मर्कुस 1 - डोटेली नयाँ करार

बप्तिस्मा दिन्या यूहन्नाले बाटो तयार पाड्या

¹ यो सुसमाचार येशू ख्रीष्टको जीवनका बिसयमि सत्य काहानि हो। उन परमेश्वरका चेला हुन।

² यइ सत्य काहानि को सुरुवात बप्तिस्मा दिन्या यूहन्ना आउनाले भयो। उन आउन्या बारेमि पइल्ली बठेइ यशैया अगमबक्ताका किताबमी लेखिरइथ्यो। अगमबक्ता बठेइ परमेश्वरले आफ्ना चेलालाइ इसो भण्यो: यो मेरो खबर पुर्याउन्या मान्स हो, “म एइलाइ तेरा अगाडी पठाउन्या हु, रे उ मान्सनलाइ तेरा आगमनकीलाइ तयार अरोउ।

³ उनरो आवाज उजाड ठाउँमि कला हाल्या सुणिन्या हो, प्रभुको आगमनकीलाइ आफइलाइ तयार पाड। आफइलाइ इसो राख ताकि प्रभुको आगमनमी तमलाइ तयार पाउन सकुन।”

⁴ यो सन्देश दिन्या बप्तिस्मा-दिन्या यूहन्ना थ्यो। त्यो एक उजाड ठाउँमि बसन्थ्यो, रे उइले मान्सनलाइ बप्तिस्मा लिनु खाचो छ भणी प्रचार अरन्थ्यो, यो धेकाउनाइलाइ कि उन सब पाप अद्द छाडिबर परमेश्वरतिर फर्क्या छन, ताकि उन सब क्षमा पाउन सकुन।

⁵ यहुदिया जिल्ला रे यरुशलेम सहरका सब मान्सन निकलिबर यूहन्नाको प्रचार सुण्नालाइ तइ उजाड ठाउँमि गया। जाँ तिन सबले आफ्ना पाप माणि लिया, तइ पछा यूहन्नाले उनलाइ यर्दन नदिमी बप्तिस्मा दियो।

⁶ यूहन्नाले उटका रौ बठेइ बुण्या लत्ता लाउथ्या। उन आफ्नो कम्मर मणि छालाको पेटी बादन्थ्या। उन फटींगा रे बन मह खान्थ्या।

⁷ जब यूहन्नाले प्रचार अद्द लाग्या, उनले मान्सलाइ भण्यो, “एक मान्स जो म भण्ना महान छन, छिट्टाइ आउन्ना छन। म त निउडिबर उनरा जुताका ताना खोलल्या लायकको लगइ आथिन।

⁸ मइले तमलाइ पानिले बप्तिस्मा दिन्नाछु, तर उनले तमनलाइ पबित्र आत्माले बप्तिस्मा दिन्या हुन।”

येशूको बप्तिस्मा रे परिक्षा

⁹ यूहन्नाले इसेरि प्रचार अरिसक्या पछा येशू गालील जिल्लाको नासरत गाउँ बठेइ आया रे उनले लगइ यूहन्नाका हात बठेइ यर्दन नदिमी बप्तिस्मा लियो।

¹⁰ जब येशू पानी बठेइ बाइर आया, उतन्जेइ उनले अग्गास उगड्या रे पबित्र आत्मा ढुकुरका रुपमि आफमी ओलीबर आया धेक्यो।

¹¹ परमेश्वरले स्वर्ग बठेइ यिसो भण्यो, “तु मेरो प्यारो चेलो हइ, रे तुसित म भौत खुशी छु।”

¹² तइ पछा उतन्जेइ परमेश्वरको पबित्र आत्माले येशूलाइ उजाड ठाउँमि लैय्या।

¹³ येशू चालिस दिन सम्म उजाड ठाउँमि बस्या रे ताँ सैतानले उनलाइ परिक्षा अरीराख्यो। तइ ठाउँमि जङगली पसु लगइ थ्या, रे स्वर्गदुतले आइबर येशूको सेवा अर्यो।

पइल्लिका शिष्याको बोलावट

¹⁴ केइ दिन पछा, जब यूहन्नालाइ पकडीबर झेलमि हाल्यो, तइ पछा येशू गालील जिल्लामि गाया रे मान्सनका बिचमि परमेश्वरको सुसमाचार प्रचार अर्यो।

