तुइले और मान्सनलाइ आफइ जसो प्रेम अरेइ। यो भण्ना ठुलो अर्खो आज्ञा परमेश्वरले दिया आथिन।”

³² रे मोशाको कानुन सिकाउन्यावालाले येशूलाइ भण्यो, “गुरुज्यू, तमले ठीक भण्या, परमेश्वर एकै छन, उन बाहेक अर्खो कोइ परमेश्वर आथिन।

³³ रे परमेश्वरलाइ सारा हृदयले, तेरो सारा प्राणले, तेरो सारा समजले प्रेम अद्दु, रे और मान्सनलाइ आफइलाइ जसो प्रेम अद्दु, परमेश्वरलाइ सब बलिदान रे भेटी चढाउनु भण्ना भौत महत्वपूर्ण हो।”

³⁴ तइले बुद्दिमानिसित जबाफ दिया धेकिबर येशूले तइलाइ भण्यो, “तु परमेश्वरका राज्यमि प्रवेश अद्दाइलाइ नजिक छइ।” तइ समय बठेइ येशूलाइ सवाल अदद्या कसइको हिम्मत भएइन।

ख्रीष्ट कइका चेला

³⁵ आजी मन्दिरमि सिकाउन्ज्या येशूले भण्यो, “कसेरी ख्रीष्ट राजा दाउदका सनतान हुन भणि मोशाको कानुन सिकाउन्यावाला भण्नाहान?”

³⁶ याँ सम्मकि राजा दाउद लगइ यो कुरणी पबित्र आत्मा बठेइ बोल्या कि, “परमेश्वरले मेरा प्रभुलाइ भण्यो मेरा दाइँन हाततिर बस, जबसम्म म तेरा शत्तुरलाइ हाराइबर खुट्टामणि चेप्दइन।”

³⁷ यइ अनुछेदमि राजा दाउद आफइले लगइ खीष्टलाइ प्रभु भण्नाहान, “तम काँ बठेइ राजा दाउदका बंसज भया?” पइ ताँ को सारा भिडले उनरो बचन खुसीसित सुण्यो।

येशू बठेइ चेतावनी

³⁸ येशूले आफना शिक्षामि भण्यो, “मोशाको कानुन सिकाउन्यावाला धेकि होशियार रर्या, तिनन मान्सनलाइ धेकाउनाइलाइ सार्वजनिक ठाउँमि लामा रे महंगो लत्ता लाउनाइ मन पणउनाहान, रे मान्सनले बजारमि मान दिइबर अबिबादन अर्या मन पणउनाहान।

³⁹ तिननले यहुदि सभाघरमी मुख्य ठाउँ रे भोजमि आदरको ठाउँमि बस्साइ मन पडाउनाहान।

⁴⁰ तिनन धोका दिइबर बिधवाका घरको सब सम्पति लइनाहान, रे तिनन मान्सलाइ आफ निको हु धेकाउनाइलाइ सार्वजनिक ठाउँमि लामा-लामा प्रार्थना अद्दाहान, यिसा मान्सलाइ परमेश्वरले पक्‍का आजी बड्ताइ दण्ड दिन्या हुन।”

बिधवाले दिया भेटी

⁴¹ येशू मन्दिरको भेटी चढाउन्या ठाउँका साम्नेइ बस्या, रे भिडले मन्दिरको भेटी-पात्रमि भेटी चडाया हेद्द पस्या। भौत धनि मान्सले ठुलो-ठुलो रकम चडायो।

⁴² पइ एक गरिब बिधवाले आइबर दुइ तामाको सिक्‍का चडायो जसको मोल भौत कम थ्यो।

⁴³ पइ येशूले आफना शिष्यालाइ आफना वाँ बोलाइबर भण्यो, “साँच्चि म तमलाइ भण्नउ, मन्दिरका भेटी-पात्रमि चडाउन्यामि हइ यइ गरिब बिधवाले और सबहइ बड्ताइ चडाइराइछ,

⁴⁴ क्याकि सबले आफना प्रसस्तको धन सम्पति बठेइ केइ भेटी चडायो, तर यइ बिधवा आइमाइले चाइ आफना दरिद्रता बठेइ आफ जिबित रनाइ निउति जी लगइ थ्यो त्यो सब भेटी चडायो।”