¹⁵ येशूले भण्यो, “आब समय पुरा भया छ रे परमेश्वरको राज्य नजिक आइरइछ। आब पाप अद्द छाडिबर परमेश्वरतिर फर्क रे सुसमाचारमि बिश्वास अर।”

¹⁶ जब एक दिन येशू गालील समुद्रका किनारइ किनार जानाथ्या, उनले सिमोन रे तइको भाइ अन्द्रियासलाइ समुद्रमी जाल हाण्नार्या धेक्यो। क्याकि तिनन माछा माद्या काम अरन्थ्या।

¹⁷ येशूले तिननलाइ भण्यो, “शिष्या हुनाइलाइ मेरा पछा लाग। जसेरि तम माछा मारन्छौ, तसेरि म तमनलाइ मान्सनलाइ शिष्या बन्नाइलाइ जमा अद्दु सिकाउनौ।”

¹⁸ तिनन उतन्जेइ आफना माछा माद्दया काम छाडिबर उनरा शिष्या बन्नालाइ उनरा पछा लाग्या।

¹⁹ तइ पछा येशू रे उनरा दुइ जाना शिष्या किनारइ किनार हेद्दाथ्या तइ बेला येशूले जब्दियाका दुइ चेला याकुब रे तइको भाइ यूहन्नालाइ धेक्यो। उन नामि बसिबर माछा माद्दाइलाइ आफ्ना जाल सिलाउनाथ्या।

²⁰ येशूले तिननलाइ उतन्जेइ बोलायो, मेरा पछा लाग रे मेरा शिष्या बन, रे तिनन आफना बा जब्दिया रे तिनरा काम अद्द्यालाइ नामि छाडिबर येशूका शिष्या बन्नाइलाइ येशूका पछा लाग्या।

येशूले भूत निकाल्यो

²¹ येशू रे उनरा शिष्या कफर्नहुम गाउँमी गया, तइ पछा बिश्राम दिन आयो रे येशू यहुदि सभाघरमी पसिबर मान्सनलाइ शिक्षा दिन लाग्या।

²² रे उनरो शिक्षा सुणिबर मान्स छक्‍क पड्या, क्याकि येशूले तिननलाइ मोशाको कानुन सिकाउन्यावालाले जसेरि होइन, तर येशू तिननसित एक शिक्षककि जसेरि अधिकारसित सिकाउन्थ्या।

²³ जब येशू यहुदि सभाघरमी ज्ञानका कुरणी दिन्नाथ्या तइ बेला ताँ एक जानो भूत लाग्या मान्स थ्यो।

²⁴ उतनजेइ तइले जोरले बोलिबर भण्यो, “हे नासरत गाउँका येशू! तम हामलाइ क्याकि असजि अद्दाछौ? कि तम हामलाइ नास पाड्डाइ आया हौ? म तमलाइ पछेण्नउ, तम को हउ? तम मान्तर पबित्रजन हौ जो परमेश्वरका वाँ बठेइ आया हउ।”

²⁵ येशूले भूतलाइ यिसो भणि हकाद्द पस्या, “चुप लाग, रे तइ बठेइ निकलिबर जा!”

²⁶ तइ भूतले मान्सलाइ घुडबुडयो रे जोरले कला हालिबर तइ मान्स बठेइ निकलिबर गयो।

²⁷ यहुदि सभाघरमी भया सब मान्सले भौत अचम्म माण्यो। रे तिन एक अर्खालाइ सोद्द लाग्या, “यो एक नयाँ प्रकारको ज्ञानकि कुरणी रइछ। क्याकि येशू उनसित एक इसो शिक्षककि जसेरी कुरणी अरन्थ्या जइसित अधिकार छ, रे याँ सम्मकि येशूले भूतलाइ आज्ञा दिनाहान रे भूतले उनरो आज्ञा माणनाहान।”

²⁸ पइ पछा येशूले जो अर्याथ्यो तइका बारेमि तिननले और मान्सनलाइ भण्यो, रे छिट्टाइ गालील जिल्ला भरिका मान्सनले येशूको बारेमि सुण्यो।

येशूले भौत मान्सनलाइ निको अर्याको

²⁹ तइ पछा येशू रे उनरा शिष्या यहुदि सभाघर बठेइ निकलिबर सिमोन रे अन्द्रियासका घर गया। याकुब रे यूहन्ना लगइ तिननसित गया।

³⁰ ताँ सिमोनकि सासु जरले सिकिस्त होइबर खाटमी सिरइथि। जब येशू सिमोनका घर आया कसइले येशूलाइ सिमोनकि सासु बिमार छ भण्यो।

³¹ येशू तिनरा खाट नजिकै गइबर तिनरो पाखुडो समाइबर तिनलाइ उठ्ठाइलाइ सहयोग अर्यो। रे जरले तिनलाइ तसइ बेला छाड्यो। तइ पछा तिनले तिननलाइ खानाइ दियो।

³² बसाइतक, बिश्रामको दिन बित्या पछा भौत मान्सन जो बिमारी रे जइलाइ भूत लाग्याथ्यो। तिनन मान्सनलाइ लेइबर उनरा वाँ आया।

³³ मान्सको ठुलो भिड सिमोनका घरका आगनमी जमा भया।

³⁴ भौत मान्स जो भौत किसम्का रोगले सिकिस्त थ्या, येशूले सबलाइ तिनरा बिमार बठेइ निको अर्यो रे भूतलाइ निकाल्यो, उनले भूतलाइ बोल्लु दिएइन क्याकि भूतलाइ थाथ्यो कि उन येशू खिष्ट हुन।

एकान्तमी येशूको प्रार्थना

³⁵ भोलिबार परभातइ सुर्य आउना हइ पइल्ली येशू उठीबर कफर्नहुम गाउँ बठेइ बाइर एकान्त ठाउँमि गया, ताँ उनले प्रार्थना अर्यो।

³⁶ तइ पछा सिमोन रे तइका साथिले येशू गया था पायो, उन सब येशूलाइ खोज्जाइ गया।

³⁷ जब उनले येशूलाइ भेट्यो रे भण्यो, “भौत मान्स तमलाइ गाउँमि खोज्जा छन।”

³⁸ तर येशूले तिनलाइ भण्यो, “आस, हाम नजिकका और सहर लगइ जानाउ, रे म उनरा बिचमि प्रचार अद्दाउ क्याकि म संसारमी मान्सनलाइ सुसमाचार सुणाउनाइ आइरइछु।”

³⁹ तबइकिलाइ येशू रे उनका शिष्या गालील जिल्लाका भौत सहर रे गाउँमी गया, ताँ उनले यहुदि सभाघरमी प्रचार अद्दाइ रया रे मान्सन बठेइ भूत निकाल्लाइ रया।

येशूले कोडी मान्सनलाइ निको अर्याको

⁴⁰ एक दिन कोडी मान्स, येशूका वाँ आइबर घुडा टेकिबर बिन्ति अद्द पस्यो, “तमले इच्छा अर्यो भण्या मलाइ निको बनाइ सकन्छौ।”

⁴¹ तब येशू दयाले भरिबर उनले आफ्नो हात तइमि राख्यो, रे तइलाइ भण्यो, “म तुलाइ निको बनाउन चाहनउ।”

⁴² तसइ बेला तइको कोड निको होइय्यो।

⁴³ येशूले तइलाइ कडा आज्ञा दिइबर यिसो भणि पठाइदियो,

⁴⁴ “हेर तुइले यो कसइलाइ जन भणेइ, तर गइबर तु आफइलाइ यहुदि पुजारिका वाँ धेका कि तु निको भइसक्याछइ। रे परमेश्वरलाइ त्यो सब बलि चढा जइका बारेमि मोशाले कोड बठेइ निको हुन्या मान्सलाइ आज्ञा दियाथ्यो, पुजारिले घोषणा अद्द सकुन कि तेरो कोड निको भइरइछ। सब मान्सनले था पाउन्या हुन कि तु निको भइरइछ।”

⁴⁵ तर कोडी मान्स तइ ठाउँ बठेइ गयो, रे येशूले निको अरेइ कुरणी सब मान्सलाइ भण्यो। इसो भया हुनाले येशू खुला रुपले मान्सका बिचमि जान पाएइन, रे गाउँका बाइर एकान्त ठाउँमि रया। पइलगइ मान्स सब जगा हइ उनरा वाँ आया।